បង្ក្រាប និងឃាត់ខ្លួនអ្នកលេងល្បែង ស៊ីសង ជល់មាន់ ៧នាក់ និងវត្ថុតាងមួយចំនួន នៅចំណុចព្រៃខ្មោច ក្នុងភូមិសាស្រ្តស្រុកត្បូងឃ្មុំ
ភ្នំពេញ៖ កម្លាំងជំនាញការិយាល័យព្រហ្មទណ្ឌ នៃស្នងការដ្ឋាននគរបាលខេត្តត្បូងឃ្មុំ បានចុះបង្ក្រាប និងឃាត់ខ្លួនអ្នកលេងល្បែង ស៊ីសងខុសច្បាប់(ជល់មាន់) បានចំនួន ៧ នាក់ និងវត្ថុតាងមួយចំនួន នៅចំណុចព្រៃខ្មោច ស្ថិតនៅភូមិធ្នង់ ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ ។
ដោយអនុវត្តតាមបទបញ្ជាដ៏ម៉ឺងម៉ាត់ របស់ឯកឧត្តម ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ និងដោយមានការបញ្ជាដឹកនាំផ្ទាល់ពីលោកឧត្តមសេនីយ៍ទោ ចិន នី ស្នងការ នៃស្នងការដ្ឋាននគរបាលខេត្ត បានចាត់លោកវរសេនីយ៍ឯក អ៊ាង ពិសិដ្ឋ ស្នងការរង ទទួលដឹកនាំការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងជំនាញការិយាល័យនគរបាលព្រហ្មទណ្ឌកម្រិតស្រាល នៅថ្ងៃទី៤ ខែសីហា ឆ្នាំ២០២៤ វេលាម៉ោង ១០: ២០នាទី ចុះល្បាតក្នុងភូមិសាស្រ្ដស្រុកត្បូងឃ្មុំ ប្រទះឃើញទីតាំងលួចលេងល្បែងស៊ីសង(ជល់មាន់) នៅចំណុចព្រៃខ្មោច ស្ថិតនៅភូមិធ្នង់ ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ ដោយសមត្ថកិច្ច បានធ្វើការបង្ក្រាប ឃាត់ខ្លួនអ្នកលេងល្បែងបាន ចំនួន ០៧នាក់ និងវត្ថុតាងមួយចំនួន។
បើតាមរបាយការណ៍ របស់ លោកវរសេនីយ៍ឯក អ៊ាង ពិសិដ្ឋ ស្នងការរង ទទួលដឹកនាំការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត ដែលទូរទស្សន៍ជាតិត្បូងឃ្មុំ ទទួលបាន នៅថ្ងៃទី០៧ ខែសីហា ឆ្នាំ២០២៤នេះ បានឲ្យដឹងថា ដោយមានការសម្របសម្រួលពីលោកព្រះរាជអាជ្ញារង សួន ទី និងលោកឧត្តមសេនីយ៍ស្នងការនគរបាលខេត្ត បានឲ្យកម្លាំងសមត្ថកិច្ចយើង ធ្វើកិច្ចសន្យាអប់រំ បញ្ឈប់មិនឲ្យមានការលេងល្បែងស៊ីសង បន្តទៅទៀត និងបានឲ្យត្រឡប់ទៅមូលដ្ឋានវិញ។
គួបញ្ជាក់ផងដែរថា ការចុះល្បាតក្នុងភូមិសាស្រ្ដស្រុកត្បូងឃ្មុំ ប្រទះឃើញទីតាំងលួចលេងល្បែស៊ីសងខុសច្បាប់(ជល់មាន់) នៅចំណុចព្រៃខ្មោច ស្ថិតនៅភូមិធ្នង់ ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ សមត្ថកិច្ច បានធ្វើការបង្ក្រាប ឃាត់ខ្លួនអ្នកល្បែងបាន ចំនួន ៧នាក់ និងវត្ថុតាង រួមមាន៖ ១.ម៉ូតូចំនួន ១៤គ្រឿង, ២.បង់រុំមាន់មួយចំនួន, ៣.ជញ្ជីងថ្លឹងមាន់ចំនួនមួយ(១) , ៤.កន្រ្តក់ដាក់មាន់ ចំនួនមួយ(១), និង ៥.មាន់ចំនួន ២ក្បាល(ងាប់) ផងដែរ ៕
