ARDB និង BAAC ចុះអនុស្សរណៈយោគយល់គ្នា ដើម្បីចែករំលែកព័ត៌មាន និងបទពិសោធន៍ពាក់ព័ន្ធនឹងការផ្តល់ហិរញ្ញប្បទានប្រកបដោយនិរន្តរភាព

ភ្នំពេញ៖ ឯកឧត្តមបណ្ឌិត កៅ ថាច ប្រតិភូរាជ រដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) បានដឹកនាំសហការីធនាគារ ARDB ចុះអនុស្សរណៈយោគយល់ រវាងធនាគារអភិវឌ្ឍន៍ជនបទ និងកសិកម្ម និង Bank for Agriculture and Agricultural Cooperatives (BAAC) តំណាងដោយលោក Chedtha Laeping អគ្គនាយករងជាន់ខ្ពស់ BAAC  នាថ្ងៃទី២៩ ខែឧសភា ឆ្នាំ២០២៤ នៅអាគារការិយាល័យកណ្តាលនៃធនាគារ BAAC ទីក្រុងបាងកក ប្រទេសថៃ។

ការចុះអនុស្សរណៈយោគយល់គ្នានេះ បានបង្ហាញពីការបោះជំហានយ៉ាងស្វាហាប់មួយទៀតរបស់ធនាគារ ARDB លើការពង្រីកកិច្ចសហប្រតិបត្តិការថ្នាក់អន្តរជាតិ ដែលអនុស្សរណៈយោគយល់គ្នានេះមានគោលបំណងចម្បងចំនួន ២ រួមមាន៖
(១) ពង្រឹងសមត្ថភាពបុគ្គលិកនិងស្ថាប័នរវាងស្ថាប័នទាំងពីរ, និង (២) ចែករំលែកព័ត៌មាននិងបទពិសោធន៍ពាក់ព័ន្ធនឹងការផ្តល់ហិរញ្ញប្បទានប្រកបដោយនិរន្តរភាពក្នុងបរិបទការអភិវឌ្ឍខ្សែច្រវាក់ផលិតកម្មកសិកម្ម សំដៅការចូលរួមចំណែកការអភិវឌ្ឍសេដ្ឋកិច្ច-សង្គម។

កិច្ចសហការនេះ ក៏នឹងអាចជំរុញការពិនិត្យលទ្ធភាពបន្ថែម លើការផ្តល់ហិរញ្ញប្បទានបៃតង, ការគ្រប់គ្រងហានិភ័យឥណទាន, និងការធ្វើប្រតិបត្តិការទូទាត់ឆ្លងប្រទេស ជាដើម ក្រោមក្របខណ្ឌការងារ និងបទប្បញ្ញត្តិ ធនាគារទាំងពីរ៕