សហគមន៍អភិរក្សជីវៈចម្រុះបឹងពារាំង ជាជម្រើសល្អបំផុតសម្រាប់ទស្សនាបក្សីចម្រុះប្រភេទជិតផុតពូជ
ភ្នំពេញ៖ សម្រាប់អ្នកស្រលាញ់ធម្មជាតិ និងសត្វស្លាប កុំមើលរំលងសហគមន៍អភិរក្សជីវៈចម្រុះបឹងពារាំង ឱ្យសោះព្រោះទីនេះជាជម្រើសដ៏ល្អបំផុតក្នុងការទៅទស្សនាសត្វស្លាបចម្រុះ ដែលជាប្រភេទជិតផុតពូជ។ នេះបើយោងតាមការឱ្យដឹងពីក្រសួងទេសចរណ៍។
ក្រសួងទេសចរណ៍ បានគូសបញ្ជាក់ឱ្យដឹងនៅថ្ងៃទី២៤ ខែមករា ឆ្នាំ២០២៤ នេះថា សហគមន៍អភិរក្សជីវៈចម្រុះបឹងពារាំង មានចម្ងាយប្រហែល១២គីឡូម៉ែត្រពីកណ្តាលក្រុងសៀមរាប ស្ថិតនៅក្នុងសង្កាត់ជ្រាវ ក្រុងសៀមរាប ខេត្តសៀមរាប។
តាមរយៈការធ្វើដំណើរកម្សាន្តតាមទូកដោយសន្សឹមៗ ជុំវិញតំបន់ដីសើមនៃបឹងទន្លេសាបដ៏មានសក្តានុពលមួយនេះនឹងអនុញ្ញាតឱ្យបងប្អូនអាចគយគន់នូវហ្វូងសត្វស្លាបទឹក ដែលជាប្រភេទបក្សីរងការគំរាមកំហែងជិតផុតពូជ ហោះហើរចេញពីតំបន់ផ្សេងៗនៃព្រៃកោងកាងជុំវិញបឹងទន្លេសាប។
សូមជម្រាបថា តំបន់អភិរក្សជីវៈចម្រុះបឹងពារាំង ជាតំបន់ស្នូលនៃដែនអភិរក្សជីវៈចម្រុះមួយសម្បូរដោយព្រៃលិចទឹក សត្វស្លាបដី សើម សត្វស្លាបទឹកជាច្រើនប្រភេទ និងត្រីមេពូជ។ បឹងពារាំងមានផ្ទៃប្រមាណ២៥០ហិកតា និងគ្របដណ្តប់ដោយព្រៃលិចទឹកប្រមាណជាង ២៦០៧,៧១ ហិកតា (ផែនទីអភិ រក្ស) មានព្រំប្រទល់ខាងកើតជាប់ព្រំប្រទល់រដ្ឋបាលឃុំកណ្ដែក ខាងលិចជាប់ព្រំប្រទល់រដ្ឋបាលសង្កាត់សៀមរាប និងសង្កាត់ចុងឃ្នៀស៕
