នាយករដ្ឋមន្រ្តី ណែនាំដល់ប្រមុខការពារជាតិ តាមដានជាប្រចាំចំពោះកងទ័ពមួកខៀវកំពុងប្រតិបត្តិការនៅក្រៅប្រទេស ជាពិសេសប្រទេសកំពុងមានសង្រ្គាម
ភ្នំពេញ៖ ក្នុងឱកាសអញ្ជើញចូលរួមជាអធិបតីភាពខួបអនុស្សាវរីយ៍លើកទី៣០ឆ្នាំ នៃការបង្កើតកងពលតូចលេខ៧០(១៥ តុលា ១៩៩៤ – ១៥ តុលា ឆ្នាំ ២០២៤)នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំដល់រដ្ឋមន្រ្តីក្រសួងការពារជាតិកម្ពុជា នាយឧត្តមសេនីយ៍ ទៀ សីហា ត្រូវធ្វើការតាមដាន និងទាក់ទងជាប់ជាប្រចាំថ្ងៃចំពោះកងទ័ពមួកខៀវកម្ពុជា ដែលកំពុងបំពេញបេសកកម្មនៅក្រៅប្រទេសក្រោមឆត្រអង្គការសហប្រជាជាតិជាពិសេសគឺប្រទេសដែលកំពុងមានសង្រ្គាម។
សម្តេចធិបតី បានថ្លែងថា សម្តេចតែងតែធ្វើការទាក់ទងជាប្រចាំជាមួយកង ទ័ពមួកខៀវរបស់កម្ពុជាដែលកំពុងឈរជើងនៅក្រៅប្រទេស ជាពិសេសគឺនៅប្រទេសលីបង់តែម្តង ដើម្បីចង់ដឹងអំពីស្ថានការណ៍ជាក់ស្តែងនៅទីនោះ ខណៈសង្រ្គាមនៅប្រទេសនេះបានកំពុងផ្ទុះឡើងជារៀងរាល់ថ្ងៃ។
សម្តេចធិបតីក៏បានណែនាំបន្ថែមទៀតដល់ប្រមុខការពារជាតិកម្ពុជាត្រូវ តែតាមដានស្ថានការណ៍ឲ្យជាប់ជាប្រចាំចំពោះសង្រ្គាមនៅប្រទេសមួយចំនួន ដែលមានកងទ័ពមួកខៀវ របស់កម្ពុជាដែលកំពុងបេសកកម្មនោះ។
ជាមួយគ្នានោះដែរ សម្តេចធិបតី បានប្រកាសសម្រេចកែសម្រួលសមាសភាពរបស់គណៈកម្មាធិការជាតិបញ្ជូនកងកម្លាំងរក្សាសន្តិភាព ទៅក្រៅប្រទេសក្រោមឆត្រអង្គការសហប្រជាជាតិ ពីក្រសួងការបរទេស និងសហប្រតិបត្តិការអន្តរជាតិឲ្យមកក្រសួងការពារជាតិកម្ពុជាជាអ្នកដឹកនាំវិញ៕
