មន្ត្រីជាន់ខ្ពស់ក្រសួងពាណិជ្ជកម្មលើកឡើងថា ពិព័រណ៍អន្តរជាតិ រួមចំណែកយ៉ាងសំខាន់ក្នុងការជំរុញការធ្វើពាណិជ្ជកម្ម និងសេដ្ឋកិច្ចកម្ពុជា

ភ្នំពេញ៖ពិព័រណ៍អន្តរជាតិជាសេរីនៅកម្ពុជាឆ្នាំ២០២៤បានបើកសម្ពោធជាផ្លូវការ ហើយនាព្រឹកថ្ងៃទី២៨ ខែសីហា ឆ្នាំ២០២៤នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ដើម្បីបើកឱកាសដល់ភ្ញៀវជាតិ និងអន្តរជាតិបានចូលរួមទស្សនា ទិញផលិតផលប្រើប្រាស់ផ្សេងៗ និងជំរុញការធ្វើពាណិជ្ជកម្មកាន់តែល្អប្រសើរ។
តំណាងក្រុមហ៊ុន Minh Vi Exhibition and Advertising Services Co., Ltd (VEAS) បានឱ្យដឹងថា អ្នកចូលរួមដាក់ទាំងបង្ហាញនៅក្នុងពិព័រណ៍អន្តរជាតិជាសេរីនៅកម្ពុជាឆ្នាំ២០២៤នេះ មកពី១៣ប្រទេស និងតំបន់ រួមមាន បេឡារុស្ស កម្ពុជា ចិន កូរ៉េ ម៉ាឡេស៊ី ហូឡង់ ប៉ូឡូញ រុស្សី តៃវ៉ាន់ ថៃ សហរដ្ឋអាមេរិក និងវៀតណាម ដែលបង្ហាញផលិតផល បច្ចេកវិទ្យា និងសេវាកម្មទំនើបរបស់ពួកគេ។
ថ្លែងក្នុងពិធីបើកពិព័រណ៍អន្តរជាតិជាសេរីនៅកម្ពុជាឆ្នាំ២០២៤នេះ ឯកឧត្តម សំហេង បូរ៉ា រដ្ឋលេខាធិការ ក្រសួងពាណិជ្ជកម្មបានវាយតម្លៃខ្ពស់ចំពោះអ្នករៀបចំ ពិព័រណ៍អន្តរជាតិជាសេរីនៅកម្ពុជាឆ្នាំ២០២៤នេះឡើង ដោយមានតាំងបង្ហាញផលិតផល និងសេវាកម្ម ទាក់ទងទៅទៅនឹងវិស័យកសិកម្ម វារីវប្បកម្ម សុខាភិបាល គ្រឿងសំអាង បច្ចេកវិទ្យា និងចំណីអាហារជាដើម ដោយមានក្រុមហ៊ុនចំនួន៨៤ និងមានស្តង់ពិព័រណ៍ប្រមាណ១០០ស្តង់។
ឯកឧត្តម ឃុន សាវឿន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ព្រឹត្តិការណ៍នេះ ពិតជាមានសារសំខាន់ក្នុងការរួមចំណែកជំរុញការធ្វើពាណិជ្ជកម្ម និងសេដ្ឋកិច្ចកម្ពុជា ជាពិសេសបានជួយការងារកសិកម្ម ដោយបើកឱកាសសម្រាប់ទំនាក់ទំនងរវាងអ្នកលក់ទាំងក្នុងស្រុក និងក្រៅស្រុកជាមួយ កសិករ។
សូមបញ្ជាក់ថា ពិព័រណ៍អន្តរជាតិជាសេរីនៅកម្ពុជាឆ្នាំ២០២៤រៀបចំឡើងដោយក្រុមហ៊ុន Minh Vi Exhibition and Advertising Services Co., Ltd (VEAS) ចាប់ផ្តើមពីថ្ងៃទី២៨ ដល់ថ្ងៃទី៣០ខែសីហា ឆ្នាំ២០២៤។ ដោយមានការគាំទ្រពីក្រសួងពាណិជ្ជកម្ម ក្រសួងកសិកម្ម រុក្ខាប្រមាញ់ និងនេសាទ ក្រសួងសុខាភិបាល សមាគមពាណិជ្ជកម្មកម្ពុជា សមាគមអ្នកចិញ្ចឹមសត្វកម្ពុជា (CLRA) សមាគមសហព័ន្ធកសិករកម្ពុជា (CFAP)សមាគមអ្នកចិញ្ចឹមវារីវប្បកម្មកម្ពុជា(CAA) សម្ព័ន្ធសហប្រតិបត្តិការកសិកម្មកម្ពុជា (CACA) សមាគមជាងកាត់សក់ និងកែសម្ផស្សនៅកម្ពុជា សមាគមអភិវឌ្ឍន៍មន្ទីរពិសោធន៍វេជ្ជសាស្ត្រ (AMLD) សមាគមផលិតចំណីអាហារកម្ពុជា (CFMA) និងទីភ្នាក់ងារឯកទេស និងសមាគមផ្សេងទៀត៕