នាយឧត្តមសេនីយ៍ សែម សុវណ្ណនី អញ្ជើញបិទវគ្គហ្វឹកហ្វឺន ជំនាញអាវុធហត្ថសម្រាប់ចេញទៅ បំពេញបេសកកម្មអង្គការសហប្រជាជាតិ

ភ្នំពេញ៖ នៅថ្ងៃទី៥ ខែកក្តដា ឆ្នាំ២០២៤ នៅមជ្ឈមណ្ឌលជាតិរក្សាសន្តិភាព ឯកឧត្តម នាយឧត្តមសេនីយ៍ សែម សុវណ្ណនី អនុប្រធានទី១គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព និងឯកឧត្តម ហ្វាប្រីស អេចេន (Fabrice Étienne) ទីប្រឹក្សាទី១ អមស្ថានទូតបារាំងប្រចាំកម្ពុជា ជាអធិបតីដ៏ខ្ពង់ខ្ពស់ ក្នុងពិធីបិទវគ្គហ្វឹកហ្វឺនជំនាញអាវុធហត្ថសម្រាប់ចេញទៅបំពេញបេសកកម្មអង្គការសហប្រជាជាតិ។

ហ្វឹកហ្វឺនខាងលើនេះ បានចំណាយពេលជិត ៤សប្តាហ៍(ចាប់ពីថ្ងៃទី១១ ខែមិថុនា ដល់ថ្ងៃទី៤ ខែកក្កដា ឆ្នាំ២០២៤) ដោយផ្តោតសំខាន់លើ ច្បាប់ បទបញ្ញត្តិ ក្រមសីលធម៌ រចនាសម្ព័ន្ធចាត់តាំងនានា ទាំងក្នុងតំបន់ប្រតិបត្តិការផ្ទាល់ និងនៅទីបញ្ជាការធំ របស់ អ.ស.ប ជាពិសេស បង្កើនការយល់ដឹងអំពីកាតព្វកិច្ច តួនាទី ទំនួលខុសត្រូវរបស់កងរាជអាវុធហត្ថ និងមេរៀនសំខាន់ៗ ដូចជា ប្រវត្តិរបស់ស៊ូដង់ខាងត្បូង ប្រវត្តិបេសកកម្ម UNMISS ជំនាញអន្តរាគមន៍លើជនបង្ក ឬជនសង្ស័យ របៀបផ្តិតយកក្រយ៉ៅដៃ ច្បាប់ប្រើប្រាស់កម្លាំងប្រដាប់អាវុធទប់ទល់សកម្មភាពអរិភាព (ROE) បច្ចេកទេសទប់ទល់បាតុករ ក្រមសីលធម៌អ្នកពាក់មួកខៀវ បទដ្ឋានប្រតិបត្តិការតាមបែបគតិយុត្តិរបស់អាវុធហត្ថ កិច្ចព្រមព្រាងរវាងសាមីប្រទេស និង អ.ស.ប ច្បាប់មនុស្សធម៌អន្តរជាតិ ច្បាប់ចរាចរណ៍ផ្លូវគោក ការប្រមូលភស្តុតាងនៅកន្លែងកើតហេតុបទល្មើសឧក្រិដ្ឋ បច្ចេកទេសគ្រប់គ្រងហ្វូងមនុស្ស/បាតុករ និតិវិធីឆែកឆេមនុស្ស និងរថយន្ត អនុវត្តលើទីលានអំពីការទប់ទល់ហ្វូងបាតុករ គូសគំនូសក្រូគីពីគ្រោះថ្នាក់ចរាចរណ៍ និតីវិធីស្គាល់ពីឥទ្ធិពលរំសេវផ្ទុះនីតិវិធីសង្គ្រោះបឋម SOP – 150 (ការណែនាំអំពីបទប្បញ្ញត្តិសម្រាប់បុគ្គលិកទាំងអស់ដែលបម្រើការជាប៉ូលីសយោធានៅក្នុង UNMISS) និងSOP 152: (ការឃាត់ខ្លួន ឃុំខ្លួន)។ វគ្គហ្វឹកហ្វឺននេះ មានសិក្ខាកាមចូលរួមសរុបចំនួន ២៣នាក់ក្នុងនោះមាននារីចំនួន ១៣នាក់៕