វិទ្យាស្ថានពហុបច្ចេកទេសភូមិភាគតេជោសែនឦសាន សហការជាមួយកម្មវិធីអភិវឌ្ឍន៍ជំនាញ SDP រៀបចំកិច្ចប្រជុំរវាងគ្រឹះស្ថាន អ.ប.វ និងវិស័យឯកជន ដើម្បីដាក់គម្រោងសំណើររួមគ្នាទៅមូលនិធិអភិវឌ្ឍន៏SDF

ភ្នំពេញ៖ នៅព្រឹកថ្ងៃព្រហស្បតិ៍ ១៥រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៦ ខែមិថុនា ឆ្នាំ២០២៤ លោក ភឹម ភីរ៉ា អភិបាលរងខេត្តក្រចេះ និងជាប្រធានPTB បានអញ្ជើញជាអធិបតីក្នុងកិច្ចប្រជុំពិភាក្សា ភាពជាដៃគូរវាងគ្រឹះស្ថានអប់រំបណ្ដុះបណ្ដាលបច្ចេកទេសវិជ្ជាជីវៈ និងវិស័យឯកជននានានៅក្នុងខេត្តក្រចេះ ដោយមានការចូលរួមពីមន្ទីរពាក់ព័ន្ធ អភិបាលក្រុងស្រុក មេឃុំ ចៅសង្កាត់ ដៃគូពាក់ព័ន្ធ សហគ្រាស សិស្ស និស្សិត ប្រមាណជាង៤៥០នាក់។

តាមរបាយការណ៍របស់ លោក អ៊ង់ គឹមភឿន នាយកវិទ្យាស្ថាន បានឲ្យដឹងថា នៅឆ្នាំ (២០១៦-២០២៤) វិទ្យាស្ថាន បានសហការណ៍ជាមួយអង្គការស្វីសខន់ថាក់ គម្រោងសម្បត្តិ និងជំនាញបន្ថែម ស្ទែមប្រកបដោយជោគជ័យដែលបានបង្កើនប្រាក់ចំណូល និងបង្កើតការងារសមរម្យសម្រាប់បុរស និងស្ត្រីមានការសម្របសម្រួលល្អប្រសើរ និងលក្ខណៈបរិយាបន្ន។ នៅក្នុងដំណាក់កាល៥ឆ្នាំចុងក្រោយវិទ្យាស្ថានបានសហការណ៍ជាមួយអង្គការស្វីសខន់ថាក់ គម្រោង សម្បត្តិ និង ជំនាញន្ថែមស្ទែម ធ្វើការ បណ្តុះបណ្តាលជំនាញបច្ចេកទេស និងវិជ្ជាជីវៈសរុបចំនួន ៤,៤៩៨នាក់ ស្រី ១,៥៦០នាក់ គម្រោងសម្បត្តិចំនួន ៨៩នាក់ ស្រី ៤៦នាក់ ជំនាញបន្ថែមស្ទែមចំនួន ៦០នាក់ ស្រី ៣៩នាក់ ហើយវិទ្យាស្ថានបានសហការណ៍ជាមួយក្រុមហ៊ុន សហគ្រាសក្នុងខេត្តបានចំនួន ១០៣ដៃគូរ។

លោក ភឹម ភីរ៉ា អភិបាលរងខេត្ត និងជាប្រធានPTB មានប្រសាសន៍ថា នៅក្នុងឆ្នាំ២០២៤នេះ វិទ្យាស្ថានទទួលភារកិច្ចបណ្តុះបណ្តាលជំនាញវិជ្ជាជីវៈ និងបច្ចេកទេសក្នុងកម្មវិធី 1.5M លើយុវជន មកពីគ្រួសារក្រីក្រ និងគ្រួសារងាយរងហានិភ័យ ដោយទទួលបានប្រាក់ឧបត្ថម្ភ២៨ម៉ឺនរៀលក្នុងមួយខែ រយៈពេលបួនខែ ដែលជាគំនិតផ្តួចផ្តើមប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ត្រូវអនុវត្តនៅក្នុងអាណត្តិទី៧នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។

លោកអភិបាលរងខេត្ត បានបន្តថា ក្រុមហ៊ុនសហគ្រាសឯកជនពិតជាដើរតួនាទីយ៉ាងសំខាន់ក្នុងសកម្មភាពជំរុញសេដ្ឋកិច្ចគ្រួសារសង្គមឲ្យកាន់តែមានប្រសិទ្ធភាព ជាពិសេសសម្រាប់យុវជននៅក្នុងខេត្ត ហើយវិស័យការងារបណ្ដុះបណ្ដាលវិជ្ជាជីវៈ គឺជាវិស័យមួយដែលបានយកចិត្តទុកដាក់ពីសំណាក់រាជរដ្ឋាភិបាលនៃព្រះរាជាណាចក្រកម្ពុជា វិស័យនេះបានជំរុញឲ្យមានការអភិវឌ្ឍន៍ ផ្នែកវិស័យឯកជននិងបានចូលរួមចំណែកធ្វើឲ្យមាន ការកើនឡើងនៃកំណើនសេដ្ឋកិច្ចជាតិ តាមរយៈកម្លាំងពលកម្មមានជំនាញនិងការីសហគ្រាសសិប្បកម្ម ភោជនីយ ដ្ឋានសណ្ឋាគារក្រុមហ៊ុនឯកជនមួយចំនួននៅក្នុងខេត្តក្រចេះ ហើយការរីកចម្រើនវិស័យឯកជនទាំងនេះវាអាស្រ័យទៅ លើដោយមានកម្លាំងពលកម្មមានធនធានមនុស្សប្រកប ដោយចំណេះដឹងនិងជំនាញពិតប្រាកដ នៅកិច្ចដំណើរការរបស់សហគ្រាសឲ្យមានសកម្មភាពរស់រវើកជានិរន្តប្រកបដោយជីរភាព ហើយប្រសិនបើគ្មានធនធានមនុស្សក៏គ្មានកំលាំងពលកម្ម តែបើមានកំលាំងហើយគ្មានជំនាញក៏មិនអាចធានាការផលិតបានដែរ ៕