អគ្គនាយកដ្ឋានរដ្ឋបាល រៀបចំសេចក្តីណែនាំស្តីពីការប្រឡងប្រណាំងជើងឯក ក្នុងការផ្តល់សេវាសាធារណៈ នៅរដ្ឋបាលថ្នាក់ក្រោមជាតិ
ភ្នំពេញ៖ ងឱកាសអញ្ជើញផ្ដល់កិច្ចសម្ភាសន៍ ស្ដីពី «វឌ្ឍនភាពការងាររបស់ អគ្គនាយកដ្ឋានរដ្ឋបាល ក្រសួងមហាផ្ទៃ» នាថ្ងៃទី១២ ខែសីហា ឆ្នាំ២០២៤នេះ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានលើកឡើងថា ដើម្បីជំរុញការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព អគ្គនាយកដ្ឋានរដ្ឋបាល បាននឹងកំពុងរៀបចំសេចក្តីណែនាំស្តីពីការប្រឡងប្រណាំងជើងឯកក្នុងការផ្តល់សេវាសាធារណៈ នៅរដ្ឋបាលថ្នាក់ក្រោមជាតិ ដោយធ្វើការច្របាច់បញ្ចូលការប្រឡងប្រណាំងជើងឯកសេវាសង្គម និងការប្រឡងប្រណាំងការផ្តល់សេវារដ្ឋបាលតាមយន្តការច្រកចេញចូលតែមួយ។
ដោយឡែកសម្រាប់កិច្ចសហការជាមួយក្រសួងស្ថាប័ន និងដៃគូអភិវឌ្ឍន៍ ឯកឧត្ដម សួស ប្រាថ្នា បានមានប្រសាសន៍ថា សម្រាប់កិច្ចការនេះ អគ្គនាយកដ្ឋាន បាននិងកំពុងសហការជាមួយអង្គការយូនីសេហ្វនៅក្នុងការអនុវត្តអភិក្រមថ្នាក់ក្រោមជាតិ (Sub-National Approach) និងកិច្ចសហការជាមួយអង្គការភែ្លនអន្តរជាតិក្នុងការអនុវត្តគម្រោងលើកកម្ពស់ការគាំពារនិងការអភិវឌ្ឍកុមារតូច។
ឯកឧត្ដមបន្តថា ម្យ៉ាងវិញទៀត អគ្គនាយកដ្ឋានរដ្ឋបាលកំពុងតែដំណើរការសហការជាមួយនឹងធនាគារអភិវឌ្ឍន៍អាស៊ី ADB និងស្ថានទូតអូស្ត្រាលី (តាមរយៈ កម្មវិធីACCESS2) ដើម្បីរៀបចំអនុវត្តគម្រោង ការឆ្លើយតបទៅ នឹងអំពើហិង្សាផ្នែកយេនឌ័រ។
ទន្ទឹមនេះ អគ្គនាយកដ្ឋានរដ្ឋបាល បានសហការជាមួយក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន និងក្រសួងសាធារណការនិងដឹកជញ្ជូន ដើម្បីរៀបចំនិងអនុវត្តគម្រោងធ្វើឱ្យប្រសើរឡើងនៃការគ្រប់គ្រងសំរាម សំណល់រឹង និងសំណល់ប្លាស្ទិកនៅកម្ពុជា ក្រោមក្របខ័ណ្ឌ ហិរញ្ញប្បទានរបស់ធនាគារ ពិភពលោកនៅខេត្ត គោលដៅចំនួន៥ រួមមាន៖ ខេត្តសៀមរាប ខេត្តកណ្ដាល ខេត្តកំពង់ស្ពឺ ខេត្តបាត់ដំបង និងខេត្តព្រះសីហនុ ៕
