គណៈកម្មការវត្តអម្ពរនារាមបឹងត្រាវ រៀបចំពិធីរៀបអាពាហ៍ពិពាហ៍ ក្នុងឱកាសបុណ្យចូលឆ្នាំថ្មីប្រពៃណីខ្មែរ
ភ្នំពេញ៖ ក្នុងរយៈពេលនៃបុណ្យចូលឆ្នាំថ្មីប្រពៃណីជាតិខ្មែរ ប្រជាពលរដ្ឋតែងតែនាំគ្នាទៅវត្តប្រគេនចង្ហានដល់ព្រះ សង្ឃ និងថ្វាយគ្រឿងសក្ការៈបូជាមាន ទៀន ធូប ផ្កាភ្ញីជាដើមដើម្បីបូជាថ្វាយចំពោះព្រះសម្មាសម្ពុទ្ធ និងព្រះ រតនត្រ័យ។
ក្រោយពីបញ្ចប់ថ្ងៃចូលឆ្នាំរយៈពេល ៣ថ្ងៃ តាមទីវត្តអារាមនានា តែងតែប្រារព្ធពិធីត្រាស់សង្រ្កាន្ត ដែលជាពិធីផ្តាច់ឆ្នាំចាស់ ផ្តាច់សករាជចាស់ ទទួលសករាជថ្មី និងបណ្តេញអស់ឧបទ្រព្យចង្រៃទាំងឡាយទាំងពួងពីឆ្នាំចាស់ ហើយអញ្ជើញទេវតាឆ្នាំថ្មីគ្រប់គ្រងថែរក្សាកូនចៅ ។
ដោយឡែកវត្តអម្ពរនារាមបឹងត្រាវ ស្ថិតក្នុងឃុំ បត់ត្រង់ ស្រុកមង្គលបូរី ខេត្តបន្ទាយមានជ័យ នៅថ្ងៃទី១៨ ខែមេសា ឆ្នាំ២០២៤ បានរៀបចំ ពិធីត្រាស់សង្ក្រាន្ត មានដូចជាពិធីរៀបអាពាហ៍ពិពាហ៍កូនកំលោះកូនក្រមុំ ដើម្បីអបអរសាទរទទួលចូលទេវតាឆ្នាំថ្មី តាម ទំនៀម ទម្លាប់ ដែលបា នធ្វើឡើង ជារៀង រាល់ ឆ្នាំជាយូរយាមក ។
ពិធីនេះក៏មានប្រជាពលរដ្ឋចូលរួមហែរ ផ្លែឈើចំរុះ លើកជំនូន២០០គូរ ហែរតាមផ្លូវអមដោយមានភ្លេងខ្មែរ និងក្រុមឆៃយ៉ាំ ចូលក្នុងវត្ត ហើយបន្ទាប់មកអាចារ្យឲ្យពរជ័យដល់កូនក្រមុំ និងកូនកំលោះ ក្រោមអធិបតី លោកមេឃុំ អ្នកមុខអ្នកការ ឪពុក ម្តាយកូន ប្រុស ស្រី ទាំងសងខាងនិងប្រជាពលរដ្ឋចូលរួម កាត់សក់ និងបង្កក់សិរីសួស្តីដល់គូអាពាហ៍ពិពាហ៍ ដោយនាំគ្នាសែនចងដៃ យ៉ាងច្រើននិងសប្បាយរីករាយ ក្នុងនោះកូនកំលោះ តោងស្បៃកូនក្រមុំ ជាកិច្ចបញ្ចប់កម្មវិធី ។
ពិធីត្រាស់សង្រ្កាន្តវត្តអម្ពរនារាមបឹងត្រាវ បានបន្តទៅលេង គប់កញ្ញាធ្លាក់ទឹក រាំវង់កំដរហូតដល់ថ្ងៃទី ២០ ខែមេសា ឆ្នាំ ២០២៤ ទើបបញ្ចប់កម្មពិធីបុណ្យចូលឆ្នាំខ្មែរផងដែរ ហើយចំពោះថវិកាដែលបានមកពីពុទ្ធបរិស័ទចងដៃនោះគឺទុកសម្រាប់កសាងនូវសមិទ្ធផលនានាក្នុងវត្ត ៕
