សម្តេចធិបតី៖ រាជរដ្ឋាភិបាល ដាក់ឲ្យអនុវត្តន៍គោលនយោបាយសំខាន់ៗ ក្នុងគោលដៅអនុវត្តន៍ និងធ្វើទំនើបកម្មឧស្សាហកម្ម ក្នុងការពង្រឹងវិស័យអប់រំ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបានគូសបញ្ជាក់ថា ការពង្រឹងវិស័យអប់រំ ជាពិសេសផ្នែកបច្ចេកវិទ្យាព័ត៌មានវិទ្យា រាជរដ្ឋាភិបាលបានដាក់ចេញឱ្យអនុវត្តន៍នូវគោលនយោបាយសំខាន់ៗ ក្នុងគោលដៅអនុវត្តន៍ និងធ្វើទំនើបកម្មឧស្សាហកម្ម តាមរយៈការកសាងនូវពលរដ្ឋឌីជីថល ដែលមានសមត្ថភាពទទួលយកបច្ចេកវិទ្យា និងដោយមានពុទ្ធិជាមូលដ្ឋាន ដែលក្នុងន័យនេះ ការផ្គត់ផ្គង់ធនធានមនុស្សដែលជាមូលធនមនុស្សមានសមត្ថភាពខ្ពស់ជាមួយនឹងចំណេះដឹងទូលំទូលាយនៅលើផ្នែកវិទ្យាសាស្ត្រ បច្ចេកវិទ្យា សារគមនាគមន៍ និងនវានុវត្តន៍ គឺជាកត្តាចាំបាច់សម្រាប់ការអភិវឌ្ឍរបស់កម្ពុជា។
ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការនូវបណ្តាញសាកលវិទ្យាល័យសាយប័រកម្ពុជា នាថ្ងៃទី២៥ ខែមិថុនា ឆ្នាំ២០២៤ សម្តេចធិបតី ហ៊ុន ម៉ាណែត បានចូលរួមអបអរសាទរចំពោះការបង្កើតឡើងបណ្តាញសាកលវិទ្យាល័យសាយប័រកម្ពុជាប្រកបដោយភាពជោគជ័យ និងបានវាយតម្លៃខ្ពស់ចំពោះក្រសួងអប់រំ យុវជន និងកីឡា គណៈគ្រប់គ្រង សាស្ត្រាចារ្យ និងបុគ្គលិកទាំងអស់នៃបណ្តាញសាកលវិទ្យាល័យសាយប័រកម្ពុជា ដែលមកទល់ពេលនេះ មានសាកលវិទ្យាល័យចំនួន១២ បានចូលជាសមាជិក និងបានអភិវឌ្ឍន៍ទាំងផ្នែកហេដ្ឋារចនាសម្ព័ន្ធឌីជីថល ការអភិវឌ្ឍសមត្ថភាពមន្ត្រីពាក់ព័ន្ធ និងការផលិតមាតិការ និងខ្លឹមសារមេរៀនជាដើម។
សម្តេចធិបតីបានលើកទឹកចិត្តដល់សាកលវិទ្យាល័យដទៃទៀត ឱ្យពិនិត្យលទ្ធភាពក្នុងការចូលរួមក្នុងបណ្តាញមួយនេះ ដើម្បីជាប្រយោជន៍ដល់ការសិក្សា និងការស្រាវជ្រាវរបស់សាស្ត្រាចារ្យ និងនិស្សិតរបស់យើង ។
សម្តេចធិបតី ក៏បានថ្លែងអំណរគុណយ៉ាងជ្រាលជ្រៅចំពោះដៃគូអភិវឌ្ឍន៍ ដែលបានជួយជ្រោមជ្រែងដល់ការបង្កើត និងកិច្ចដំណើរការនៃបណ្តាញសាកលវិទ្យាល័យសាយប័រកម្ពុជាតាំងពីដំណាក់កាលដំបូង រហូតមកដល់ថ្ងៃសម្ពោធជាផ្លូវការនាពេលនេះ និងទៅអនាគត។ សម្តេចធិបតីនាយករដ្ឋមន្ត្រីបានបន្ដថា គុណភាពនៃធនធានមនុស្ស គឺជាកត្តាកំណត់នៃ គុណភាព និងសមត្ថភាពនៃប្រទេសរបស់យើងក្នុងការអភិវឌ្ឍ និងការប្រកួតប្រជែងប្រកបដោយចីរភាព។ ដូចគ្នានេះ គុណភាពនៃការអប់រំ បណ្តុះបណ្តាល គឺជាកត្តាគន្លឹះនៃគុណភាពរបស់ធនធានមនុស្ស ដែលយើងអាចនិយាយបានថា គុណភាពនៃការបណ្តុះបណ្តាល គឺជាកត្តាគន្លឹះមួយយ៉ាងសំខាន់សម្រាប់ការធានា និងការអភិវឌ្ឍ ព្រមទាំងការប្រកួតប្រជែងរបស់ប្រទេសជាតិ របស់យើង។
សម្តេចធិបតី បានលើកឡើងថា គម្លាតនៃខួរក្បាល និងគម្លាតនៃសមត្ថភាពរបស់មនុស្ស គឺងាយស្រួលនៅក្នុងការបិទប្រសិនបើជាមានឱកាសបានទទួលនូវការអប់រំដែលមានគុណភាពដូចគ្នាទោះជាចាប់ផ្តើមពីចំណុចខុសគ្នាលើកត្តាផ្សេងៗក៏ដោយ ដែលក្នុងន័យនេះសម្តេចតែងតែលើកឧទាហរណ៍ជាក់ស្តែងថា សិស្សម្នាក់មកពីគ្រួសារក្រីក្រនៅជនបទ មករៀននៅសាលាតិចណូមិនប្រាកដថា គាត់រៀនចាញ់សិស្សដែលមកពីគ្រួសារដែលមានជីវភាពធូរធានៅ ភ្នំពេញនោះទេ។
សម្ដេចធិបតី ហ៊ុន ម៉ាណែត បានអះអាងថា គម្លាតខួរក្បាល បើសិនជាផ្តល់នូវឱកាស និងមានការខិតខំប្រឹងប្រែងផងនោះ យើងអាចបិទក្នុងរយៈពេលដ៏ខ្លីបំផុត ហើយអ្វីដែលសំខាន់គឺត្រូវធ្វើយ៉ាងណាដើម្បីពង្រីកវិសាល ភាពនៃការអប់រំ ផ្តល់ឱកាសឱ្យនិស្សិតរបស់យើងនៅទូទាំងប្រទេសមានលទ្ធភាពទទួលបាននូវគុណភាពអប់រំ ព្រោះគុណភាពនៃការអប់រំ គឺជាកត្តាកំណត់នៃធនធានមនុស្ស និងជាកត្តាកំណត់ នៃការអភិវឌ្ឍថែមទៀតផង៕
