ក្រសួងមុខងារសាធារណៈ រៀបចំកិច្ចប្រជ៉ំក្រសួង ស្ថាប័ន ដោយឡែកៗពីគ្នា ដើម្បីពិភាក្សា ពិគ្រោះយោបល់លើវឌ្ឍនភាពការងារវិភាគមុខងារ
ភ្នំពេញ៖ ការងារពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង ស្ថាប័ន បាននឹងកំពុងដំណើរការជាបន្តបន្ទាប់ជារៀងរាល់ថ្ងៃ ក្នុងដំណាក់កាលពេលនេះ ក្រសួងមុខងារសាធារណៈ រៀបចំកិច្ចប្រជុំជាមួយក្រសួង ស្ថាប័ននានា ដោយឡែកៗពីគ្នាដើម្បីពិនិត្យមើលរបាយការណ៍ដែលក្រសួង ស្ថាប័ន បានផ្តល់មក ក្នុងគោលដៅពិគ្រោះយោបល់ ក៏ដូចជាចែករំលែកព័ត៌មានជូនគ្នាទៅវិញទៅមក ហើយសិក្សាពីស្ថានភាពជាក់ស្តែង ការប្រឈម និងវឌ្ឍនភាពការងារឆ្ពោះទៅមុខ។
កិច្ចប្រជុំនីមួយៗ ត្រូវបានដឹកនាំដោយ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ ដោយមានការអញ្ជើញចូលរួមពីថ្នាក់ដឹកនាំនៃក្រសួង ស្ថាប័ននីមួយៗ ព្រមទាំងតំណាងក្រសួងសេដ្ឋកិច្ច និងហិរញ្ញវត្ថុ តំណាងទីស្តីការគណៈរដ្ឋមន្ត្រី តំណាងក្រសួងមហាផ្ទៃ និងថ្នាក់ដឹកនាំ ក្រុមការងារទទួលបន្ទុកផែននីមួយៗនៃការងារវិភាគមុខងាររបស់ក្រសួងមុខងារសាធារណៈ។
មានប្រសាសន៍ជារឿយៗនៅក្នុងកិច្ចប្រជុំនីមួយៗ ឯកឧត្តមរដ្ឋលេខាធិការប្រចាំការ តែងតែបានលើកឡើងថា ជាទស្សនវិស័យរួមរបស់រាជរដ្ឋាភិបាល ការងារការវិភាគមុខងារនេះ គឺជាការពិនិត្យខ្លួនឯងឡើងវិញ អំពីចំណុចខ្លាំង ឬខ្សោយ ឬក្នុងករណីមានការខ្វះចន្លោះត្រង់កន្លែងណាមួយ ឬក៏ក្នុងករណីមានបញ្ហាប្រឈមណាដែលយើងអាចដោះស្រាយបានភ្លាមៗ។
ឯកឧត្តមរដ្ឋលេខាធិការប្រចាំការ ក៏បានរម្លឹកផងដែរថា អ្វីដែលយើងបាន និងកំពុងអនុវត្តនាពេលនេះ គឺស្របតាមអនុសាសន៍ដឹកនាំដ៏ខ្ពង់ខ្ពស់របស់ សម្តេចមហាបវរធិបតី ក្នុងស្មារតីរៀបចំផ្ទះរបស់យើងឱ្យបានស្អាត និងមានរបៀបរៀបរយ ហើយក៏ជាការចូលរួមចំណែកនៅក្នុងបេសកកម្មកែទម្រង់រដ្ឋបាលសាធារណៈ ដែលជាការងារអាទិភាពគន្លឹះ មានចែងក្នុងយុទ្ធសាស្ត្របញ្ចកោណ របស់រាជរដ្ឋាភិបាល នីតិកាលទី៧ នៃរដ្ឋសភា៕
