សម្តេចធិបតី៖ សម័យនេះការអភិវឌ្ឍន៍ប្រទេស ឬទំនាក់ទំនងរបស់បុគ្គលណាមួយ មិនអាចរស់នៅដាច់ដោយឡែកបាននោះឡើយ
ភ្នំពេញ៖ សម្តេចមហាបវធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា សម័យនេះ ការអភិវឌ្ឍន៍ប្រទេស ឬទំនាក់ទំនងរបស់បុគ្គលណាមួយ គឺមិនអាចរស់នៅដាច់ដោយឡែកបាននោះឡើយ ។
ក្នុងឱកាសអញ្ជើញប្រគល់សញ្ញាបត្រជូននិស្សិតសាកលវិទ្យាល័យ ពុទ្ធិសាស្ត្រជិត៦០០នាក់ នាថ្ងៃទី៦ ខែសីហា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានបញ្ជាក់ថា «ទំនាក់ទំនងអ្នកជិតខាង យើងមិនអាចរស់នៅតែម្នាក់ឯងបានទេ សូម្បីតែតាបស់ចេញទៅសមាធិក្នុងព្រៃពេលខ្លះក៏គាត់ចេញទៅក្នុងភូមិទិញរបស់ដែរ។ សម័យនេះមិនអាចរស់នៅដាច់ដោយឡែកទេ បងប្អូនតែងតែមានទំនាក់ទំនងជាមួយមិត្តភក្តិ តែងតែមានទំនាក់ទំនងជាមួយអ្នកជិតខាង មានទំនាក់ទំនងជាមួយបងប្អូនបង្កើត សួរថាអ្នកទាំងអស់នោះ គ្រប់គ្នាស្មោះជាមួយយើងទេ? យើងសង្ឃឹម ប៉ុន្តែមិនប្រាកដទេ ត្រូវទេ?» ។
សម្តេចធិបតីគូសបញ្ជាក់បន្ថែមថា «គ្មានថ្នាក់ដឹកនាំប្រទេសណាមួយដែលឡើងមកនិយាយនៅទូទាំងពិភពលោក ថាខ្ញុំមិនធ្វើដើម្បីផលប្រយោជន៍ខ្ញុំជាតិខ្ញុំទេ ខ្ញុំធ្វើដើម្បីផលប្រយោជន៍មិត្ត គឺអត់ទេ សុទ្ធតែធ្វើអ្វីដើម្បីផលប្រយោជន៍ជាតិខ្លួនឯងទាំងអស់ កម្ពុជាក៏ដូចគ្នាដែរ គ្រាន់តែផលប្រយោជន៍ខ្លះវាអាចស៊ីសង្វាក់ជាមួយគ្នាដើម្បីរីកចម្រើន ប្រទាក់ក្រឡាមិត្តភក្តិ»។
សម្តេចធិបតី បានថ្លែងថា បើទោះបីជាខេត្តទាំង៤របស់កម្ពុជា បញ្ចូលទៅក្នុងកិច្ចសហប្រតិបត្តិការនេះក៏ដោយ ប៉ុន្តែការអភិវឌ្ឍន៍រយៈពេល២៥ឆ្នាំនៅក្នុងខេត្តទាំង៤ដែលស្ថិតនៅក្នុងតំបន់ត្រីកោណនេះ គឺជាថវិកាជាតិរបស់កម្ពុជា មិនមែនតាមរយៈថវិកាកិច្ចសហប្រតិបត្តិការនោះទេ។ រាជរដ្ឋាភិបាលកម្ពុជា មានម្ចាស់ការទៅលើអភិវឌ្ឍន៍តំបន់នេះ ហើយកម្ពុជានឹងបង្កើនសមត្ថភាព និងលទ្ធភាពរបស់ឃុំ សង្កាត់ ស្រុក ខេត្ត ដើម្បីកសាង និងពង្រឹងមូលដ្ឋានរបស់ខ្លួនឱ្យកាន់តែរឹងមាំ៕
