អេមីរ៉ាត់អារ៉ាប់រួម ភ្លៀងធ្លាក់ខ្លាំងបំផុតមិនធ្លាប់មាន បណ្ដាលឲ្យជន់លិចព្រលានយន្តហោះនៅឌូបៃ ខណៈកម្ពុជាក្ដៅចង់ឆេះស្បែក
ឌូបៃ៖ ប្រទេសវាលខ្សាច់អេមីរ៉ាត់អារ៉ាប់រួម(UAE)កាលពីថ្ងៃពុធទី១៧មេសា ទទួលរងនូវភ្លៀងធ្លាក់ខ្លាំងបំផុតមិនធ្លាប់មាន ខណៈទឹកជំនន់បានជន់លិចអាកាសយានដ្ឋានអន្តរជាតិឌូបៃ រំខានដល់ជើងហោះហើរឆ្លងកាត់អាកាសយានដ្ឋានដ៏មមាញឹកបំផុតរបស់ពិភពលោកមួយនេះ សម្រាប់ការធ្វើដំណើរជាអន្តរជាតិ ស្របពេលដែលនៅកម្ពុជាឯណេះវិញក្ដៅចង់ឆេះស្បែក ។
ទីភ្នាក់ងារព័ត៌មាន WAM ដែលគ្រប់គ្រងដោយរដ្ឋអារ៉ាប់រួម បានពណ៌នាភ្លៀងធ្លាក់កាលពីថ្ងៃអង្គារទី១៦ ខែមេសាថា ជាព្រឹត្តិការណ៍អាកាសធាតុប្រវត្តិសាស្ត្រ ដែលភ្លៀងធ្លាក់ខ្លាំងលើសពីអ្វីដែលបានកត់ត្រាចាប់តាំងពីការចាប់ផ្តើមនៃការប្រមូលទិន្នន័យក្នុងឆ្នាំ១៩៤៩។ ជាមួយគ្នានេះ ភ្លៀងក៏បានធ្លាក់នៅបារ៉ែន អូម៉ង់ កាតា និងអារ៉ាប៊ីសាអូឌីត ផងដែរ ប៉ុន្តែភ្លៀងធ្លាក់នៅអារ៉ាប់រួមខ្លាំងខុសពីធម្មតា ដោយសាលារៀនបានបិទអស់ជាច្រើនសប្តាហ៍។ គួរជម្រាបថា បើទោះបីជាអារ៉ាប់រួមជាប្រទេសស្តេចប្រេងក៏ដោយ ប៉ុន្តែផ្លូវជាច្រើនកន្លែង និងតំបន់ផ្សេងទៀតខ្វះប្រព័ន្ធលូ ទឹកភ្លៀងទៀងទាត់ បង្កឱ្យមានគ្រោះទឹកជំនន់។ ទន្ទឹមនឹងនេះ យានយន្តត្រូវបានចតទុកចោលក្នុងផ្ទៃទឹកដែលជន់លិចផ្លូវធំៗក្នុងរដ្ឋធានីឌូបៃ ខណៈអ្នកធ្វើដំណើរស្ទះកកកុញរកតែទៅណាមិនបាន។
ភ្លៀងធ្លាក់គឺជារឿងដ៏កម្រនៅក្នុងអារ៉ាប់រួម ព្រោះជាប្រទេសនៅឧបទ្វីបអារ៉ាប់ស្ងួតហួតហែង ប៉ុន្តែកើតឡើងជាទៀងទាត់ក្នុងអំឡុងពេលរដូវរងាដ៏ត្រជាក់។ ជុំវិញបញ្ហានេះ អ្នកវិទ្យាសាស្ត្រក៏លើកឡើងដែរថា ការប្រែប្រួលអាកាសធាតុជាទូទៅ គឺបង្កើតបានជាព្យុះ គ្រោះរាំងស្ងួត ទឹកជំនន់ និងភ្លើងឆេះព្រៃនៅជុំវិញពិភពលោក កាន់តែខ្លាំងឡើង និងញឹកញាប់ជាងមុន។ ការកើនឡើងនៃសីតុណ្ហភាព និងឥទ្ធិពលផ្សេងទៀតនៃការឡើងកម្តៅផែនដីជាយូរយារណាស់មកហើយ ត្រូវបានគេមើលឃើញថា ជាការគំរាមកំហែងដល់អាយុជីវិតមនុស្ស-សត្វ និងជីវចម្រុះនៅលើភពផែនដី និងជាពិសេសតាមតំបន់ដែលរងគ្រោះខ្លាំងបំផុត។
