ឯកឧត្តមរដ្ឋមន្ត្រី ហេង សួរ ចូលរួមអបអរសាទរខួបទី ៩ នៃការបង្កើតសមាគមសហព័ន្ធ សិស្ស និស្សិត អប់រំបណ្តុះបណ្តាលបច្ចេកទេស និងវិជ្ជាជីវៈ (ក្រុម ១៨)

ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានអញ្ជើញចូលរួមអបអរសាទរខួបទី ៩ នៃការបង្កើតសមាគមសហព័ន្ធ សិស្ស និស្សិតអប់រំបណ្តុះបណ្តាលបច្ចេកទេស និងវិជ្ជាជីវៈ (ក្រុម ១៨) នៅល្ងាចថ្ងៃទី០១ ខែសីហា ឆ្នាំ២០២៤ នៅវិទ្យាស្ថានជាតិបណ្តុះបណ្តាលបច្ចេកទេស (NTTI)។

ក្នុងឱកាសនោះ ឯកឧត្តមរដ្ឋមន្ត្រី ហេង សួរ បានលើកឡើងថាក្រុម ១៨ នេះត្រូវបានបង្កើតឡើងនៅថ្ងៃទី០១ ខែសីហា ឆ្នាំ២០១៥ រហូតមកដល់ថ្ងៃទី០១ សីហា ឆ្នាំ២០២៤ នេះ ក្រុម ១៨ មានអាយុ ៩ឆ្នាំ ហើយ។ បច្ចុប្បន្ន សមាគមសហព័ន្ធសិស្ស-និស្សិតអប់រំបណ្ដុះបណ្ដាលបច្ចេកទេស និងវិជ្ជាជីវៈ (ក្រុម១៨) មាន ឯកឧត្តម ហេង សួរ ជាប្រធានសមាគម និងមានសាខាសមាគមចំនួន២៤ ក្នុងរាជធានី ខេត្តចំនួន១៦ ព្រមទាំងមានសមាជិក សមាជិកាសុរបចំនួន ៨.៧៩៦នាក់ (ស្រីចំនួន ២.៤១២នាក់)។

គួរបញ្ជាក់ផងដែរថា សមាគមសហព័ន្ធសិស្ស-និស្សិតអប់រំបណ្តុះបណ្តាលបច្ចេកទេស និងវិជ្ជាជីវៈ (ក្រុម ១៨) បង្កើតឡើងក្នុងគោលបំណងដូចជា ដើម្បីរឹតចំណងសាមគ្គីភាពរវាងសិស្ស និស្សិត អតីតសិស្សផ្នែកអប់រំបណ្ដុះបណ្ដាលបច្ចេកទេស និងវិជ្ជាជីវៈទាំងក្នុង និងក្រៅប្រទេស និងរវាងសហព័ន្ធសិស្ស-និស្សិតនៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ, ការផ្ដល់សេវាគាំទ្រ និងប្រឹក្សាយោបល់អតីតសិក្ខាកាម សិស្ស និងនិស្សិត ផ្នែកអប់រំបណ្ដុះបណ្ដាលបច្ចេកទេស និងវិជ្ជាជីវៈ, បណ្ដុះបណ្ដាលនូវសីលធម៌ និងគំនិតច្នៃប្រឌិត និងវិទ្យាសាស្ដ្រជឿនលឿន, ចែករំលែកបទពិសោធន៍ការងារ តម្រង់ទិសវិជ្ជាជីវៈដល់សិស្ស និងនិស្សិតដែលជាសមាជិក និងសិស្សានុសិស្សតាមគ្រឹះស្ថានអប់រំ និងយុវជនទូទៅ, ការចូលរួមសកម្មភាពមនុស្សធម៌ និងការងារស្ម័គ្រចិត្តនានាសំដៅបម្រើដល់ប្រយោជន៍សង្គម និងលើកកម្ពស់វប្បធម៌របស់ខ្មែរ, សហប្រតិបត្តិការជាមួយភាគីពាក់ព័ន្ធទាំងក្នុង និងក្រៅប្រទេសដែលមានគោលបំណងក្នុងការលើកម្ពស់ និងលើកទឹកចិត្តដល់អ្នកដែលបានរៀនផ្នែកអប់រំបណ្ដុះបណ្ដាលបច្ចេកទេស និងវិជ្ជាជីវៈ, ចូលរួមដោះស្រាយសម្ភារៈសិក្សា និងថវិកា ដល់សិស្ស-និស្សិតក្រីក្រដែលកំពុងសិក្សានៅក្នុងគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ រួមនិងការផ្ដល់រង្វាន់លើកទឹកចិត្តដល់ សិស្ស-និស្សិតដែលរៀនពូកែផងដែរ ៕