បាងកក៖ តុលាការធម្មនុញ្ញរបស់ប្រទេសថៃ នៅថ្ងៃពុធនេះ បានរំលាយគណបក្សប្រឆាំងដ៏សំខាន់មួយ ដោយសម្រេចថា កិច្ចខិតខំប្រឹងប្រែងរបស់ខ្លួន ដើម្បីធ្វើវិសោធនកម្មច្បាប់ ប្រឆាំងនឹងការបង្ខូចកេរ្តិ៍ឈ្មោះព្រះរាជវង្សានុវង្ស របស់ព្រះរាជាណាចក្រ បានបំពានរដ្ឋធម្មនុញ្ញ។
ចៅក្រមបានបោះឆ្នោតជាឯកច្ឆ័ន្ទ បញ្ជាឱ្យរំលាយគណបក្សចលនាឆ្ពោះទៅមុខ និងដាក់បម្រាមសមាជិកគណៈកម្មាធិការប្រតិបត្តិរបស់គណបក្សចំនួន ១១រូប មិនឱ្យធ្វើសកម្មភាពនយោបាយរយៈពេល ១០ឆ្នាំ។
តុលាការបានឲ្យដឹងថា យុទ្ធនាការរបស់គណបក្សដើម្បីធ្វើវិសោធនកម្មច្បាប់ប្រមាថព្រះមហាក្សត្រត្រូវបានចាត់ទុកថាជាការប៉ុនប៉ងធ្វើឱ្យខូចដល់របបរាជានិយមអាស្រ័យរដ្ឋធម្មនុញ្ញរបស់ប្រទេស។
សមាជិកសភាចំនួន៦រូបដែលពីមុនធ្វើជាសមាជិកក្រុមប្រឹក្សាប្រតិបត្តិរបស់គណបក្សដែលត្រូវបានរំសាយពេលនេះបានបាត់បង់ឋានៈជាសមាជិកសភារបស់ពួកគេ រួមទាំងអតីតមេដឹកនាំគណបក្ស លោក Pita Limjaroenrat និងលោក Chaithawat Tulaton ព្រមទាំងអនុប្រធានសភាលោក Padipat Suntiphada នេះបើយោងតាមសេចក្តីសម្រេចរបស់តុលាការ។
លោក Pita បានបញ្ជាក់បន្ទាប់ពីការសម្រេចថា ក្រុមនេះនឹងបន្តរបៀបវារៈនយោបាយរបស់ខ្លួន បើទោះបីជាអវត្តមានរបស់គាត់ក៏ដោយ ព្រោះព័ត៌មានលម្អិតនៃគណបក្សថ្មីនឹងត្រូវបានណែនាំនៅថ្ងៃសុក្រ។
ការរំលាយនេះបានធ្វើឡើងបន្ទាប់ពីគណៈកម្មាធិការរៀបចំការបោះឆ្នោតរបស់ប្រទេសបានដាក់ញត្តិទៅតុលាការធម្មនុញ្ញឱ្យរំសាយគណបក្ស Move Forward តាមសេចក្តីសម្រេចរបស់តុលាការដូចគ្នាកាលពីខែមករា ដែលបានបញ្ជាឱ្យគណបក្សនេះបញ្ឈប់កិច្ចខិតខំប្រឹងប្រែងក្នុងគោលបំណងលុបបំបាត់ ឬកែប្រែច្បាប់ប្រមាថព្រះមហាក្សត្រ។
ច្បាប់ស្តីពីការប្រមាថ ឬមាត្រា១១២ នៃក្រមព្រហ្មទណ្ឌ ចែងថា ជនណាបង្ខូចកេរ្តិ៍ឈ្មោះ ប្រមាថ ឬគំរាមកំហែងព្រះមហាក្សត្រ ព្រះមហាក្សត្រី ស្នងមរតក ឬរាជានុសិទ្ធិ ត្រូវផ្តន្ទាទោសដាក់ពន្ធនាគារពី ៣ឆ្នាំ ទៅ ១៥ឆ្នាំ។
គណបក្ស Move Forward បានលេចចេញជាគណបក្សធំជាងគេនៅក្នុងសភាជាន់ទាបនៃរដ្ឋសភាក្នុងការបោះឆ្នោតសកលរបស់ប្រទេសថៃកាលពីឆ្នាំមុន ប៉ុន្តែបេក្ខភាពនាយករដ្ឋមន្ត្រីរបស់ខ្លួនបានបរាជ័យក្នុងការទទួលបានការគាំទ្រភាគច្រើនពីសមាជិកសភា។ 
