ឯកឧត្តម ប៉ុញ សច្ចៈ ដឹកនាំកិច្ចប្រជុំពិភាក្សា លើគ្រោងប្លង់លម្អិតនៃ គម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់បវេល ខេត្តបាត់ដំបង
ភ្នំពេញ៖ ឯកឧត្តម ប៉ុញ សច្ចៈ រដ្ឋលេខាធិការ និងជានាយកគម្រោងទទួលហិរញ្ញប្បទានពីសាធារណរដ្ឋកូរ៉េ ក្នុងនាមតំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំពិភាក្សា ត្រួតពិនិត្យ និងផ្តល់យោបល់លើការងារសិក្សាគ្រោងប្លង់លម្អិត (Detailed Design ) គម្រោងអភិវឌ្ឍន៍ប្រព័ន្ធធារាសាស្រ្ត និងកាត់បន្ថយទឹកជំនន់ បវេលខេត្តបាត់ដំបង។
សូមជម្រាបថា កិច្ចប្រជុំនេះមានការចូលរួមពីក្រុមទីប្រឹក្សាបច្ចេកទេស និងអ្នកពាក់ព័ន្ធ តំណាងអគ្គនាយកដ្ឋានដោះស្រាយផលប៉ះពាល់នៃក្រសួងសេដ្ឋកិច្ច និងហិរញ្ញវត្ថុ និងតំណាងមកពីធនាគារអាហរ័ណ និហរ័ណកូរ៉េ (Korean Eximbank) ។
ឯកឧត្តមរដ្ឋលេខាធិការ បានគូសបញ្ជាក់ឱ្យដឹងថា គម្រោងអភិវឌ្ឍន៍ប្រព័ន្ធធារាសាស្ត្របវេលត្រូវធ្វើការអភិវឌ្ឍឱ្យស្របតាមលក្ខណៈបច្ចេកវិទ្យា និងនវានុវត្តន៍ថ្មី ដោយបំពាក់ហេដ្ឋារចនាសម្ព័ន្ធគ្រប់ជ្រុងជ្រោយ និងប្រកបដោយប្រសិទ្ធភាពលើការគ្រប់គ្រងទឹក។
ទន្ទឹមនឹងនេះ ឯកឧត្តមរដ្ឋលេខាធិការបានស្នើឱ្យទីប្រឹក្សាបច្ចកេទេសគម្រោងពន្លឿនការសិក្សាឱ្យចប់មុនកាលកំណត់ និងផ្តល់របាយការណ៍ដោះស្រាយផលប៉ះពាល់ដីធ្លី និងរបាយការណ៍ដោះស្រាយយុទ្ធភណ្ឌមិនទាន់ផ្ទុះជាអាទិភាពដល់ស្ថាប័នពាក់ព័ន្ធធ្វើការដោះស្រាយឱ្យបានឆាប់។
ឯកឧត្តមរដ្ឋលេខាធិការ ក៏បានណែនាំដល់អ្នកពាក់ព័ន្ធទាំងអស់ ជាពិសេសទីប្រឹក្សាបច្ចេកទេសគម្រោងត្រូវយកចិត្តទុកដាក់លើការងារសិក្សាគ្រោងប្លង់លម្អិតនិងព្យាយាមធ្វើការសម្របសម្រួលទៅតាមស្ថានភាពជាក់ស្តែងក្នុងស្មារតីយកចិត្តទុកដាក់ទទួលខុសត្រូវខ្ពស់ ដើម្បីឱ្យគម្រោងដំណើរការទៅដោយរលូន និងសម្រេចបានជោគជ័យ។
សូមបញ្ជាក់ថា បន្ទាប់ពីកិច្ចប្រជុំនេះ ក្រុមការងារនឹងរួមគ្នាចុះទៅដល់ទីតាំងគម្រោងផ្ទាល់ ដើម្បីពិនិត្យជាក់ស្តែងនៅមូលដ្ឋាន៕
