ភ្នំពេញ៖ ក្នុងឱកាសអញ្ជើញធ្វើបាឋកថាស្តីពី «គោលនយោបាយថាមពលកម្ពុជា» នៅសាកលវិទ្យាល័យភូមិន្ទភ្នំពេញ នារសៀលថ្ងៃទី០៤ ខែតុលា ឆ្នាំ២០២៤ ឯកឧត្ដម កែវ រតនៈ រដ្ឋមន្ដ្រីក្រសួងរ៉ែ និងថាមពល បានបញ្ជាក់ថា អាស៊ានបានដាក់គោលដល់រួមគ្នានៅឆ្នាំ២០៣០ ចង់ឃើញការផលិតអគ្គិសនី ចេញពីថាមពលស្អាត ៣៦ភាគរយ ខណៈដែលកម្ពុជាដាក់ចេញគោលការឆ្នាំ២០៣០ ត្រូវផលិតថាមពលស្អាតឱ្យបាន ៧០ភាគរយ កើនឡើងគុណនឹងពីរនៃការចង់បានរបស់អាស៊ាន។
ឯកឧត្ដម កែវ រតនៈ បានថ្លែងថា «ការឯកភាពគ្នារបស់អាស៊ានថា គន្លងទៅអព្យាក្រិត្យកាបូនគឺនឹងមានគន្លងផ្សេងៗគ្នា ដោយសារមានការឯកភាពរៀងៗខ្លួន, ប៉ុន្តែអាស៊ាន បានដាក់គោលដៅមួយថា បើសិនក្នុងស្ថានភាពធម្មតា អាស៊ានចង់ឃើញនៅត្រឹមឆ្នាំ២០៣០ ការផលិតថាមពលអគ្គិសនី ត្រូវយកចេញពីប្រភពស្អាត យ៉ាងតិច ៣៦ភាគរយ ហើយខំនាំគ្នានៅឆ្នាំ២០៥០ ទៅដល់អព្យាក្រិតកាបូន»។
ឯកឧត្ដម កែវ រតនៈ បានបន្ថែមថា ដោយឡែកសម្រាប់កម្ពុជាវិញ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ផែនការយ៉ាងតិចត្រឹមឆ្នាំ២០៣០ យ៉ាងយូរ ថាមពលស្អាតនៅកម្ពុជាយ៉ាងតិចត្រូវមាន ៧០ភាគរយ កើនឡើងគុណនឹងពីរនៃការចង់បានរបស់អាស៊ាន ដើម្បីឱ្យកម្ពុជាស្អាតផង ដើម្បីឱ្យការអភិវឌ្ឍន៍ មានចេរភាព និងមានការវិនិយោគចូលក្នុងប្រទេសរបស់យើងផងដែរ។
ឯកឧត្ដម កែវ រតនៈ បានបញ្ជាក់ទៀតថា កម្ពុជាមិនមែនត្រឹមតែបំពេញចិត្តអាស៊ានទាំង ១០ប្រទេសនោះទេ តែកម្ពុជាចង់ធ្វើឱ្យបានល្អប្រសើរជាងអាស៊ានចង់បាន២ដង ខណៈមកដល់ពេលនេះ កម្ពុជាអាចសម្រេចបាន ថាមពលស្អាតជាង ៦០ភាគរយរួចទៅហើយ ខណៈនៅសល់ ១០ភាគរយទៀត កម្ពុជានឹងខិតខំឱ្យសម្រេចបាន៕
