ស្នងការដ្ឋាននគរបាលខេត្តរតនគិរី រៀបចំកិច្ចប្រជុំបូកសរុបលទ្ធផលកិច្ចប្រតិបត្តិការថែរក្សារសន្តិសុខ សណ្តាប់ធ្នាប់ ប្រចាំខែកញ្ញា ឆ្នាំ២០២៤ និងលើកទិសដៅបន្ត
ភ្នំពេញ៖ នៅថ្ងៃទី០៧ ខែកញ្ញា ឆ្នាំ២០២៤ ស្នងការដ្ឋាននគរបាលខេត្តរតនគិរី បានរៀបចំកិច្ចប្រជុំបូកសរុបសភាពការណ៍ លទ្ធផលកិច្ចប្រតិបត្តិការថែរក្សារសន្តិសុខ សណ្តាប់ធ្នាប់ ប្រចាំខែកញ្ញា ឆ្នាំ២០២៤ និងលើកទិសដៅបន្តខែតុលា ក្រោមអធិបតីភាព លោកឧត្តមសេនីយ៍ទោ អ៊ុង សុភាព ស្នងការនគរបាលខេត្តរតនគិរី ដោយមានសមាសភាពចូលរួមលោក-លោកស្រីស្នងការរង នាយ-នាយរងការិយាល័យ អធិការ-អធិការក្រុងស្រុកទាំង៩ មេបញ្ជាការ-មេបញ្ជារការរងវរៈសេនាតូចនគរបាលការពារព្រំដែនទាំង២ និងនាយប៉ុស្តិ៍នគរបាលរដ្ឋបាលទាំង ៥០ឃុំ សង្កាត់។
កិច្ចប្រជុំបានវាយតម្លៃខ្ពស់លើលទ្ធផលកិច្ចប្រតិបត្តិការកាលពីខែកន្លងទៅជាពិសេសការរក្សាសណ្តាប់ធ្នាប់សន្តិសុខក្នុងពិធីបុណ្យភ្ជុំបិណ្ឌប្រកបដោយជោគជ័យគួរជាទីមោទនៈ។
បន្ថែមលើលទ្ធផលល្អ នាខែកន្លងទៅ លោកឧត្តមសេនីយ៍ទោ ស្នងការ បានធ្វើការកោតសរសើរដល់ការខិតខំប្រឹងប្រែងរបស់កងកម្លាំងនគរបាលគ្រប់លំដាប់ថ្នាក់ ដែលបានខិតខំពង្រឹងការពារសន្តិសុខសណ្តាប់ធ្នាប់ជូនខេត្ត ក៏ដូចជា ជាតិមាតុភូមិបានយ៉ាងយកចិត្តទុកដាក់ខ្ពស់ ជាពិសេសត្រូវបន្តពង្រឹងលើការងារ សណ្តាប់ធ្នាប់ធ្វើចរាចរណ៍របស់ប្រជាពលរដ្ឋ និង ការបង្រ្កាបការជួញដូរគ្រឿងញៀន ការងារអន្តោប្រវេសន៍ខុសច្បាប់ ការងារដើរល្បាតរបស់នគរបាលព្រំដែន និងពង្រឹងបន្ថែមការគោរពវិន័យសំលៀកបំពាក់របស់កងកម្លាំង។
បន្ថែមលើនេះ លោកឧត្តមសេនីយ៍ទោ ស្នងការ បានផ្តល់ប្រសាសន៍ដឹកនាំលើផែនការការពារសុវត្ថិភាពជូនថ្នាក់ដឹកនាំ និងផែនការការពារក្នុងសម័យប្រលងធម្យមសិក្សាទុតិយភូមិក្នុងពេលខាងមុខនេះអោយបានល្អម៉ឹងម៉ាត់ និងបន្តជំរុញការងារមួយចំនួនទៀតដែលត្រូវអនុវត្ត ដើម្បីធានាបានការរក្សាសន្តិសុខ សណ្តាប់ធ្នាប់ជូនប្រជាពលរដ្ឋ ៕
