ឧត្តមសេនីយ៍ឯក ជួន ណារិន្ទ បញ្ជាឱ្យនគរបាលស្រាវជ្រាវបង្ក្រាបទីតាំងលួចកែច្នៃ និងចែកចាយដាវសាម៉ូរ៉ៃខុសច្បាប់
ភ្នំពេញ៖ ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាកម្លាំងនគរបាលខណ្ឌទាំង១៤ ស្រាវជ្រាវទីតាំងលួចកែច្នៃ និងចែកចាយដាវសាម៉ូរ៉ៃខុសច្បាប់។
ថ្លែងប្រាប់អ្នកសារព័ត៌មាន ឧត្តមសេនីយ៍ឯក ជួន ណារិន្ទ បានឱ្យដឹងថា ដាវសាម៉ូរ៉ៃ គឺជាសម្ភារសម្រាប់ធ្វើសកម្មភាពយ៉ាងពេញនិយម ពីសំណាក់ក្រុមក្មេងទំនើងបង្កអុកឡុកសង្គម ដោយពួកគេប្រើប្រាស់ដើម្បីបង្កហិង្សាទៅគូជម្លោះ ឬឈានដល់ការប្រព្រឹត្តអំពើចោរកម្មថែមទៀតផង។ ដាវសាម៉ូរ៉ៃ ត្រូវបានក្រុមក្មេងទំនើងទាំងនោះ កែច្នៃដាក់ក្រោមកែបម៉ូតូ ឬកៀនបំពង់ស៉ីម៉ាំងម៉ូតូ ហើយខ្លះដាក់ក្នុងកាតាបផងដែរ។
ទាក់ទិនករណីក្មេងទំនើងដោយអនុវត្តតាមបទញ្ជាដ៏ម៉ឺងម៉ាត់របស់សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា, កម្លាំងស្នងការដ្ឋាននគរបាលរាជធានីភ្នំពេញ ក្នុងរយៈពេល២ថ្ងៃមកនេះ បានបង្ក្រាបករណីក្មេងទំនើងបង្កអុកឡុកសង្គម ចំនួន៥ករណី ឃាត់ខ្លួនមនុស្ស២០នាក់។
ឧត្តមសេនីយ៍ឯក ជួន ណារិន្ទ បានឲ្យដឹងថា ការបង្រ្កាបនេះធ្វើឡើងនៅថ្ងៃទី២៣-២៤ ខែឧសភា ឆ្នាំ២០២៤ ដោយក្រុមក្មេងទំនើង កាន់កាប់អាវុធដោយគ្មានការអនុញ្ញាត និងបង្កអំពើហិង្សា។
ឧត្តមសេនីយ៍ឯកបានបន្ដថា ដោយអនុវត្តតាមបទបញ្ជារបស់សម្ដេចធិបតី ហ៊ុនម៉ាណែត, ឯកឧត្ដមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងនាយឧត្តមសេនីយ៍ ស ថេត អគ្គស្នងការនគរបាលជាតិ កម្លាំងនគរបាលរាជធានីភ្នំពេញ នឹងបន្ដប្រតិបត្តិការនេះយ៉ាងម៉ឺងម៉ាត់បំផុត ដើម្បីរក្សាសណ្ដាប់ធ្នាប់ របៀបរៀបរយ និងសុវត្ថិភាពសង្គមជូនប្រជាពលរដ្ឋ៕
