សម្តេចធិបតី៖ ៤ខែ ឆ្នាំនេះ រាជរដ្ឋាភិបាលកម្ពុជាអនុម័តគម្រោងវិនិយោគ ១២៨គម្រោង ដែលមានទុនជាង ២៥០០លានដុល្លារ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយរដ្ឋមន្ត្រីនៃកម្ពុជា បានលើកឡើងថា គិតត្រឹមខែមេសា ឆ្នាំ២០២៤ ពោលគឺរយៈពេល ៤ខែមកនេះ រាជរដ្ឋាភិបាលកម្ពុជា បានអនុម័តគម្រោងវិនិយោគថ្មី និងគម្រោងពង្រីកផលិតកម្មសរុបចំនួន១២៨គម្រោង ដែលមានទុនវិនិយោគសរុបជាង ២៥០០លានដុល្លារ ។

ក្នុងឱកាសអញ្ជើញ​ប្រកាសបើកឱ្យដំណើរការជាផ្លូវការ សមាគមសហព័ន្ធអ្នកវិនិយោគកម្ពុជា និងពិសាអាហារសាមគ្គី នាថ្ងៃទី៩ ខែឧសភា ឆ្នាំ២០២៤ សម្តេចធិបតី មានប្រសាសន៍បន្តថា នៅល្ងាចថ្ងៃទី៨ ខែឧសភា ឆ្នាំ២០២៤ សម្តេចទើបតែចុះហត្ថលេខាផ្តល់គោលការណ៍ឯកភាព លើគម្រោងវិនិយោគចំនួន ១៤គម្រោង ដែលមានទុនវិនិយោគ ៤៨០លានដុល្លារ នេះជាលទ្ធផលដែលកម្ពុជាទទួល និងមានបន្តបន្ទាប់ថែមទៀត។

សម្តេចធិបតីបញ្ជាក់ថា «នេះហើយជាអ្វីដែលយើងបានខិតខំរួមគ្នា ដើម្បីផ្សព្វផ្សាយកម្ពុជាយើង រួមគ្នាដើម្បីបង្កើតនូវការទុកចិត្តពីអ្នកវិនិយោគ ទាំងអ្នកវិនិយោគដែលនៅស្រាប់ និងទាំងវិនិយោគដែលមកថ្មី ហើយនេះក៏ជាសមិទ្ធផលក្នុងរយៈពេល ៨ខែ ដែលរាជរដ្ឋាភិបាលបានដាក់ចេញ គឺលទ្ធផលនៅលើដីជាក់ស្តែង ជូនប្រជាពលរដ្ឋរបស់យើង»។

សម្តេចធិបតី លើកឡើងទៀតថា អភិក្រមនៃការវិនិយោគរបស់កម្ពុជា គឺប្រើអភិក្រមចំនួន២ រក្សាចាស់ ពង្រីកថ្មី ដោយទន្ទឹមនឹងការទាក់ទាញវិនិយោគថ្មីមកវិនិយោគកម្ពុជា រាជរដ្ឋាភិបាលបានយកចិត្តទុកដាក់ ធ្វើសកម្មភាពដើម្បីលើកស្ទួយ បង្កលក្ខណៈងាយស្រួល ឱ្យវិនិយោគដែលមានស្រាប់ មានលទ្ធភាពបន្តជោគជ័យ និងពង្រីកលទ្ធភាពរបស់ខ្លួនថែមទៀត ដូចជាពាក្យខ្មែរតែពោលថា «រក្សាចាប៥ក្នុងដៃ ប្រសើរជាងចាប ២០នៅក្នុងព្រៃ និងយកលលកធ្នាក់ ទាក់លលកព្រៃ»៕