ឯកឧត្ដម សក់ សេដ្ឋា ផ្តល់អនុសាសន៍ណែនាំ លើកិច្ចការសំខាន់ៗជាអាទិភាព ៧ចំណុច ដល់ក្រុមការងារគណបក្សចុះមូលដ្ឋានស្រុកបវេល យកទៅអនុវត្ត

ភ្នំពេញ៖ ឯកឧត្ដម សក់ សេដ្ឋា សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកបវេល បានអនុសាសន៍ណែនាំ លើកិច្ចការសំខាន់ៗជាអាទិភាព ៧ចំណុច ដល់ក្រុមការងារគណបក្សចុះមូលដ្ឋានស្រុកបវេល យកទៅអនុវត្តឲ្យមានប្រសិទ្ធភាព ។

ក្នុងឱកាសអញ្ជើញជាអធិបតី ប្រកាសសមាសភាពក្រុមការងារ គណបក្សចុះមូលដ្ឋានស្រុកបវេល នៃខេត្តបាត់ដំបង នៅទីស្នាក់ការគណបក្សស្រុកបវេល នាថ្ងៃទី១៦ ខែឧសភា ឆ្នាំ២០២៤នេះ ឯកឧត្ដម សក់ សេដ្ឋា បានមានប្រសាសន៍ថា គណបក្ស និងរាជរដ្ឋាភិបាលសម្រាប់នីតិកាលទី៧ នៃរដ្ឋសភា បានប្តេជ្ញាចិត្តយ៉ាងមុតមាំ ដើម្បីពង្រឹងសកម្មភាពការងារចុះមូលដ្ឋាន ដើម្បីជំរុញការអនុវត្តកម្មវិធីនយោបាយ និងយុទ្ធសាស្ត្រ បញ្ចកោណដំណាក់កាលទី១ កម្មវិធីគោលនយោបាយ និងវិធានការជាគន្លឹះនានារបស់រាជរដ្ឋាភិបាល ឱ្យបានសកម្មផុលផុសនៅគ្រប់មូលដ្ឋាន ដើម្បីជាមូលដ្ឋានឈានឆ្ពោះទៅសម្រេចបាន ចក្ខុវិស័យកម្ពុជាឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ និងទស្សនវិស័យកម្ពុជាឆ្នាំ២០៥០ ជាប្រទេសមានប្រាក់ចំណូលខ្ពស់ ដែលជាទស្សនៈវិស័យ ផ្តួចផ្តើមដោយគណបក្សប្រជាជន កម្ពុជា។

ដោយឈរលើមូលដ្ឋាននេះ ឯកឧត្ដម សក់ សេដ្ឋា បានផ្តល់អនុសាសន៍ណែនាំលើកិច្ចការសំខាន់ៗជាអាទិភាពដែលក្រុម ការងារគណបក្សចុះមូលដ្ឋានស្រុកបវេល ត្រូវអនុវត្តដូចខាងក្រោម៖

១- លើមូលដ្ឋាននៃសមាសភាពក្រុមការងារគណបក្សចុះមូលដ្ឋានឃុំ ប្រធានក្រុមការងារ គណបក្សចុះមូលដ្ឋានឃុំនីមួយៗ ត្រូវសហការជាមួយគណបក្សស្រុក និងគណបក្សឃុំសាមី រៀបចំសមាសភាពក្រុមការងារចុះតាមភូមិ និងសហការរៀបចំពីធីប្រកាសសមាសភាពក្រុមការងារ រាជរដ្ឋាភិបាលចុះមូលដ្ឋាន ឃុំ ភូមិ នីមួយៗឱ្យបាននៅសប្តាហ៍ទីមួយ នៃខែមិថុនា ឆ្នាំ២០២៤ នេះ។

២- ក្រុមការងារនីមួយៗ ត្រូវរួមសហការគ្នាពង្រឹងសាមគ្គីភាព ឯកភាពផ្ទៃក្នុងក្រុមការងារ ឱ្យបានរឹងមាំ និងត្រូវរក្សាពង្រឹងទំនាក់ទំនងសាមគ្គីភាព ឯកភាពគ្នាឱ្យបានល្អជាមួយគណបក្ស និងថ្នាក់ដឹកនាំ មន្ត្រីគណបក្សដែលក្រុមការងារចុះបំពេញការងារ។ ត្រូវពង្រឹងរបៀបរបបការងារ ការប្រជុំត្រួតពិនិត្យ វាយតម្លៃការងារដើម្បីដាក់ចេញទិសដៅអនុវត្តបន្តឱ្យមានប្រសិទ្ធភាព និងមាន និរន្តរភាព។

៣- ត្រូវយកចិត្តទុកដាក់ពង្រឹងអង្គការចាត់តាំងបក្សដែលក្រុមការងារចុះជួយឱ្យបាន រឹងមាំ ទាំងខាងនយោបាយ សតិអារម្មណ៍ ចាត់តាំង និងហិរញ្ញវត្ថុ ដើម្បីអង្គការចាត់តាំងបក្ស ថ្នាក់ដឹកនាំ មន្ត្រីគណបក្សនៅមូលដ្ឋាន ធ្វើសកម្មភាពប្រកបដោយភាពជាម្ចាស់ និងមានការ ទទួលខុសត្រូវខ្ពស់ចំពោះគណបក្ស និងប្រជាជន ដោយមិនពឹងផ្អែកទាំងស្រុងតែទៅលើក្រុម ការងារនោះឡើយ។

៤- ត្រូវរួមសហការជាមួយគណបក្ស ថ្នាក់ដឹកនាំ មន្ត្រីគណបក្សគ្រប់ថ្នាក់ ធ្វើការពង្រឹង ពង្រីកសមាជិកបក្ស ការពង្រឹងអង្គការមហាជនរបស់គណបក្សគ្រប់ថ្នាក់នៅមូលដ្ឋាន។ ត្រូវរួមគ្នា ពិនិត្យ និងពង្រឹងក្រុមបក្ស ការធ្វើពិធីបញ្ចូលសមាជិកបក្ស ការរៀបចំប័ណ្ណសមាជិកបក្ស និងការ រៀបចំសៀវភៅបញ្ជីសមាជិកបក្សឱ្យបានច្បាស់លាស់តាមមូលដ្ឋាននីមួយៗ។
៥- ក្រុមការងារគ្រប់ថ្នាក់ត្រូវយកចិត្តទុកដាក់បែងចែងកម្លាំងចុះមូលដ្ឋាន ដើម្បីរួមសហការ ជាមួយគណបក្ស និងមន្ត្រីគណបក្ស ធ្វើសកម្មភាពចិញ្ចឹមចលនានយោបាយនៅមូលដ្ឋានឱ្យ បានជាប់ជាប្រចាំ។

៦- ត្រូវខិតខំតាមដានសភាពការណ៍របស់គណបក្សដទៃដែលប៉ុនប៉ងបំបែកបំបាក់ សាមគ្គីភាព ឯកភាពផ្ទៃក្នុង ការបំផុសជិះឆ្កៀលបញ្ហាផ្សេងៗ ក្នុងផ្ទៃក្នុងក្រុមការងារ និងគណបក្សយើងតាមគ្រប់រូបភាព សំដៅចាត់វិធានការឆ្លើយតបវាយបកសកម្មភាពទាំងនោះឱ្យបានទាន់ពេល វេលា និងមានប្រសិទ្ធភាព។
៧- ត្រូវចូលរួមអនុវត្តគោលនយោបាយ យុទ្ធសាស្ត្រ ផែនការសកម្មភាពរបស់គណបក្ស និងក្រុមការងារ ដោយត្រូវរួមគ្នាធ្វើសកម្មភាពឱ្យបានសកម្មព្រមៗគ្នា ដើម្បីធានាឱ្យគណបក្ស យើងទទួលបានជោគជ័យយ៉ាងត្រចះត្រចង់គ្រប់ការបោះឆ្នោត ទាំងការបោះឆ្នោតសកល អសកល ទាំងនៅថ្នាក់ជាតិ និងថ្នាក់ក្រោមជាតិ និងចូលរួមអនុវត្តឱ្យបានល្អនូវភារកិច្ច របស់គណបក្សគ្រប់កាលៈទេសៈ។

ជាថ្មីម្តងទៀតឯកឧត្ដមក៏បានបង្ហាញក្តីសង្ឃឹមជឿជាក់ យ៉ាងមុតមាំថា ឯកឧត្តម លោកជំទាវ លោកស្រី អស់លោក នឹងបន្តពង្រឹងប្តេជ្ញាចិត្តចូលរួមក្នុង សកម្មភាពការងាររបស់ក្រុមការងារគណបក្សចុះមូលដ្ឋានស្រុកបវេលឱ្យបានសស្រាក់សស្រាំជាប់ ជាប្រចាំ ដើម្បីគណបក្សអនុវត្តសម្រេចនូវបេសកកម្មរបស់គណបក្សក្នុងការអភិវឌ្ឍប្រទេសជាតិ និងបម្រើផលប្រយោជន៍ សេចក្តីត្រូវការរបស់ប្រជាពលរដ្ឋកម្ពុជាគ្រប់ៗរូប ៕