ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងថា ការវិនិយោគលេីវិស័យ អប់រំទើបមានសមត្ថភាព និងមានលទ្ធភាពឱ្យប្រជាពលរដ្ឋរស់នៅដោយខ្លួនឯង ប្រកបដោយចីរភាព។
ក្នុងឱកាសអញ្ជើញប្រគល់សញ្ញាបត្រជូននិស្សិត នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅព្រឹកថ្ងៃទី២៦ ខែកញ្ញា ឆ្នាំ២០២៤ សម្ដេចធិបតី ហ៊ុន ម៉ាណែត បានបញ្ជាក់ថា ការវិនិយោគជាមួយវិស័យ ធនធានមនុស្ស នេះហើយ អាចឱ្យប្រជាពលរដ្ឋអាច រស់ដោយខ្លួនឯងបាន។ នៅពេលពលរដ្ឋអាចរស់ដោយខ្លួនឯងបាន ពេលនោះសេដ្ឋកិច្ចប្រទេសជាតិ ក៏មានការរីកចម្រើនដែរ។
សម្ដេចធិបតី បានបន្ដថា ហេតុអ្វីបានជារដ្ឋ វិនិយោគទៅលើការបណ្ដុះបណ្ដាលធនធានមនុស្ស? ហេតុអ្វីបានជា ឪពុក-ម្ដាយ គ្រប់ៗរូបចង់ឱ្យកូនរបស់ខ្លួនរៀន? ទាំងនេះ គឺជាតម្រូវរបស់ប្រជាជនម្នាក់ៗ ក្នុងការសិក្សា។
សម្ដេចធិបតី នាយករដ្ឋមន្ដ្រី បានមានប្រសាសន៍ថា ប្រទេសជាតិដូចគ្នា យើងចង់បានមនុស្សទាំងអស់ ប្រជាជនទាំងអស់ មានសមត្ថភាព មានកម្រិតជីវភាព មានការឯករាជ្យម្ចាស់ការ នៅក្នុងការកំណត់ជីវភាពរស់នៅ។ គឺវិនិយោគ វិស័យអប់រំនេះហើយ ទើបមានសមត្ថភាព មានលទ្ធភាពឱ្យប្រជាពលរដ្ឋ រស់ខ្លួនឯង ហើយរស់ដោយមានចីរភាព។ ហើយមិនមែនត្រឹមតែរស់ខ្លួនឯងនោះទេ គឺប្រជាពលរដ្ឋនេះហើយ ដែលជាកំណត់នូវកម្លាំងរបស់ជាតិ ៕
