សម្តេចតេជោ ហ៊ុន សែន៖ សូមកុំធ្វើរដ្ឋប្រហារផ្ដួលរំលំ សូមកុំដណ្ដើមអំណាចដោយមធ្យោបាយមិនប្រជាធិបតេយ្យ ដែលជាឫសគល់នៃសង្គ្រាម ហើយក៏ជាឫសគល់ នៃអំពើប្រល័យពូជសាសន៍ដែរ
ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានថ្លែងថា សូមកុំធ្វើរដ្ឋប្រហារផ្ដួលរំលំ សូមកុំដណ្ដើមអំណាចដោយមធ្យោបាយមិនប្រជាធិបតេយ្យ ដែលជាឫសគល់នៃសង្គ្រាម ហើយក៏ជាឫសគល់នៃអំពើប្រល័យពូជសាសន៍ដែរ ។
ក្នុងឱកាសអញ្ជើញ បិទសន្និសីទលើកទី១ ស្តីពីអនាគតកម្ពុជាគ្មានអំពើប្រល័យពូជសាសន៍ នាថ្ងៃទី២២ ខែឧសភា ឆ្នាំ២០២៤ សម្ដេចតេជោ ហ៊ុន សែន បានមានប្រសាសន៍ថា មធ្យោបាយដើម្បីការពារកុំឱ្យមានរបបប្រល័យពូជសាសន៍ ដំបូងបំផុតគឺត្រូវការពារសន្តិភាពឱ្យបាន បើការពារសន្តិភាពបានហើយ មិនចាំបាច់ព្រួយបារម្ភពីរឿងមានអំពើប្រល័យពូជសាសន៍ទេ ហើយក៏ត្រូវការពារដូចគ្នាដែរនូវការដណ្ដើមអំណាចដោយមធ្យោបាយមិនប្រជាធិបតេយ្យ។
សម្ដេចតេជោបញ្ជាក់ថា «សូមកុំធ្វើរដ្ឋប្រហារផ្ដួលរំលំ សូមកុំដណ្ដើមអំណាចដោយមធ្យោបាយមិនប្រជាធិបតេយ្យ ដែលជាឫសគល់នៃសង្គ្រាម ហើយក៏ជាឫសគល់នៃអំពើប្រល័យពូជសាសន៍ដែរ» ។
សម្ដេចតេជោបន្តថា ពីមុនមានបរទេសញុះញង់ឱ្យធ្វើរដ្ឋប្រហារ ឥឡូវនេះគេមិនធ្វើរដ្ឋប្រហារទៀតទេ គឺគេធ្វើបដិវត្តពណ៌តែម្ដង អីចឹងគួរតែកម្ចាត់ចលនាបដិវត្តពណ៌នេះឱ្យបានមុន ជៀសវាងការបំផ្លាញសង្គម និងសន្តិភាព ឬអាចនាំដល់សង្គ្រាម និងអំពើប្រល័យពូជសាសន៍។ សម្ដេចរំឭកទៀតថា នៅកម្ពុជាកាលពី២០១៣ ក៏ធ្លាប់កើតមានបដិវត្តនេះដែរ តែសម្ដេចតេជោ ហ៊ុន សែន រកឃើញគន្លឹះរបស់វា គឺអព្យាក្រឹត្យកងកម្លាំងប្រដាប់អាវុធ និងរដ្ឋបាលស៊ីវិល។ ៕
