សម្តេចក្រឡាហោម ស ខេង អញ្ជើញចូលរួមបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ភូមភាគ៤ ខេត្តបាត់ដំបង

ភ្នំពេញ៖ នាព្រឹកថ្ងៃទី២៥ ខែកុម្ភៈ ឆ្នាំ២០២៤នេះ សម្តេចក្រឡាហោម ស ខេង អ្នកតំណាងរាស្ត្រមណ្ឌលបាត់ដំបង បានអញ្ជើញចូលរួមបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ភូមភាគ៤ ខេត្តបាត់ដំបង នៅមណ្ឌលបោះឆ្នោតវិទ្យាល័យសម្តេចឪ ក្រុងបាត់ដំបង ខេត្តបាត់ដំបង។

ប្រធានលេខាធិការដ្ឋានរៀបចំការបោះឆ្នោតខេត្តបាត់ដំបង លោក សុខ ហ៊ីង បានឱ្យដឹងថា សម្រាប់ខេត្តបាត់ដំបង មានមណ្ឌលបោះឆ្នោតតែមួយមណ្ឌលប៉ុណ្ណោះ ត្រូវបានបែងចែកជា២ការិយាល័យ គឺការិយាល័យលេខ៤០០២ មានអង្គបោះឆ្នោតចំនួន៤០៦នាក់ និងការិយាល័យលេខ៤០០៣ មានអង្គបោះឆ្នោត ចំនួន៤២៥នាក់ សរុបរួមសម្រាប់អង្គបោះឆ្នោតមានចំនួន៨៣១នាក់ ក្នុងនោះមានអ្នកតំណាងរាស្ត្រ ក្នុងតំណែងចំនួន៨នាក់ និងសមាជិកក្រុមប្រឹក្សាឃុំ សង្កាត់ ក្នុងតំណែងចំនួន៨២៣នាក់ ។

សម្រាប់ដំណើរការនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ភូមិភាគ៤ ខេត្តបាត់ដំបងនេះ មន្ត្រីការិយាល័យបោះឆ្នោតបានផ្តល់អាទិភាពដល់អង្គបោះឆ្នោតណា ដែលមានភាពវ័យចាស់ អ្នកមានជំងឺ ពិការភាព និងស្ត្រី ដែលទើបសម្រាលកូនរួច ដើម្បីចូលទៅបោះឆ្នោតមុនគេ ។

សូមបញ្ជាក់ថា សម្រាប់ខេត្តបាត់ដំបង មានគណបក្សនយោបាយ ដែលបានចូលរួមប្រកួតប្រជែងការបោះឆ្នោតជ្រើស តាំងសមាជិកព្រឹទ្ធសភា នីតិកាលទី៥ ដែលបានប្រព្រឹត្តទៅ នាថ្ងៃទី២៥ ខែកុម្ភៈ ឆ្នាំ២០២៤ នេះមានចំនួន៤គណបក្ស គឺគណបក្ស ប្រជាជនកម្ពុជា គណបក្ស ឆន្ទៈខ្មែរ គណបក្ស ហ៊្វុនស៊ិនប៉ិច និងគណបក្ស កម្លាំងជាតិ និងអ្នកមានសិទ្ធិបោះឆ្នោតជ្រើសតាំងសមាជិកព្រឹទ្ធសភា គឺអង្គបោះឆ្នោតជាតំណាងរាស្ត្រ និងជាសមាជិកក្រុមប្រឹក្សា ឃុំ សង្កាត់ទាំងអស់ក្នុងតំណែង ។

ក្នុងពេលបោះឆ្នោតនេះទៀតសោត ក៏មិនមានហេតុការណ៍អ្វីកើតឡើង ដែលបានបង្កការរំខានដល់ដំណើរការបោះឆ្នោតនោះដែរ មានន័យថា ការបោះឆ្នោតនេះបានប្រព្រឹត្តិទៅប្រកបដោយភាពរលូន ខណៈការរៀបចំការពារសន្តិសុខសណ្តាប់ធ្នាប់សាធារណៈ នៅខាងក្រៅមណ្ឌលបោះឆ្នោតពីកម្លាំងសមត្ថកិច្ចពាក់ព័ន្ធ ត្រូវរៀបចំបានយ៉ាងល្អប្រសើរ៕