លោកជំទាវវេជ្ជបណ្ឌិត យក់ សម្បត្តិ៖ កម្ពុជា និងជប៉ុននៅតែបន្តពង្រឹងកិច្ចសហការ ឱ្យកាន់តែរឹងមាំថែមទៀត លើវិស័យអាទិភាពជាច្រើន
ភ្នំពេញ៖ នាថ្ងៃទី១៤ ខែតុលា ឆ្នាំ២០២៤ នៅទីស្តីការក្រសួងសុខាភិបាល ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានទទួលជួប លោក NAGASE Kensuke រដ្ឋមន្ត្រី និងជាអនុប្រធានបេសកកម្ម នៃស្ថានទូតជប៉ុន ដែលទើបតែងតាំងថ្មី ចូលជួបសម្តែងការគួរសម និងពិភាក្សាការងារ។
ជាកិច្ចចាប់ផ្តើម លោកជំទាវរដ្ឋលេខាធិការ បានសម្តែងការអបអរសាទរចំពោះ លោក NAGASE Kensuke សម្រាប់ទទួលបានការតែងតាំងថ្មី និងសូមថ្លែងអំណរគុណដល់រាជដ្ឋាភិបាល និងប្រជាជន ជប៉ុន ដែលតែងតែជួយគាំទ្រដល់ការអភិវឌ្ឍប្រទេសកម្ពុជាលើគ្រប់វិស័យ ជាពិសេសវិស័យសុខាភិបាលតាមរយៈការចូលរួមចំណែកក្នុងការធ្វើឱ្យប្រសើរឡើងនូវប្រព័ន្ធថែទាំសុខភាពនៅកម្ពុជា និងផ្តល់ហិរញ្ញប្បទាន ក្រោមក្របខណ្ឌជំនួយសហប្រតិបត្តិការបច្ចេកទេស និងហិរញ្ញប្បទានឥតសំណងដល់វិស័យសុខាភិបាល ដូចជាសាងសង់មូលដ្ឋានសុខាភិបាល និងផ្គត់ផ្គង់សម្ភារវេជ្ជសាស្ត្រនៅតាមមន្ទីរពេទ្យខេត្តជាច្រើនក្នុងប្រទេសកម្ពុជា ការពង្រឹងសេវាសង្គ្រោះបន្ទាន់ផ្នែកសម្ភព និងការថែទាំទារកទើបកើត និងការអភិវឌ្ឍធនធានមនុស្សសុខាភិបាលជាច្រើន តាំងពីដំណាក់កាលលំបាករហូតមកដល់បច្ចុប្បន្ន ជាពិសេសក្នុងអំឡុងពេល នៃការរាតត្បាតនៃជំងឺ ឆ្លងកូវីដ ១៩ ជាសាកល។ កម្ពុជា និងជប៉ុននៅតែបន្តពង្រឹងកិច្ចសហការឱ្យកាន់តែរឹងមាំថែមទៀតលើវិស័យអាទិភាពជាច្រើនដូចជា៖ គម្រោងធ្វើឱ្យប្រសើរឡើងមន្ទីរពេទ្យថ្នាក់តំបន់ ព្រមទាំងផ្តល់ជូននូវសម្ភារបរិក្ខារពេទ្យ និងគម្រោងការធ្វើឱ្យប្រសើរឡើងនូវការគ្រប់គ្រងកាកសំណល់នៅម្ពុជា។
ជាការឆ្លើយតប លោក NAGASE Kensuke រដ្ឋមន្ត្រី និងជាអនុប្រធានបេសកកម្មថ្មី នៃស្ថានទូតជប៉ុន បានថ្លែងអំណរគុណចំពោះក្រសួងសុខាភិបាល ដែលបានសហការ សម្របសម្រួល ក្នុងរយៈពេល ច្រើនឆ្នាំកន្លងមកនេះ និងការគាំទ្រក្នុងការចាប់ផ្តើមគម្រោងមួយចំនួនដូចជា គម្រោងកម្ចីឥណទានការធ្វើឱ្យប្រសើរឡើងនូវមន្ទីរពេទ្យថ្នាក់តំបន់ និងគម្រោងការបង្កា និងទប់ស្កាត់ជំងឺមិនឆ្លងនៅកម្ពុជា។
លោក NAGASE Kensuke ក៏បានគូសបញ្ជាក់ពីការគាំទ្រដល់ រាជរដ្ឋាភិបាលកម្ពុជា ក្នុងការអនុវត្តផែនទីចង្អុលផ្លូវឆ្ពោះទៅសម្រេច គោលដៅ ឆ្នាំ២០៣៥ ក៏ដូចជាគោលជំហរ បន្តពង្រឹងកិច្ចសហប្រតិបត្តិការ គាំទ្រផែនការអាទិភាពរបស់ក្រសួងសុខាភិបាល និងពង្រីកវិសាលភាពនៃកិច្ចសហប្រតិបត្តិការទ្វេភាគីកម្ពុជា-ជប៉ុន លើវិស័យសុខាភិបាល បន្ថែមទៀត នៅក្នុងព្រះរាជាណាចក្រកម្ពុជា។
ជាចុងបញ្ចប់ លោកជំទាវរដ្ឋលេខាធិការ បានថ្លែងអំណរគុណ ដល់គណ:ប្រតិភូ និងសហការីទាំងអស់ ក្នុងការបន្តកិច្ចសហប្រតិបត្តិការ ដេីម្បីឈានទៅសំរេចគោលដៅដោយជោគជ័យ។
