សម្តេចធិបតី៖ ប្រទេសជាច្រើន កាត់បន្ថយការរើសមន្ត្រីរាជការក្របខណ្ឌ រួមទាំងកងទ័ព ប៉ុន្តែរើសមន្ត្រីកិច្ចសន្យា

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា មានប្រទេសជាច្រើន នៅលើពិភពលោក កាត់បន្ថយការជ្រើសរើសមន្ត្រីរាជការក្របខណញឌ រួមទាំងកងទ័ព ប៉ុន្តែជ្រើសរើសមន្ត្រីកិច្ចសន្យា ។

ក្នុងឱកាសអញ្ជើញប្រកាសជ័យលាភី អង្គភាពផ្ដល់សេវាសាធារណៈគំរូ ក្នុងវិស័យអប់រំ និងសុខាភិបាលឆ្នាំ២០២៣ និងប្រកាសដាក់ឲ្យអនុវត្តសម្រាប់ឆ្នាំ២០២៤ នាថ្ងៃទី២២ ខែកុម្ភៈ ឆ្នាំ២០២៤នេះ សម្តេចធិបតី ហ៊ុន ម៉ាណែត បញ្ជាក់ថា «នៅប្រទេសច្រើនណាស់ គេកាត់បន្ថយនូវមន្ដ្រីរាជការក្របខណ្ឌ រួមទាំងកងទ័ព ដោយការងារមួយចំនួន ផ្អែកទៅលើការកុងត្រាកិច្ចសន្យា។ សូម្បីតែកងទ័ពនៅអាមេរិក និងនៅអូស្ដ្រាលី ការងារមួយចំនួន គេលែងប្រើទ័ពទៀតហើយ គឺគេប្រើក្រុមហ៊ុនឯកជន ដើម្បីធ្វើការងារ»។

ពាក់ព័ន្ធបញ្ហានេះដែរ សម្តេចធិបតី ហ៊ុន ម៉ាណែត ក៏បានណែនាំឲ្យពិនិត្យលទ្ធភាព ក្នុងការជ្រើសរើសបែបនេះ ។ សម្តេចថា លោកគ្រូ អ្នកគ្រូ នៅតាមមូលដ្ឋាន អត់ត្រូវចាំបាច់ ទាល់តែមានក្របខណ្ឌពេញ បានមានសិទ្ធិនោះទេ ត្រូវផ្ដល់សិទ្ធិ និងផ្ដល់ឱកាសឲ្យភ្ជាប់គ្នា គឺត្រូវប្រើរូបមន្ដ ការគិតគូរបែបនេះ ៕