ថ្នាក់ដឹកនាំខេត្តកណ្ដាល អញ្ជើញជាអធិបតីក្នុងកិច្ចប្រជុំត្រួតពិនិត្យប្លង់សាងសង់អគារសាលាខេត្តកណ្តាលថ្មី

ភ្នំពេញ៖ នៅព្រឹកថ្ងៃទី៧ ខែតុលា ឆ្នាំ២០២៤នេះ ឯកឧត្តម នូ សាខន ប្រធានក្រុមប្រឹក្សាខេត្ត និងឯកឧត្តម គួច ចំរើន អភិបាល នៃគណៈអភិបាលខេត្តកណ្តាល បានអញ្ជើញជាអធិបតី ដោយមានការចូលរួមពិនិត្យបច្ចកេទេស ឯកឧត្តម លី រស្មី រដ្ឋលេខាធិការ ក្រសួងរៀបចំដែនដី នគរូបនីយកម្ម សំណង់ និងសុរិយោដី ក្នុងកិច្ចប្រជុំត្រួតពិនិត្យប្លង់សាងសង់អគារសាលាខេត្តកណ្តាលថ្មី ដោយមានការចូលរួមពីមន្ទីរពាក់ព័ន្ធ បណ្តាទីចាត់ការចំណុះសាលាខេត្ត និងតំណាងក្រុមហ៊ុនទទួលការសាងសង់ផងដែរ។

សូមជម្រាបថា ដោយអគារសាលាខេត្តបច្ចុប្បន្នមានសភាពចាស់ទ្រុឌទ្រោម មិនអាចបំពេញការងារ និងផ្តល់សេវាជូនប្រជាពលរដ្ឋបានយូរអង្វែង ទើបរដ្ឋបាលខេត្តកណ្តាល នឹងចាប់ផ្តើមវាយអគារសាលាខេត្តចាស់ចោល ចាប់ពីថ្ងៃទី១ ខែតុលាឆ្នាំ២០២៤តទៅ។

ដើម្បីឱ្យការសាងសង់ទទួលបានជោគជ័យតាមការគ្រោងទុក ក្រុមហ៊ុនសាងសង់នឹងរុះរើអគារ សាលាខេត្តបច្ចុប្បន្ន ដើម្បីបើកការដ្ឋានសាងសង់អគារសាលាខេត្តថ្មីឆាប់ៗ នាពេលខាងមុខនេះ។ ដូចនេះ ទីចាត់ការ និងអង្គភាព ចំណុះរដ្ឋបាលខេត្ត នឹងធ្វើការផ្លាស់ប្តូរដូចខាងក្រោម៖

១.ការបម្រើសេវារដ្ឋបាលទូទៅ និងសេវារដ្ឋបាលរបស់អង្គភាពច្រកចេញចូលតែមួយ និងការិយាល័យ ប្រជាពលរដ្ឋខេត្ត នៅបន្តបំពេញការងារជាប្រចាំ និងជាធម្មតាជូនប្រជាពលរដ្ឋ ស្ថិតនៅទីតាំងចាស់ដដែល។

២.ទីចាត់ការ អង្គភាពចំណុះសាលាខេត្តក្រៅពីនេះ នឹងត្រូវផ្លាស់ប្តូរជាបណ្តោះអាសន្ន ទៅទីតាំងថ្មី ស្ថិតនៅបរិវេណ មជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្តាល (ផ្នែកខាងក្រោយ) ផ្លូវលេខ២១០ ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ៕