កងកម្លាំងអន្តរាគមន៍ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រៀមខ្លួនរួចជាស្រេច ជួយសង្គ្រោះពលរដ្ឋ ពេលទឹកជំនន់នៅតាមដងស្ទឹងសែន ឈានដល់កម្រិតប្រកាសអាសន្ន
ភ្នំពេញ៖ នៅថ្ងៃទី២៩ ខែកក្កដា ឆ្នាំ២០២៤ នៅទីបញ្ជាការតំបន់ប្រតិបត្តិការសឹករងកំពង់ធំ បានប្រកាសអាសន្ន ត្រួតពិនិត្យកងកម្លាំងអន្តរាគមន៍ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដើម្បីត្រៀមជួយសង្គ្រោះប្រជាពលរដ្ឋ ដែលរងផលប៉ះពាល់ដោយគ្រោះទឹកជំនន់នៅក្នុងភូមិសាស្ត្រខេត្តកំពង់ធំ ក្នុងពេលដែលជំនន់ទឹកភ្លៀងឡេីងលេីសកម្រិតប្រកាសអាសន្ន ដែលកិច្ចប្រជុំត្រួតពិនិត្យនេះ ស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ ។
ឧត្តមសេនីយ៍ទោ សោម ស៊ុន បានបញ្ជាក់ថា គិតត្រឹមថ្ងៃទី២៩ ខែកក្កដា ឆ្នាំ២០២៤នេះ កម្រិតកម្ពស់ទឹកនៅតាមដងស្ទឹងសែន នៅស្ថានីយ៍ក្រុងស្ទឹងសែន ខេត្តកំពង់ធំ មានកម្ពស់១៣,៦៣ម៉ែត្រ លើកម្រិតប្រកាសអាសន្ន១៣.៥០ម៉ែត្រ ដូច្នេះទឹកបានឡើងលើសកម្រិតប្រកាសអាសន្ន កម្ពស់ ១៣សង់ទីម៉ែត្រ ហើយជាមួយនោះដែរ រដ្ឋបាលខេត្តកំពង់ធំ បានចេញលិខិតជូនដំណឹងដល់ប្រជាពលរដ្ឋទាំងអស់ នៅក្នុងខេត្តកំពង់ធំ ឲ្យមានការប្រុងប្រយ័ត្នខ្ពស់ ក្នុងពេលដែលកម្រិតទឹកតាមដងស្ទឹងសែន ឈានដល់លើសកម្រិតប្រកាសអាសន្ន ដើម្បីឲ្យប្រជាពលរដ្ឋគ្រប់រូប មានការប្រុងប្រយ័ត្នខ្ពស់ ទាំងការថែរក្សាអាយុជីវិត និងការថែរក្សាទ្រព្យសម្បត្តិ ទទ្ទឹមនិងនេះផងដែររដ្ឋបាលខេត្តកំពង់ធំ ក៏បានប្រកាសឲ្យអាជ្ញាធរដែនដីគ្រប់លំដាប់ថ្នាក់ពិសេសភូមិសាស្ត្រនៅតាមបណ្ដោយដងស្ទឹងសែន ត្រូវរៀបចំប្រុងប្រៀបទីទួលសុវត្ថិភាព ជូនប្រជាពលរដ្ឋស្នាក់នៅ ដើម្បីជៀសផុតពីគ្រោះថ្នាក់ផ្សេងៗ ជាយថាហេតុ ។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានណែនាំដល់កងកម្លាំងអន្តរាគមន៍ទាំងអស់ទាំងនៅថ្នាក់ខេត្ត និងនៅតាមបណ្តាក្រុងស្រុក ត្រូវត្រៀមបម្រុងកម្លាំង២៤ម៉ោងលើ២៤ម៉ោង ដើម្បីជួលសង្គ្រោះប្រជាពលរដ្ឋ ដែលរងផលប៉ះពាល់ដោយគ្រោះទឹកជំនន់ នៅតាមមូលដ្ឋាននានា តាមបទបញ្ជារបស់ឯកឧត្តមមេបញ្ជាការរងកងទ័ពជេីងគោក មេបញ្ជាការយោធភូមិភាគទី៤ និងបទបញ្ជារបស់ឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ឲ្យទាន់ពេលវេលាននិងមានប្រសិទ្ធភាព ។
លោកវរសេនីយ៍ទោ សៀង ហុកឃាន់ តំណាងឱ្យនាយទាហាន នាយទាហានរង និងពលទាហាន ក្នុងកងអន្តរាគមន៍ទាំងអស់ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានប្តេជ្ញាចិត្តដាច់ខាតគោរពអនុវត្តន៍តាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ ឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្ត និងបទបញ្ជារបស់មេបញ្ជាការតំបន់ប្រតិបត្តិការសឹករងកំពង់ធំ ឲ្យមានប្រសិទ្ធភាព និងទទួលបានជោគជ័យ ដេីម្បីប្រជាជន ៕
