សម្តេចធិបតី៖ ទិវាសន្តិភាព ២៩ ធ្នូ គឺសម្រាប់ខ្មែរទាំងអស់ ដែលស្រឡាញ់សន្តិភាព និងស្អប់សង្គ្រាម មិនមែនផ្ដាច់មុខសម្រាប់តែត្រកូលហ៊ុនទេ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ទិវាសន្តិភាព ២៩ធ្នូ គឺប្រារព្ធឡើងដើម្បីប្រជាពលរដ្ឋខ្មែរ ដែលស្រឡាញ់សន្តិភាព និងស្អប់សង្គ្រាម មិនមែនប្រារព្ធឡើងផ្ដាច់មុខសម្រាប់ត្រកូលហ៊ុនទេ ។

ក្នុងពិធីសម្ពោធស្ពានបេតុង និងសំណេះសំណាលជាមួយកម្មករនិយោជិតសរុបជាង១ម៉ឺននាក់នៅខេត្តកោះកុង នាថ្ងៃទី៨ ខែមករា ឆ្នាំ២០២៤ សម្ដេចធិបតី បញ្ជាក់ថា «មានអ្នកខ្លះចេញមករិះគន់ថា ដាក់ថ្ងៃបុណ្យជាតិនៅថ្ងៃទី២៩ ខែធ្នូ គឺសម្រាប់ត្រកូល ហ៊ុន។ ខ្ញុំសូមប្រាប់ថា ខ្ញុំអត់បដិសេធថាត្រកូលហ៊ុនក៏ស្វាគមន៍សន្តិភាពដែរ អ៊ីចឹងទិវាសន្តិភាពគឺសម្រាប់ខ្មែរទាំងអស់ដែលស្រឡាញ់សន្តិភាពនិងស្អប់សង្គ្រាម ក្នុងនោះក៏មានត្រកូលហ៊ុនមួយដែរ តែមិនសម្រាប់ផ្ដាច់មុខត្រកូលហ៊ុនទេ គឺសម្រាប់ខ្មែរទាំងអស់ដែលស្រឡាញ់សន្តិភាព និងបានផលពីសន្តិភាព គឺប្រជាជនយើងទូទាំងប្រទេស»។

សម្ដេចធិបតីបន្ថែមថា នៅថ្ងៃទី១ ខែមករា ឆ្នាំ២០២៤ រាជរដ្ឋាភិបាលបានចេញអនុក្រឹត្យមួយកំណត់យកថ្ងៃទី២៩ ខែធ្នូ ជាថ្ងៃប្រារព្ធទិវាសន្តិភាពនៅកម្ពុជា និងជាថ្ងៃឈប់សម្រាកទូទាំងប្រទេស។ តែបែរជាមានមតិរិះគន់ពីពួកអគតិក្រៅប្រទេសថា ការប្រារព្ធទិវានេះគឺសម្រាប់ត្រកូល ហ៊ុន ទៅវិញ ដោយមិនគិតពីទុក្ខលំបាករបស់ប្រជាពលរដ្ឋដែលរងទុក្ខវេទនាក្នុងសង្គ្រាមសោះឡើយ។

សម្ដេចធិបតីលើកឡើងថា ប្រជាពលរដ្ឋកម្ពុជារស់នៅក្នុងអធិបតេយ្យភាព និងឯករាជ្យភាព ដែលមានទិវាឯករាជ្យជាតិ៩ វិច្ឆិកាជាស្មារតី, ថ្ងៃរំដោះប្រជាពលរដ្ឋខ្មែរពីរបបប្រល័យពូជសាសន៍ មានទិវាជ័យជម្នះ ៧មករាជាស្មារតី ហើយក្នុងថ្ងៃទាំងអស់នេះយើងបានកំណត់ជាថ្ងៃឈប់សម្រាក ដែលប្រជាពលរដ្ឋទូទាំងប្រទេសបានអបអរសាទរគ្រប់គ្នា ដូច្នេះគ្មានអ្វីត្រូវខុសឡើយដែលរាជរដ្ឋាភិបាលកំណត់ថ្ងៃប្រារព្ធទិវាសន្តិភាព២៩ធ្នូ និងឱ្យមានការឈប់សម្រាកនេះ ហើយក៏គ្មានអ្វីត្រូវខុសដែលយើងត្រូវចងចាំសន្តិភាព ថែរក្សាសន្តិភាព កុំឱ្យបាត់សន្តិភាព ហើយធ្លាក់ទៅក្នុងសង្គ្រាមទៀត៕