ក្រោយបែកធ្លាយរឿងអាស្រូវ ជុំវិញអំពើឆបោកលុយរាប់លានដុល្លារ សមត្ថកិច្ចឆ្មក់ចូលផ្ទះវីឡាលោក លី សាម៉េត ប៉ុន្តែរកមិនឃើញមនុស្ស

ភ្នំពេញ៖ ក្រោយលេចធ្លាយរឿងអាស្រូវពាក់ព័ន្ធជាមួយ លោក លី សាម៉េត ដែលគេស្គាល់ថា (គ្រូមា) ជុំវិញអំពើឆបោកលុយរាប់លានដុល្លារ ដែលទម្លាយចេញដោយ សម្ដេចតេជោ ហ៊ុន សែន ប្រធានព្រឹទ្ធសភា ពេលនេះអាជ្ញាធរបានធ្វើការឆ្មក់ចូលផ្ទះវីឡាលោកគ្រូមា ប៉ុន្ដែរកមិនឃើញមនុស្សឡើយ ខណៈកម្លាំងជំនាញកំពុងបើកការស្រាវជ្រាវបន្ត។

លោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឱ្យដឹងថា កាលពីព្រឹកមិញនេះ កម្លាំងសមត្ថកិច្ចជំនាញដោយមានការសម្របសម្រួលនីតិវិធីពីស្ថាប័នអយ្យការអមសាលាដំបូងរាជធានីភ្នំពេញ បានធ្វើការឡោមព័ទ្ធវិឡាដ៏ស្គឹមស្គៃរបស់លោក លី សាម៉េត ក្នុងភូមិសាស្ត្រខណ្ឌឫស្សីកែវ ប៉ុន្ដែអាជ្ញាធររកមិនឃើញបុគ្គលនេះឡើយ។ ហើយគិតមកទល់ពេលសមត្ថកិច្ចកំពុងបើកការស្រាវជ្រាវយ៉ាងយកចិត្តទុក ដើម្បីស្វែងរកអ្នកពាក់ព័​ន្ធបន្តទៀត។

សូមជម្រាបថា កាលពីល្ងាចថ្ងៃទី៧ ខែតុលា ឆ្នាំ២០២៤ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានស្នើឱ្យកម្លាំងសមត្ថកិច្ចតាមឃ្លាំមើល លោក លី សាម៉េត ដែលមានងារជាឯកឧត្តមបណ្ឌិតផង និងជាឧកញ៉ាផងនោះ កុំឱ្យរត់ចេញផុតពីសំណាញ់ច្បាប់។ ការណ៍ដែល សម្តេចតេជោ សម្រេចចិត្តចាត់ការលោក លី សាម៉េត ដោយបើកចំហបែបនេះ ក៏ព្រោះតែលោក លី សាម៉េត បង្ករឿងដល់សម្តេចច្រើនពេក ដូចជា បោកយកប្រាក់គេ ជាដើម ហើយដើរនិយាយថា យកប្រាក់នោះទៅជូនសម្តេចថែមទៀតផង។ ជាមួយគ្នានេះ សម្តេចប្រធានព្រឹទ្ធសភា ថែមទាំងស្នើឱ្យរដ្ឋមន្ត្រីក្រសួងយុត្តិធម៌ ធ្វើការជាមួយតុលាការ ចេញដីកាបង្កកទ្រព្យសម្បត្តិរបស់លោក លី សាម៉េត ទុកសងដល់អ្នកចាញ់បោកផងដែរ។ សម្តេចតេជោ ក៏ជំរុញឱ្យអ្នកដែលចាញ់បោកលោក លី សាម៉េត ដាក់ពាក្យប្តឹង ហើយសម្តេចប្រាប់ទៅក្រុមមេធាវីរបស់សម្តេច ឱ្យត្រៀមខ្លួនចាំទទួលពាក្យបណ្តឹងទាំងនោះ៕