ឧត្តមសេនីយ៍ទោ សោម ស៊ុន នាំយកភេសជ្ជៈ និងថវិកាមួយចំនួន ឧបត្ថម្ភជូនក្រុមកីឡាកុមារជាប់ចំណាត់ថ្នាក់លេខ១ ផ្នែកកីឡាវាសី និងបាល់ទះ នៅខេត្តកំពង់ធំ ត្រៀមប្រកួតថ្នាក់ជាតិនៅភ្នំពេញ
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅថ្ងៃទី២៨ ខែមីនា ឆ្នាំ២០២៤ បានដឹកនាំសហការីយោធិននារីនៃក្រុមការងារយេនឌ័រនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ទៅសំណេះសំណាល និងឧបត្ថម្ភថវិកា ភេសជ្ជៈ ជូនដល់កុមារ៉ា កុមារី នៃក្រុមកីឡាបាល់ទះ នឹងវាយសី នៅសាលាបឋមសិក្សាក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ដែលបានចូលរួមប្រកួតទទួលបានចំណាត់ថ្នាក់លេខ១ នៅថ្នាក់ខេត្ត ដែលនឹងត្រូវត្រៀមទៅប្រកួត នៅថ្នាក់ជាតិនៅរាជធានីភ្នំពេញ នាពេលខាងមុខ ។
លោកស្រី នង ចន្ធី នាយិកាសាលាបឋមសិក្សាក្រចាប់ សង្កាត់អាចារ្យលាក់ បានឡើងរាយការណ៍អំពីលទ្ធផលនៃការប្រកួតនៅថ្នាក់ខេត្តរបស់ក្រុមកុមារ៉ា កុមារី ដែលមានចំនួនពីរក្រុម គឺក្រុមកីឡាវាយសី និងក្រុមកីឡាបាល់ទះ ដោយការប្រកួតនាពេលកន្លងមកបានទទួលពានរង្វាន់ជាបន្តបន្ទាប់ ហើយនៅពេលថ្មីៗនេះបានទទួលចំណាត់ថ្នាក់លេខ១ នៅថ្នាក់ខេត្ត ដើម្បីត្រៀមទៅប្រកួតនៅថ្នាក់ជាតិនៅទីក្រុងភ្នំពេញ។ ហើយក្រុមកីឡាកុមារទាំងពីរក្រុមមានការខ្វះខាតក្នុងការបំប៉នសុខភាពក្នុងពេលចូលរួមប្រកួតដណ្ដើមយកជ័យជម្នះជាបន្តទៀតនៅថ្នាក់ជាតិ ដែលមានរយៈពេលយូរថ្ងៃ ។
ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ ចំពោះក្មួយៗ ដែលជាក្រុមកីឡាករទាំងពីរក្រុម ដែលបានខិតខំប្រឹងប្រែងហ្វឹកហាត់និងចូលរួមប្រកួតទទួលបានជ័យជម្នះនៅថ្នាក់ខេត្ត ហើយនិងបានថ្លែងអំណរគុណចំពោះលោកគ្រូអ្នកគ្រូ ពិសេសលោកស្រីនាយិកាសាលា ដែលបានយកចិត្តទុកដាក់ដឹកនាំទាំងការអប់រំរៀនសូត្រ ទាំងផ្នែកកីឡានេះផងដែរ។ ហើយនៅក្នុងឱកាសនេះ ឧត្តមសេនីយ៍ទោ សោម ស៊ុន និងសហការីក្រុមយោធិននារី នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឧបត្ថម្ភនូវភេសជ្ជៈ និងថវិកាមួយចំនួន ជូនលោកស្រីនាយិកាសាលាដើម្បីចាត់ចែងក្នុងការដឹកនាំគ្រប់គ្រងកីឡាចូលរួមទៅប្រកួតនៅពេលខាងមុខ នឹងបានផ្ដាំផ្ញើឱ្យក្មួយៗកុមារ ដែលជាក្រុមកីឡាករ កីឡាការិនី ទាំងពីរក្រុម ត្រូវខិតខំថែរក្សាសុខភាព និងបន្តប្រកួតដណ្ដើមយកជ័យជម្នះនៅថ្នាក់ជាតិ សម្រាប់កិត្តិយសខេត្តកំពង់ធំយើង សាលាបឋមសិក្សាយើង និងកិត្តិយសរបស់យើងផងដែរ។
លោកស្រី នង ចន្ធី នាយិកាសាលា បានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះឧត្តមសេនីយ៍ទោ សោម ស៊ុន និងក្រុមការងារទាំងអស់ ដែលបានជួយឧបត្ថម្ភសម្លៀកបំពាក់កីឡា សម្រាប់សិស្សានុសិស្សនៅក្នុងសាលាបឋមសិក្សាក្រចាប់ នាពេលកន្លងមក ហើយនិងបានជួយឧបត្ថម្ភភេសជ្ជៈ និងថវិកានៅពេលនេះ និងសូមគោរពជូនពរឯកឧត្តម អស់លោក លោកស្រីទាំងអស់ សូមទទួលបាននូវពុទ្ធពរទាំង៤ ប្រការ កុំបីឃ្លៀងឃ្លាតឡើយ ៕
