សម្ពេច ម៉ែន សំអន វៀបចំពិធីបុណ្យ (ផ្កាសាមគ្គី) ដង្ហែយកទៅកសាង អគាររដ្ឋបាលសាលាគណ ខេត្តស្វាយរៀង
ភ្នំពេញ៖ នាថ្ងៃសុក្រ ៧រោច ខែជេស្ឋ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៨ ខែមិថុនា ឆ្នាំ២០២៤ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា បានផ្ដួចផ្ដើមបុណ្យ (ផ្កាសាមគ្គី) ដើម្បីប្រមូលបច្ច័យទៅកសាងអគាររដ្ឋបាល សាលាគណ ខេត្តស្វាយរៀង ស្ថិតក្នុងវត្តជម្ពូព្រឹក្សា សង្កាត់សង្ឃ័រ ក្រុងស្វាយរៀង ខេត្តស្វាយរៀង ដែលពិធី នេះបានរៀបចំឡើងនៅវត្តទួលទំពូង ស្ថិតក្នុងសង្កាត់ទួលទំពូងទី១ ខណ្ឌចំការមន រាជធានីភ្នំពេញ។
បុណ្យផ្កាដែលធ្វើដោយមានផ្កាជាសក្ការៈនោះមានពីរបែប គឺ៖
១-បុណ្យផ្ការុក្ខជាតិ និងផ្កាវារីជាតិគឺគេបេះតែផ្កា ឈើ និងផ្កាឈូកថ្វាយព្រះពុទ្ធរូប
២-បុណ្យផ្កាប្រាក់គឺគេសន្មតប្រាក់ថាជាផ្កាបវារណាចំពោះព្រះដើម្បីសាងថាវរវត្ថុអ្វីមួយ។
ប្រទេសកម្ពុជាយើង សម័យបុរាណពុទ្ធបរិស័ទទាំងឡាយទាំងព្រះរាជាទាំងប្រជារាស្ត្រ ទ្រង់ តែងតែប្រារព្ធធ្វើបុណ្យរុក្ខជាតិនិងផ្កាវារីជាតិដោយយកផ្កាចងក្រងហើយ ហែយកទៅថ្វាយព្រះពុទ្ធនៅ ព្រះវិហារវត្តណាមួយដែលនៅជិត។ ព្រះរាជាតែងទ្រង់ធ្វើនៅខែវស្សា គឺនៅថ្ងៃ១៥កើត ខែស្រាពណ៍ ដោយទ្រង់ ស្ដេចយាងទៅក្រសាល តាមបឹង តាមព្រះទីន័ង នាវា ទ្រង់ ព្រះរាជបញ្ជាឲ្យបេះផ្កាឈូកស ឈូកក្រហម ព្រលិត លំចង់ ស្បង្ក័ជ យកមកថ្វាយព្រះ ក្នុងព្រះរាជមន្ទីរ ហើយទ្រង់ចាត់ឲ្យហែហម ដោយក្បួន ហែដ៏មហោឡារិក យកទៅថ្វាយ ព្រះពុទ្ធរូបគ្រប់វត្តអារាម ដែលនៅជិតព្រះបរមរាជវាំង។
ប៉ុន្តែ សព្វថ្ងៃដោយគេយល់ថា វត្តអារាមនីមួយៗតែងកសាងទីសេនាសនៈ ដូច្នេះ ទើបនិយមយក លុយមកចងក្រងជាផ្ការួចបានវេរប្រគេនដល់ព្រះសង្ឃ ហើយបុណ្យផ្កា ប្រាក់នេះគេទុកថា ជាបុណ្យ ធំមួយព្រះ គេបានរួមបច្ច័យកសាងថា វរវត្ថុផ្សេងៗទាំងខាងពុទ្ធចក្រ និងអាណាចក្រ អាចធ្វើជា ប្រយោជន៍ដ៏ធំធេងសម្រាប់ធ្វើជាទីសេនាសនៈផ្សេងៗបានឈ្មោះថាធ្វើឲ្យសាសនារុងរឿងតទៅទៀតផង ៕
