ឃុំខ្លួនក្មេងទំនើង ៦នាក់ ក្នុងចំណោមបក្ខពួក ៨នាក់ ពាក់ព័ន្ធករណីវាយបំផ្លាញម៉ូតូអ្នកដទៃ ដោយគ្មានមូលហេតុ
ភ្នំពេញ៖ អ្នកនាំពាក្យសាលាដំបូងខេត្តពោធិ៍សាត់បានឲ្យដឹងថា នៅថ្ងៃ ទី៦ ខែមិថុនា ឆ្នាំ២០២៤ សាលាដំបូងខេត្តពោធិ៍សាត់ បានទទួលចាត់ការលើសំណុំរឿងព្រហ្មទណ្ឌលេខ ៥៣០ ចុះថ្ងៃ ទី០៦ ខែមិថុនា ឆ្នាំ២០២៤ ដែលទាក់ទងនឹងក្មេងទំនើងមានគ្នា៨នាក់ បានជិះម៉ូតូ៣គ្រឿងធ្វើសកម្មភាពជាក្រុម ដេញ វាយបំផ្លាញម៉ូតូរបស់ជនរងគ្រោះ ដោយគ្រាន់តែជនរងគ្រោះជិះម៉ូតូកាត់មុខបក្សពួកខ្លួន ដែលកំពុងអង្គុយលេងនៅសួន ច្បារ១៤មករាគល់ស្ពានថ្ម រហូតដល់ភូមិអូរបាក្រងលើ សង្កាត់បន្ទាយដី ក្រុងពោធិ៍សាត់ ខេត្តពោធិ៍សាត់ កាលពីវេលា ម៉ោង១យប់រំលងអធ្រាត ថ្ងៃទី០៣ ខែមិថុនា ឆ្នាំ២០២៤ ។ ក្រោយពេលកើតហេតុ សមត្ថកិច្ចស្រាវជ្រាវឃាត់ខ្លួនជនដៃ ដល់និងបក្សពួកបានចំនួន៦នាក់ រត់គេចខ្លួនចំនួន២នាក់ ។
ក្មេងទំនើងទាំង៨នាក់ត្រូវបានតំណាងអយ្យការអមសាលា ដំបូងខេត្តពោធិ៍សាត់ ចោទប្រកាន់ពីពីបទ ធ្វើឲ្យខូចខាតដោយចេតនាមានស្ថានទម្ងន់ទោស ប្រព្រឹត្តនៅ ភូមិអូរបាក្រងលើ សង្កាត់បន្ទាយដី ក្រុងពោធិ៍សាត់ ខេត្តពោធិ៍សាត់ តាមបញ្ញត្តិមាត្រា៤១១ចំណុច១នៃក្រមព្រហ្មទណ្ឌ ។ បន្ទាប់ពីចៅក្រមស៊ើបសួរនៃសាលាដំបូងខេត្តពោធិ៍សាត់ បានពិនិត្យភស្តុតាងក្នុងសំណុំ និងសួរចម្លើយជនត្រូវ ចោទជាក្មេងទំនើងទាំង៦នាក់ គឺ៖
១.ឈ្មោះ ឆែម វ៉ាវីត ភេទប្រុស អាយុ១៧ឆ្នាំ មុខរបរមិនពិតប្រាកដ (មានខ្លួន), ២.ឈ្មោះ ម៉ម ប៊ុនសេង ភេទប្រុស អាយុ១៩ឆ្នាំ មុខរបរជាងភ្លើង(មានខ្លួន), ៣.ឈ្មោះ កៅ វាសនា ភេទប្រុស អាយុ១៥ឆ្នាំ មុខរបរជាងភ្លើង(មានខ្លួន), ៤.ឈ្មោះ មុំ ភារាក់ ភេទប្រុស អាយុ២០ឆ្នាំ មុខរបរនៅផ្ទះ (មានខ្លួន) ៥ ប៊ុត វឌ្ឍនៈបញ្ញា ភេទប្រុស អាយុ១៦ឆ្នាំ មុខរបរមិនពិតប្រាកដ (មានខ្លួន), ៦.ឈ្មោះ ម៉ាត់ គីរីន ភេទប្រុស អាយុ១៨ឆ្នាំ មុខមិនពិតប្រាកដ (មានខ្លួន) ។
ចៅក្រមស៊ើបសួរបានបង្គាប់ឲ្យឃុំខ្លួនក្មេងទំនើងទាំង៦នាក់ ពីបទធ្វើឲ្យខូចខាតដោយចេតនាមានស្ថានទម្ងន់ ទោស ប្រព្រឹត្តនៅភូមិអូរបាក្រងលើ សង្កាត់បន្ទាយដី ក្រុងពោធិ៍សាត់ ខេត្តពោធិ៍សាត់ តាមបញ្ញត្តិមាត្រា៤១១ចំណុច១នៃ ក្រមព្រហ្មទណ្ឌ នៅពន្ធនាគារខេត្តពោធិ៍សាត់ ដើម្បីចាត់សំណុំរឿងបន្តតាមនីតិវិធី ។
រីឯជនត្រូវចោទជាក្មេងទំនើងពីរនាក់ដែលរត់គេចខ្លួន ចៅក្រមស៊ើបសួរនឹងបង្គាប់ឲ្យស្វែងរកចាប់ខ្លួនមកទទួល ខុសត្រូវនូវទង្វើរបស់ខ្លួនតាមច្បាប់ ។
ចំពោះសកម្មភាពក្មេងទំនើង ដែលធ្វើអោយប៉ះពាល់ដល់សណ្តាប់ធ្នាប់សាធារណៈ និងភាពសុខសាន្តរបស់ ប្រជាពលរដ្ឋ តុលាការបាននឹងកំពុងបន្តអនុវត្តច្បាប់ដោយម៉ឺងម៉ាត់ និងតឹងរឹង ៕
