អភិបាលខេត្តស្ទឹងត្រែង ថ្លែងថាការប្រារព្ធទិវាអន្តរជាតិប្រយុទ្ធប្រឆាំង គ្រឿងញៀនខុសច្បាប់ មានគោលបំណង និងទិសដៅសំខាន់ៗ៦ចំណុច

ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត នាព្រឹកថ្ងៃទី២៦ ខែមិថុនា ឆ្នាំ២០២៤នេះ បានប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ២០២៤ ។

ឯកឧត្ដម ស្វាយ សំអ៊ាង បានមានប្រសាសន៍ថា មុននេះបន្តិច យើងទើបតែបានស្តាប់សារលិខិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា អានដោយ លោកជំទាវ ឧត្តមសេនីយ៍ឯក ជ័យ បុប្ផា អគ្គលេខាធិការរង នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន ដោយបានគូស បញ្ជាក់យ៉ាងច្បាស់ពីភាពចាំបាច់ដ៏មានសារៈសំខាន់ នៃការប្រារព្ធទិវាអន្តរជាតិប្រយុទ្ធប្រឆាំងគ្រឿង ញៀនថ្ងៃទី២៦ ខែមិថុនា ជារៀងរាល់ឆ្នាំ កន្លងមកនេះ គឺដើម្បីចូលរួមជាមួយពិភពលោកក្នុងការប្រយុទ្ធប្រឆាំងគ្រឿងញៀន ស្របតាមស្មារតី នៃអនុសញ្ញា និងពិធីសារស្តីពីគ្រឿងញៀនរបស់អង្គការ សហប្រជាជាតិ ដែលកម្ពុជាជាហត្ថលេខី និយាយជារួមក្នុងក្របខ័ណ្ឌជាសកល និងនិយាយដោយឡែក ក្នុងក្របខ័ណ្ឌជាតិ គឺដើម្បីណែនាំ ជំរុញ និងរំលឹកដល់ក្រសួង ស្ថាប័ន អាជ្ញាធរមានសមត្ថកិច្ច និងអ្នកពាក់ព័ន្ធនឹងបញ្ហាគ្រឿងញៀនទាំងអស់ ត្រូវយកចិត្តទុកដាក់អនុវត្តការងារប្រយុទ្ធប្រឆាំងគ្រឿង ញៀន ក្នុងដែនសមត្ថកិច្ចរបស់ខ្លួន ដោយឈរលើភាពម្ចាស់ការ និងស្មារតីទទួលខុសត្រូវខ្ពស់ ទាំង ក្នុងការងារអនុវត្តច្បាប់ ការងារផ្សព្វផ្សាយអប់រំ ការងារព្យាបាលស្តារនីតិសម្បទា និងសមាហរណកម្ម អ្នកញៀនគ្រឿងញៀន ពិសេសចំពោះការអនុវត្តខ្លឹមសារប្រធានបទរបស់អង្គការសហប្រជាជាតិ និង ប្រធានបទជាតិ ដែលបានដាក់ចេញប្រចាំឆ្នាំ។

ឯកឧត្ដមប្រធានគណៈកម្មាធិការត្រួតពិនិត្យគ្រឿងញៀនខេត្ត បញ្ជាក់ថា ក្នុងន័យនេះ ការប្រារព្ធទិវាអន្តរជាតិប្រយុទ្ធប្រឆាំង គ្រឿងញៀនខុសច្បាប់ មានគោលបំណង និងទិសដៅដូចខាងក្រោម៖

១. លើកកម្ពស់ការយល់ដឹងអំពីគ្រោះថ្នាក់នៃការប្រើប្រាស់គ្រឿងញៀន និងការជួញដូរខុស ច្បាប់ ឈានទៅបង្ការ ទប់ស្កាត់ការប្រើប្រាស់គ្រឿងញៀន និងកាត់បន្ថយតម្រូវការគ្រឿង ញៀនខុសច្បាប់។

២. លើកទឹកចិត្តបុគ្គលម្នាក់ៗឱ្យទទួលយករបៀបរស់នៅដែលមានសុខភាពល្អ ដែលមិនពាក់ ព័ន្ធនឹងការប្រើប្រាស់គ្រឿងញៀន និងរបៀបរស់នៅដែលអាចកាត់បន្ថយបាននូវហានិភ័យ នៃការញៀនគ្រឿងញៀន។

៣. ធ្វើការពិនិត្យឡើងវិញ ដោយធ្វើការពង្រឹងគោលនយោបាយ និងច្បាប់ស្តីពីកាត្រួតពិនិត្យ គ្រឿងញៀននៅក្នុងប្រទេសនីមួយៗ ដើម្បីធានានូវប្រសិទ្ធភាពក្នុងការទប់ស្កាត់ការប្រើប្រាស់ និងជួញដូរគ្រឿងញៀន។

៤. ជួយជនរងគ្រោះដោយគ្រឿងញៀន តាមរយៈការផ្សព្វផ្សាយ និងផ្តល់លទ្ធភាពទទួលបាន សេវាព្យាបាល និងស្តារនីតិសម្បទាដោយសមស្រប។

៥. លើកទឹកចិត្តដល់កិច្ចសហការរវាងរាជរដ្ឋាភិបាល សង្គមស៊ីវិល និងអ្នកពាក់ព័ន្ធដទៃទៀត ដើម្បីដោះស្រាយបញ្ហាសកល នៃការប្រើប្រាស់គ្រឿងញៀន និងការជួញដូរគ្រឿងញៀន ខុសច្បាប់។ ផ្តល់នូវវេទិកា និងឱកាសមួយសម្រាប់អ្នកពាក់ព័ន្ធផ្សេងៗគ្នា ដើម្បីមករួមគ្នា ចែករំលែកគំនិត និងបង្កើតដំណោះស្រាយជុំវិញបញ្ហាគ្រឿងញៀន។

៦. លើកកម្ពស់ និងជំរុញកិច្ចសហប្រតិបត្តិការអន្តរជាតិរវាងប្រទេសនានាក្នុងការដោះស្រាយ ទប់ស្កាត់ និងបង្ក្រាបការជួញដូរគ្រឿងញៀន។

គោលដៅទាំងនេះមានសារៈសំខាន់ណាស់ក្នុងការធានាថាបុគ្គល ក្រុមគ្រួសារ សហគមន៍ និង បណ្តាប្រទេសនានាទូទាំងពិភពលោក អាចយកឈ្នះលើបញ្ហាប្រឈមនានាដែលបណ្តាលមកពីការ ប្រើប្រាស់គ្រឿងញៀន និងការជួញដូរគ្រឿងញៀនខុសច្បាប់។

ឯកឧត្ដម ស្វាយ សំអ៊ាង បានលើកឡើងថា គណៈកម្មាធិការត្រួតពិនិត្យគ្រឿងញៀនខេត្ត ជានិច្ចកាល តែងចុះអប់រំផ្សព្វផ្សាយដោយផ្ទាល់ ដល់ក្រុមគោលដៅ ដែលជាសិស្ស និស្សិត យុវជន យុវតី និងប្រជាពលរដ្ឋទូទៅ ព្រមជាមួយនិងការ ប្រើប្រាស់បណ្តាញផ្សព្វផ្សាយពត៌មាន តាមរយៈវិទ្យុ ទូរទស្សន៍ រួមនិងការប្រើប្រាស់បណ្តាញទំនាក់ ទំនងសង្គមនានា អំពីច្បាប់ស្តីពីការត្រួតពិនិត្យគ្រឿងញៀន ផលប៉ះពាល់ ក៏ដូចជាគ្រោះថ្នាក់ដែល បណ្តាលមកពីការប្រើប្រាស់គ្រឿងញៀន ដោយមានការចូលរួមសហការយ៉ាងសកម្មពីមន្ទីរ អង្គភាព ពាក់ព័ន្ធ អង្គការ-សមាគមជាតិ-អន្តរជាតិ និងវិស័យឯកជន ទៅតាមកម្រិតនៃការទទួលខុស ត្រូវ រៀងៗខ្លួន ៕