ឆមាសទី១ ឆ្នាំនេះ នគរបាលខេត្តស្ទឹងត្រែង បង្ក្រាបបទល្មើសគ្រឿងញៀន ១៤លើក ឃាត់ខ្លួនជនសង្ស័យ ៣២នាក់ ដកហូតថ្នាំញៀនជាង ៣០០គីឡូក្រាម

ភ្នំពេញ៖ លោក សែន វ៉ាន់ស៊ីម អភិបាលរងខេត្តស្ទឹងត្រែង បានថ្លែងឲ្យដឹងថា ក្នុងឆមាសទី១ ឆ្នាំ២០២៤នេះ កម្លាំងជំនាញ នៃស្នងការនគរបាលខេត្ត បានធ្វើការបង្ក្រាបបទល្មើសគ្រឿងញៀនខុសច្បាប់ចំនួន ១៤លើក ឃាត់ខ្លួនជនសង្ស័យ ៣២នាក់ ដកហូតថ្នាំញៀនជាង ៣០០គីឡូក្រាម ។

ក្នុងកិច្ចប្រជុំស្ដីពីការពង្រឹងការគ្រប់គ្រងសណ្ដាប់ធ្នាប់សាធារណៈ និងក្មេងទំនើង ក្រោមអធិបតីភាពឯកឧត្ដម ស្វាយ សំអ៊ាង អភិបាលខេត្ត និងជាប្រធានគណៈបញ្ជាការឯកភាពរដ្ឋបាល ខេត្តស្ទឹងត្រែង នាព្រឹកថ្ងៃទី៥ ខែមិថុនា ឆ្នាំ២០២៤ លោក សែន វ៉ាន់ស៊ីម អភិបាលរងខេត្តស្ទឹងត្រែង បានលើកឡើងថា កម្លាំងជំនាញ នៃស្នងការនគរបាលខេត្ត បានធ្វើការបង្ក្រាបបទល្មើសគ្រឿងញៀនដោយខុសច្បាប់ ចំនួន ១៤លើកឃាត់ខ្លួនជនសង្ស័យ ៣២នាក់ ប្រុស ក្នុងនោះ៖ ចាប់យកវត្ថុតាងរួមមានៈ ថ្នាំញៀនប្រភេទមេតំហ្វេតាមីន (ICE) ទម្ងន់ ៣៣៩គីឡូ និង ១៨០.៣៧ក្រាម, ហេរ៉ូអ៊ុនទម្ងន់ ២០គីឡូ និង ៩៩២.៥៧ក្រាម, (MDMA) ទម្ងន់ ១១គីឡូ និង ៩៩១.៨៦ក្រាម, សារធាតុមិនច្បាស់ទម្ងន់ ៣៧គីឡូនិង ២១៧.៩២ក្រាម, ទូរស័ព្ទចំនួន ២២គ្រឿង រថយន្ត ០៣គ្រឿង, ម៉ូតូចំនួន ០៨គ្រឿង, គោយន្ត ០១គ្រឿង, ប្រាក់រៀល ២,០០០រៀល, កាំភ្លើង ០៣ដើម, ដាវ ០១ ដុំម៉ាស៊ីនថតXVR/DVR ០១គ្រឿង, បំពុងហ្គាស ០១, ០៣កាត និងឧបករណ៍ជក់មួយចំនួន រួចកសាងសំណុំរឿងបញ្ជូនទៅអយ្យការអមសាលាដំបូងខេត្ត ដើម្បីចាត់ការតាមនីតិវិធី។ ដោយឡែកនៅថ្ងៃទី២៥ ខែឧសភា ឆ្នាំ២០២៤ បង្ក្រាបគ្រឿងញៀនបានចំនួន ២៥៧គីឡូក្រាម Car ៤គ្រ និងមនុស្ស ៤នាក់ គ្រាប់បែកចំនួន ២គ្រាប់ និងវិទ្យុទាក់ទង ៣គ្រឿង៕