ការស្ទង់មតិរកឃើញថា ប្រជាជនថៃភាគច្រើនសប្បាយចិត្តនឹងការអនុវត្តរបស់រាជរដ្ឋាភិបាល ដែលមានអាយុទើប៦ខែ
បាងកក៖ អ្នកនាំពាក្យរាជរដ្ឋាភិបាលថៃ បានអួតអាងថា រហូតដល់ទៅ៤៤,៣ ភាគរយនៃអ្នកឆ្លើយតបការស្ទង់មតិ សប្បាយចិត្តនឹងរដ្ឋបាលរបស់លោកនាយករដ្ឋមន្ត្រី សេដ្ឋា ថាវីស៊ីន។ នេះបើតាមការចុះផ្សាយរបស់កាសែតថៃ The Nation។
អ្នកនាំពាក្យរាជរដ្ឋាភិបាលថៃ លោក ឆៃ វ៉ាចារ៉ុង (Chai Wacharonke) បានអះអាងថា ការិយាល័យស្ថិតិជាតិនៃប្រទេសថៃ (NSOT) បានរកឃើញនៅក្នុងការស្ទង់មតិកាលពីពេលថ្មីៗនេះថា ប្រជាជនថៃភាគច្រើនសប្បាយចិត្តនឹងការអនុវត្តរបស់រាជរដ្ឋាភិបាល បន្ទាប់ពីខ្លួនបានគ្រប់គ្រងប្រទេសនេះរយៈពេលប្រាំមួយខែ។ នៅក្នុងសន្និសីទសារព័ត៌មានរួមគ្នាមួយ ធ្វើឡើងជាមួយអគ្គនាយកការិយាល័យស្ថិតិជាតិ លោកស្រី ភីយ៉ានុច វុទ្ធីសន (Piyanuch Wuttisorn) លោក ឆៃ បាននិយាយថា៖«ការស្ទង់មតិដោយការិយាល័យស្ថិតិជាតិ បានរកឃើញថា អ្នកឆ្លើយសំណួររហូតដល់ទៅ៤៤,៣ភាគរយ មានការសប្បាយចិត្តយ៉ាងខ្លាំងជាមួយនឹងការអនុវត្តរបស់រាជរដ្ឋាភិបាល លោកនាយករដ្ឋមន្ត្រី សេដ្ឋា ថាវីស៊ីន ដែលមានរយៈពេលប្រាំមួយខែនៅក្នុងការិយាល័យ»។
លោក ឆៃ បានដកស្រង់សម្តីរបស់លោក សេដ្ឋា បានថ្លែងអំណរគុណចំពោះប្រជាជនដែលបានតាមដានការងាររបស់រាជរដ្ឋាភិបាលរបស់លោក ហើយបាននិយាយថា លោកសន្យាថា នឹងធ្វើឱ្យប្រសើរឡើងនូវការអនុវត្តការងាររដ្ឋបាលរបស់លោកដោយផ្អែកលើធាតុចូលពីការស្ទង់មតិ។ ទន្ទឹមគ្នានោះ លោកស្រី ភីយ៉ានុច បាននិយាយថា ការស្ទង់មតិនេះ ត្រូវបានធ្វើឡើងក្នុងចំណោមមនុស្ស៦៩៧០នាក់ទូទាំងប្រទេស ចាប់ពីថ្ងៃទី២២ ខែមេសាដល់ថ្ងៃទី១៥ ខែឧសភា។ វាត្រូវបានប្រារព្ធឡើងដើម្បីប្រារព្ធខួបប្រាំមួយខែនៃការកាន់តំណែងរបស់រាជរដ្ឋាភិបាល។ លោកស្រីបន្ថែមថា អ្នកឆ្លើយសំណួរមានអាយុយ៉ាងតិច១៦ឆ្នាំ។
លោកស្រី ភីយ៉ានុច បាននិយាយថា៨៣,៩ភាគរយនៃអ្នកឆ្លើយតបបាននិយាយថា ពួកគេកំពុងតាមដានការងាររបស់រាជរដ្ឋាភិបាល ដែលភាគច្រើនបានមកពីព័ត៌មានតាមទូរទស្សន៍។ ត្រូវបានស្នើសុំឱ្យវាយតម្លៃការពេញចិត្តរបស់ពួកគេក្នុងការអនុវត្តរបស់រាជរដ្ឋាភិបាលជាបីកម្រិត (ខ្ពស់បំផុត កណ្តាល និងទាបបំផុត) ដោយ៤៤,៣ភាគរយជ្រើសរើសជម្រើសខ្ពស់បំផុត បន្ទាប់មក៣៩,៦ភាគរយជ្រើសកណ្តាល និង១៤,១ ភាគរយទាបបំផុត។ ដោយសួរដើម្បីដកស្រង់គោលនយោបាយ ឬគម្រោងរបស់រដ្ឋាភិបាលដែលពួកគេសប្បាយចិត្តបំផុត៦៨,៤ភាគរយ បានលើកឡើងពីកម្មវិធីថែទាំសុខភាពជាសកល បន្ទាប់មកដោយការផ្អាកបំណុលសម្រាប់កសិករ (៣៨,៩ភាគរយ) និងវិធានការជំរុញទេសចរណ៍(៣៣,១ភាគរយ)។
អ្នកឆ្លើយតបម្នាក់ៗអាចផ្តល់ចម្លើយច្រើនជាងមួយ។ ត្រូវបានស្នើសុំឱ្យវាយតម្លៃទំនុកចិត្តរបស់ពួកគេលើសមត្ថភាពរបស់រាជរដ្ឋាភិបាល ក្នុងការដោះស្រាយបញ្ហាធំៗជាបីកម្រិត(ខ្ពស់បំផុត កណ្តាល និងទាបបំផុត) ដោយ៤១,៩ភាគរយជ្រើសរើសជម្រើសខ្ពស់បំផុត និង៣៩,៦ជាជម្រើសកណ្តាល ដោយគ្មាននរណាម្នាក់ជ្រើសរើសទាបបំផុត។ នៅពេលសួរថា តើបញ្ហាណាមួយដែលពួកគេចង់ឱ្យរាជរដ្ឋាភិបាលដោះស្រាយជាបន្ទាន់នោះ ៧៥,៣ភាគរយបានលើកឡើងពីការកើនឡើងនៃតម្លៃទំនិញប្រើប្រាស់ និង ៤៦,៦ភាគរយបាននិយាយថា ពួកគេចង់បានវិក័យប័ត្រថាមពលទាប។ អ្នកឆ្លើយតបម្នាក់ៗអាចផ្តល់ចម្លើយច្រើនជាងមួយ។ គួរបញ្ជាក់ថា លោក សេដ្ឋា ជានាយករដ្ឋមន្ត្រីទី ៣០របស់ប្រទេសថៃ បានកាន់តំណែងជានាយករដ្ឋមន្ត្រីថៃ ចាប់តាំងពីថ្ងៃទី២២ ខែសីហា ឆ្នាំ២០២៣។
