សម្តេចធិបតី៖ ដើម្បីទប់ស្កាត់របបប្រល័យពូជសាសន៍ កុំឱ្យកើតឡើងនៅកម្ពុជាម្ដងទៀត ត្រូវតែការពារសន្តិភាពឱ្យបាន

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ដើម្បីទប់ស្កាត់របបប្រល័យពូជសាសន៍កុំឱ្យកើតឡើងនៅប្រទេសកម្ពុជាម្ដងទៀត រាជរដ្ឋាភិបាល ប្រជាពលរដ្ឋ និងគ្រប់ភាគីពាក់ព័ន្ធត្រូវតែរួមគ្នាការពារសន្តិភាពឱ្យខានតែបាន និងចូលរួមបញ្ជៀសសង្គ្រាមកុំឱ្យកើតមានផងដែរ ព្រោះប្រសិនបើកើតមានសង្គ្រាមហើយ គ្មានឡើយសិទ្ធិមនុស្ស គ្មានឡើយលទ្ធិប្រជាធិបតេយ្យ។

ក្នុងឱកាសអញ្ជើញបើក​សន្និ​សីទស្តីពី «អនាគតកម្ពុជាគ្មានអំពើប្រល័យពូជសាសន៍» នា​ថ្ងៃទី២០ ខែឧសភា ឆ្នាំ២០២៤សម្ដេចធិបតីបានថ្លែងថា កាតព្វកិច្ចលើកកម្ពស់ការអប់រំពីអំពើប្រល័យពូជសាសន៍ គឺជាកាតព្វកិច្ចរបស់យើងទាំងអស់គ្នា មិនមែនតែរាជរដ្ឋាភិបាលម្នាក់ឯងនោះទេ តួយ៉ាងសន្និសីទថ្ងៃនេះគឺជាគំរូដ៏ល្អប្រសើរនៃកិច្ចសហប្រតិបត្តិការល្អ សាមគ្គីភាពរវាងតួអង្គពាក់ព័ន្ធផ្សេងទៀត។

សម្ដេចថ្លែងយ៉ាងដូច្នេះថា «ចំណុចដែលសំខាន់បំផុត គឺយើងត្រូវតែការពារសន្តិភាពដែលសម្រេចបានដោយលំបាកបំផុតឱ្យខាងតែបាន ទោះក្នុងតម្លៃណាក៏ដោយ»។

សម្ដេចធិបតី ហ៊ុន ម៉ាណែត បានបន្តថា កាតព្វកិច្ចនេះមិនមែនជាកាតព្វកិច្ចសម្រាប់តែប្រជាជាតិកម្ពុជាតែប៉ុណ្ណោះទេ ប៉ុន្តែជាកាតព្វកិច្ចសម្រាប់សហគមន៍អន្តរជាតិទាំងមូលផងដែរ ដែលយើងឃើញថាសង្គ្រាមនៅទូទាំងពិភពលោកមិនដែលបានផ្ដល់ផលល្អសម្រាប់ប្រជាជាតិណាមួយនៅទូទាំងសកលលោកនោះទេ។ ជាសត្យានុម័ត សង្គ្រាមគឺជាស្ថានការណ៍ដែលបង្កឱ្យមានការសម្លាប់រង្គាលប្រឆាំងនឹងជនស៊ីវិលដោយគ្មានរើសអើង ដោយសារតែការប្រយុទ្ធគ្នារបស់ក្រុមប្រដាប់អាវុធ។

សម្ដេចបញ្ជាក់ទៀតថា «នៅពេលដែលសង្គ្រាមកើតឡើងហើយ គឺគ្មានឡើយសិទ្ធិមនុស្ស គ្មានឡើយប្រជាធិបតេយ្យ ដូច្នេះនេះជាការទទួលខុសត្រូវរបស់រដ្ឋនិងប្រជាជនទាំងអស់គ្នាក្នុងការការពារសន្តិភាព និងក្នុងការឱ្យតម្លៃលើសន្តិភាពដែលសម្រេចបានមកជាមួយនឹងការលះបង់មិនអាចកាត់ថ្លៃបាន ដោយមិនត្រូវយលច្រឡំថាសន្តិភាពបានមកដោយ​ឯងៗនោះទេ»៕