អភិបាលខេត្តបាត់ដំបង អញ្ជើញសំណេះសំណាលកីឡាករចំណុះទូកនរិន្ទរង្សីពិជ័យចិត្របុត្រដែលកំពុងហ្វឹកហាត់ត្រៀមទៅប្រកួតនៅភ្នំពេញ ក្នុងព្រះរាជពិធីបុណ្យអុំទូក ដែលនឹងមកដល់នៅពាក់កណ្ដាលខែវិច្ឆិកា ខាងមុខនេះ

ភ្នំពេញ៖ នៅថ្ងៃទី២១ ខែតុលា ឆ្នាំ២០២៤ ឯកឧត្តម សុខ លូ អភិបាលខេត្តបាត់ដំបង និងក្រុមការងារ បានអញ្ជើញជួបសំណេះសំណាល សួរសុខទុក្ខ និងនាំយកអំណោយឧបត្ថម្ភជូនកីឡាករចំណុះទូកង”នរិន្ទរង្សីពិជ័យចិត្របុត្រ ” នៅវត្តឯករង្សី ស្ថិតក្នុងភូមិព្រែកនរិន្ទ ឃុំព្រែកនរិន្ទ ស្រុកឯកភ្នំ ខេត្តបាត់ដំបង ដែលកំពុងហ្វឹកហាត់ដើម្បីត្រៀមទៅចូលរួមប្រកួតនៅរាជធានីភ្នំពេញ ក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅនៅថ្ងៃទី ១៤-១៥-១៦ ខែវិច្ឆិកា ឆ្នាំ២០២៤ ខាងមុខនេះ។

ក្នុងឱកាសនោះ ព្រះតេជគុណ ចម ចិត្រ ព្រះគ្រូអនុគណស្រុកឯកភ្នំ ចៅអធិការវត្តឯករង្សី និងជាប្រធានគណៈគ្រប់គ្រងទូកងនរិន្ទរង្សីពិជ័យចិត្របុត្រ មានសង្ឃដីការថា វត្តឯករង្សី ក៏ដូចជាចំណុះទូកនរិន្ទរង្សីពិជ័យចិត្របុត្រ មានកិត្តិយសដោយមានការយកចិត្តទុកដាក់ និងគាំទ្រ ពីសំណាក់ឯកឧត្តម សុខ លូ អភិបាលខេត្តបាត់ដំបង ដែលបានអញ្ជើញចុះមកសួរសុខទុក្ខ ។

ព្រះតេជគុណ ថ្លែងអំណរគុណចំពោះឯកឧត្តមអភិបាលខេត្តដែលបានលះបង់នូវពេលវេលាដ៏មានតម្លៃចុះមកសួរសុខទុក្ខ ដើម្បីជាកម្លាំងចិត្តដល់ចំណុះទូកទាំងអស់ ព្រមទាំងមានទំនុកចិត្តនឹងនាំយកទូកនរិន្ទរង្សីពិជ័យចិត្របុត្រទៅចូលរួមប្រណាំងនៅក្នុងព្រះរាជពិធីបុណ្យអុំទូកនៅរាជធានីភ្នំពេញ។

ឯកឧត្តម សុខ លូ ថ្លែអំណរគុណដល់ព្រះតេជគុណ ចម ចិត្រ ដែលកន្លងមកបានខិតខំដឹកនាំទូកនរិន្ទរង្សីពិជ័យចិត្របុត្រដើម្បីចូលរួមប្រកួតក្នុងថ្ងៃបុណ្យអុំទូកចេញព្រះវស្សានៅតាមបណ្ដោយដងស្ទឹងសង្កែ ក្រុងបាត់ដំបងដែលញ៉ាំងឱ្យពិធីបានប្រព្រឹត្តទៅដោយជោគជ័យ។

ឯកឧត្តម សុខ លូ ថ្លែងអំណរគុណដល់ចំណុះទូកនរិន្ទរង្សីពិជ័យចិត្របុត្រទាំងអស់ដែលបានខិតខំហ្វឹកហាត់ដើម្បីត្រៀមទៅចូលរួមប្រកួតនៅរាជធានីភ្នំពេញ ។

ឯកឧត្តម សុខ លូ បានផ្តាំផ្ញើរដល់កីឡាករចំណុះទូកទាំងអស់ត្រូវពង្រឹងសាមគ្គីភាព ឯកភាពគ្នា និងត្រូវយកចិត្តទុកដាក់ហ្វឹកហាត់ត្រៀមដើម្បីទៅចូលរួមប្រកួតជាមិត្តភាពអបអរសាទរព្រះរាជពិធីបុណ្យអុំទូក នៅរាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ឯកឧត្តម សុខ លូ បញ្ជាក់ថា ក្នុងឆ្នាំ២០២៤នេះ ខេត្តបាត់ដំបងបានត្រៀមទូកចំនួន៨ ដើម្បីទៅចូលរួមប្រកួតក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅនៅថ្ងៃទី ១៤-១៥-១៦ ខែវិច្ឆិកា ឆ្នាំ២០២៤ ខាងមុខនេះ៕