ក្រសួងកសិកម្ម៖ ទិន្នផលស្រូវប្រាំងឆ្នាំនេះនឹងមិនថយចុះទេ ទោះខ្វះទឹកធ្វើស្រែក៏ដោយ
ភ្នំពេញ៖ លោក ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានសរសេរនៅលើទំព័រហ្វេសប៊ុករបស់ខ្លួនថា លោកមិនរំពឹងទុកថាទិន្នផលស្រូវប្រាំងឆ្នាំនេះនឹងថយចុះទេ ព្រោះតំបន់ដែលកំពុងជួបបញ្ហាខ្វះទឹក ភាគច្រើនជាតំបន់ដែលតែងតែមានហានិភ័យ មិនសមស្របនឹងការបង្កបង្កើនផលស្រូវប្រាំង និងមិនត្រូវបានចាត់បញ្ចូលនៅក្នុងផែនការផលិតកម្មទេ។
អំឡុងពេលមន្ត្រីជាន់ខ្ពស់ក្រសួងកសិកម្មរូបនេះចុះពិនិត្យស្ថានភាពផ្គត់ផ្គង់ទឹកសម្រាប់ការបង្កបង្កើនផលស្រូវប្រាំងនៅក្នុងខេត្តពោធិ៍សាត់កាលពីថ្ងៃទី១៤ខែមករា ឆ្នាំ២០២៣ លោកឃឹម ហ្វីណង់ និយាយថាការផ្ដល់ព័ត៌មានជុំវិញការខ្វះខាតទឹកធ្វើស្រូវប្រាំងកន្លងមកហាក់បង្កការយល់ច្រឡំ។
លោក ឃឹម ហ្វីណង់បានលើកឡើងថា “ការផ្ដល់ព័ត៌មានត្រឹមត្រូវនិងទាន់ពេលវេលា គឺជាអភិបាលកិច្ចដែលមានការទទួលខុសត្រូវ ក្នុងចេតនាព្យាយាមការពារអ្នកដែលបានជ្រុលជាចាប់ផ្តើមរួចហើយកុំឱ្យខ្វះទឹកពាក់កណ្តាលទី និងណែនាំអ្នកថ្មីកុំឱ្យចាប់ផ្តើមធ្វើបន្ថែមទៀតតែប៉ុណ្ណោះដែលអាចនាំឱ្យមានការខាតបង់រិតតែច្រើន។
លោកបញ្ជាក់ថា កន្លងមកមានអ្នកយល់ច្រឡំថា អាជ្ញាធរហាមឃាត់មិនឱ្យកសិករធ្វើស្រែលើកន្លែងដែលពួកគាត់តែងតែធ្វើ តែតាមពិតទៅ បញ្ហាកើតចេញពីការដែលប្រជាពលរដ្ឋនាំគ្នាសម្រុកធ្វើនៅលើកន្លែងដែលធ្លាប់ធ្វើទៅវិញទេ ព្រោះឆ្នាំនេះស្រូវលក់បានថ្លៃ ទោះបីជាដឹងមុនថានឹងមានហានិភ័យក៏ដោយ ដែលជាហេតុធ្វើឱ្យអាជ្ញាធរមូលដ្ឋាន ជាពិសេសរដ្ឋបាលខេត្ត គ្មានជម្រើសអ្វីក្រៅពីប្រញាប់ជូនដំណឹងពីការខ្វះខាតទឹកនោះទេ។
លោក ឃឹម ហ្វីណង់ បានថ្លែងបន្តទៀតថា ឆ្នាំកន្លងមកតែងជួបបញ្ហាខ្វះខាតទឹក នៅពេលមានគ្រោះរាំងស្ងួត តែឆ្នាំនេះមិនទាន់មានគ្រោះរាំងស្ងួតផង បញ្ហាខ្វះខាតទឹកបានកើតឡើងរួចស្រេច និងទោះបីជាក្រសួងបានត្រៀមផែនការផ្គត់ផ្គង់ទឹកទុកជាមុនហើយក៏ដោយ។ ទោះជាយ៉ាងណា ដោយពេលកសិករជួបបញ្ហា មិនខ្វល់ថាអ្នកណាខុសអ្នកណាត្រូវនោះទេ អ្វីដែលអាចជួយដោះស្រាយបញ្ហាប្រឈមបានភ្លាមៗ អាជ្ញាធរនឹងព្យាយាមធ្វើឱ្យអស់ពីលទ្ធភាព។
នៅចំពោះមុខហេតុផលទាំងនេះ លោក ឃឹម ហ្វីណង់ ក៏មិនរំពឹងទុកថាទិន្នផលស្រូវប្រាំងឆ្នាំនេះនឹងថយចុះនោះដែរ ព្រោះតំបន់ដែលកំពុងជួបបញ្ហាខ្វះទឹកទាំងនេះ ភាគច្រើនជាតំបន់ដែលតែងតែមានហានិភ័យ មិនសមស្របនឹងការបង្កបង្កើនផលស្រូវប្រាំង និងមិនត្រូវបានចាត់បញ្ចូលនៅក្នុងផែនការផលិតកម្មទេ។
សូមជម្រាបថា យោងតាមសេចក្តីជូនដំណឹងបន្ថែមរបស់ក្រសួងធនធានទឹក ដែលបានចេញផ្សាយនៅថ្ងៃទី ១២ ខែមករា ឆ្នាំ ២០២៤ បានឱ្យដឹងថា រដូវប្រាំង នឹងបន្តអូសបន្លាយរហូតដល់ដើមខែឧសភា ឆ្នាំ ២០២៤ ខណៈក្រសួងក៏អំពាវនាវដល់ស្ថាប័នពាក់ព័ន្ធ អាជ្ញាធរដែនដី និងសាធារណជនឱ្យចូលរួមសហការថែរក្សា ប្រើប្រាស់ទឹកដោយសន្សំសំចៃក្នុងកម្រិតខ្ពស់ ជាពិសេសបណ្តាតំបន់ជនបទដាច់ស្រយាល ដែលនៅឆ្ងាយពីប្រភពទឹក។
ក្រសួងបន្តថា បន្ទាប់ពីបានធ្វើការតាមដាន និងព្យាករស្ថានភាពអាកាសធាតុរួចមក ស្ថានភាពអាកាសធាតុដូច្នេះបន្តនៅក្នុងរដូវប្រាំង ដែលក្នុងនោះ សីតុណ្ហភាពមានការប្រែប្រួលខ្លាំង ជាមួយនឹងសីតុណ្ហភាពក្ដៅកើនឡើង ខ្ពស់ជាងមធ្យមភាគច្រើនឆ្នាំ និងក្ដៅជាងឆ្នាំ ២០២៣ ដោយសីតុណ្ហភាពមធ្យមអតិបរមា ៣៧ អង្សា C និងសីតុណ្ហភាពអតិបរមាខ្ពស់បំផុតរង្វង់ ៤១ អង្សាC នៅក្នុងខែមេសា និងដើមខែឧសភា។
សូមរំឭកថា កាលពីថ្មីៗនេះ រដ្ឋបាលខេត្តកំពង់ឆ្នាំង រដ្ឋបាលខេត្តពោធិ៍សាត់ និងរដ្ឋបាលស្រុកថ្មគោលនៃខេត្តបាត់ដំបងបានប្រកាសផ្អាកបណ្តោះអាសន្នមិនឱ្យប្រជាពលរដ្ឋធ្វើស្រែប្រាំងដោយសារការខ្វះខាតទឹកសម្រាប់បញ្ចូលស្រែព្រោះកសិករធ្វើលើសផែនការកំណត់៕