តុលាការសម្រេចឃុំខ្លួនសន្តិសុខសាលាមត្តេយ្យចាក់អង្រែលើ ក្រោយលេចធ្លាយវីដេអូជាប់ពាក់ព័ន្ធករណីរំលោភសេពសន្ថវៈលើកុមារី៣នាក់

ភ្នំពេញ៖ តុលាការសម្រេចឃុំខ្លួនបុរសជាសន្តិសុខសាលាមត្តេយ្យចាក់អង្រែលើ ក្រោយលេចធ្លាយវីដេអូជាប់ពាក់ព័ន្ធករណីរំលោភសេពសន្ថវៈលើកុមារី៣នាក់ ពោលគឺកាលពីកំលុងឆ្នាំ២០២២ និងឆ្នាំ២០២៣ នៅក្នុងបន្ទប់សាលាមត្តេយ្យចាក់អង្រែលើផ្លូវជាតិលេខ២ ភូមិតាគង់ សង្កាត់ចាក់អង្រែលើ ខណ្ឌមានជ័យ។

ជនសង្ស័យមានឈ្មោះថា សឿន លីដា ភេទប្រុស អាយុ៥៥ឆ្នាំ មានមុខរបរជាអ្នករត់ផាស់អាប់ និងសន្និសុខនៅសាលាមត្តេយ្យចាក់អង្រែលើ មានទីកន្លែងកំណើតនៅភូមិព្រៃធំ ឃុំក្បាលកោះ ស្រុកកៀនស្វាយ ខេត្តកណ្តាល និងមានទីលំនៅបច្ចុប្បន្នមុនពេលឃាត់ខ្លួនស្នាក់នៅក្នុងសាលាមត្តេយ្យចាក់អង្រែលើ ផ្លូវជាតិលេខ២ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ។

យោងតាមការបញ្ជាក់ពីសមត្ថកិច្ចបានឱ្យដឹងថា កាលពីឆ្នាំ២០២២ បុរសខាងលើបានលួងលោមក្មេងស្រីចំនួន០២នាក់៖ ទី១.ឈ្មោះ ឈ គ ឈ អាយុ១១ឆ្នាំ និងទី២.ឈ្មោះ ឈ គ រ អាយុ០៨ឆ្នាំ រួមភេទបានចំនួន០៥លើក តែមិនបានសម្រេច ក្នុងបន្ទប់ចំណុចកើតហេតុ ដោយជាថ្នូរនឹងប្រាក់ក្នុង០១លើក ចំនួនប្រាំពាន់រៀល រហូតដល់ឆ្នាំ២០២៣ ជនសង្ស័យឈ្មោះ សឿន លីដា បានលួងលោមក្មេងស្រីឈ្មោះ ស ស ផ ន ត អាយុ១៤ឆ្នាំ រួមភេទបានសម្រេចចំនួន០៩លើក ក្នុងបន្ទប់ចំណុចកើតហេតុ ជាថ្នូរនឹងប្រាក់ក្នុងមួយលើកៗចំនួនដប់ម៉ឺនរៀល និងបានថតឃ្លីបវីដេអូទុកក្នុងទូរសព្ទដៃទៀតផង។ បន្ទាប់មក ជនសង្ស័យបានបន្តលួងលោមក្មេងស្រីឈ្មោះ ថ ស ព អាយុ១៤ឆ្នាំ រួមភេទសម្រេចចំនួនមួយ លើក នៅក្នុងបន្ទប់ចំណុចកើតហេតុ ជាថ្នូរនឹងលុយចំនួនដប់បីម៉ឺនរៀល និងទូរសព្ទម៉ាកអាយហ្វូនពណ៌-ស ចំនួន០១គ្រឿង ដែលមានឃ្លីបវីដេអូជនរងគ្រោះឈ្មោះ ស ស ផ ន ត នៅខាងក្នុងនោះ។

លុះមកដល់ថ្ងៃទី០៤ ខែមិថុនា ឆ្នាំ២០២៤ មីងរបស់ក្មេងស្រីឈ្មោះ ថ ស ព យកទូរសព្ទរបស់ក្មេងមកបើកមើល ឃើញវីដេអូឃ្លីបជនសង្ស័យឈ្មោះ សឿន លីដា រួមភេទជាមួយជនរងគ្រោះឈ្មោះ ស សផនត និងបានយកឃ្លីបវីដេអូនោះមកឱ្យម្តាយជនរងគ្រោះឈ្មោះ ស សផនត មើល និងបានរាយការណ៍ទៅកាន់សមត្ថកិច្ចនាំខ្លួនជនសង្ស័យ ចាត់ការបន្តតាមនីតិវិធីច្បាប់តែម្ដង។

បច្ចុប្បន្នជនសង្ស័យខាងលើ ត្រូវបាន តុលាការសម្រេចឃុំខ្លួនជាបណ្ដោះអាសន្ននៅមណ្ឌលអប់រំកែប្រែទី១(ម១)៕