ក្រសួងធម្មការ និងសាសនា ណែនាំពីការរៀបចំទិវាមនុស្សចាស់កម្ពុជា និងទិវាមនុស្សចាស់អន្តរជាតិ ថ្ងៃទី១ ខែតុលា ឆ្នាំ២០២៤

ភ្នំពេញ៖ ក្រសួងធម្មការ និងសាសនា នាថ្ងៃទី២៩ ខែសីហា ឆ្នាំ២០២៤ បានចេញសេចក្តីណែនាំស្តីពី ការរៀបចំទិវាមនុស្សចាស់កម្ពុជានិងទិវាមនុស្សចាស់អន្តរជាតិ ថ្ងៃទី១ ខែតុលា ឆ្នាំ២០២៤ ។

តាមរយៈសេចក្ដីណែនាំនេះដែរ ក្រសួងធម្មការ បានឲ្យដឹងថា ទិវាមនុស្សចាស់កម្ពុជានិងទិវាមនុស្សចាស់អន្តរជាតិ ថ្ងៃទី១ ខែតុលា ត្រូវបានរៀបចំស្របតាម គោលនយោបាយជាតិស្តីពី មនុស្សវ័យចាស់ ២០១៧-២០៣០ និងសេចក្តីសម្រេចរបស់អង្គការសហប្រជាជាតិ។ រាជរដ្ឋាភិបាលចាត់ទុកទិវាមនុស្សចាស់កម្ពុជានិងទិវាមនុស្សចាស់អន្តរជាតិ ជាទិវាបុណ្យរំលឹកដល់គុណូបការៈ របស់បុព្វការីជន ដែលបានកសាងនិងបន្សល់ទុកនូវកេរមរតកដ៏ថ្លៃថ្លាសម្រាប់កូនចៅគ្រប់ជំនាន់។

ក្រសួងធម្មការបន្ថែមថា ដើម្បីរៀបចំទិវាមនុស្សចាស់កម្ពុជានិងទិវាមនុស្សចាស់អន្តរជាតិ លើកទី២៦ ថ្ងៃទី១ ខែតុលា ឆ្នាំ២០២៤ ក្រោមប្រធានបទ “មនុស្សចាស់ក្នុងបរិវិត្តកម្មឌីជីថល” ឱ្យបានទូលំទូលាយនិងដើម្បីផ្សព្វផ្សាយឱ្យប្រជាជនគ្រប់វ័យ បានយល់ដឹងកាន់តែច្បាស់អំពីអត្ថន័យនៃទិវានេះ ក្រសួងធម្មការនិងសាសនា សូមណែនាំដល់មន្ទីរធម្មការនិង សាសនាគ្រប់រាជធានី ខេត្ត ត្រូវសហការជាមួយសម្តេច ព្រះរាជាគណៈ ព្រះថេរានុត្ថេរៈគ្រប់ព្រះអង្គ និងថ្នាក់ដឹកនាំ ពាហិរសាសនាទាំងអស់ ធ្វើចលនានៅតាមបណ្តាវត្តអារាម វិហារសាសនា ដៃគូអភិវឌ្ឍ សប្បុរជននានា និង មូលនិធិផ្សេងទៀត ដើម្បីរៀបចំឱ្យមានសកម្មភាពជួយឧបត្ថម្ភគាំទ្រដល់មនុស្សវ័យចាស់ ជរា ព្យាធិ ពិការ ក្រីក្រ គ្មានទីពឹង ឱ្យមានអាហារទទួលទានគ្រប់គ្រាន់ កន្លែងស្នាក់នៅសមរម្យ សេវាថែទាំផ្សេងៗ និងអាចធ្វើទាន រក្សាសីល ចម្រើនមេត្តាភាវនាតាមប្រពៃណីព្រះពុទ្ធសាសនា និងកិច្ចប្រតិបត្តិតាមសាសនាផ្សេងទៀត ៕