ឯកឧត្តម សុខ លូ អញ្ជើញចូលរួមពិធីបុណ្យសព និងចូលរួមរំលែកទុក្ខជាមួយក្រុមគ្រួសារសពសិស្សានុសិស្សចំនួន ០៤រូប នៃវិទ្យាល័យហ៊ុនសែនត្រែង ដែលបានស្លាប់ដោយសារលង់ទឹកស្ទឹងសង្កែ
ភ្នំពេញ៖ នារសៀលថ្ងៃទី១៧ ខែធ្នូ ឆ្នាំ២០២៣ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជា ខេត្ត និងលោកជំទាវ ព្រមទាំងសហការី បានអញ្ជើញចូលរួមពិធីបុណ្យសព និងចូលរួមរំលែកទុក្ខជាមួយក្រុមគ្រួសារសពសិស្សានុសិស្សទាំង ០៤រូប ដែលបានស្លាប់ដោយសារលង់ទឹកស្ទឹងសង្កែ ស្ថិតនៅចំណុចខាងក្រោមទំនុបពហុបំណងសេកសកស្ថិតនៅភូមិស្វាយស ឃុំត្រែង ស្រុករតនមណ្ឌលខេត្តបាត់ដំបង កាលពីថ្ងៃទី១៦ខែធ្នូឆ្នាំ២០២៣ វេលា ម៉ោង១១:០០នាទីព្រឹក ខណៈពួកគេចេញពីរៀនបបួលគ្នាមកលេងទឹកនៅដងស្ទឹងសង្កែចំណុចខាងលើ បណ្តាលអោយលង់ទឹកចំនួន៦នាក់ ក្នុងនោះស្លាប់០៤នាក់រួមមាន៖
១.កុមារី សេង អុីនជឺលី អាយុ ១២ឆ្នាំ ថ្នាក់ទី៧
២. កុមារី សេង ជូលីណា អាយុ ១៤ឆ្នាំ ថ្នាក់ទី៨
៣.កុមារី អូ ហាន់ណានូរី អាយុ ១១ឆ្នាំ ថ្នាក់ទី៧
៤-កុមារ៉ា ភាព ចិន្ដា អាយុ ១៤ឆ្នាំ ថ្នាក់ទី១០។
សពកុមារា កុមរីទាំង០៤នាក់ខាងលើស្ថិតនៅភូមិស្វាយស ឃុំត្រែង ស្រុករតនមណ្ឌល ខេត្តបាត់ដំបង។
ស្ថិតក្នុងសមានទុក្ខដ៏ក្រៀមក្រំនោះ ឯកឧត្តម សុខ លូ ក៏បានពាំនាំនូវការផ្តាំផ្ញើពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទ ក្រហមកម្ពុជា ចូលរួមរំលែកនូវមរណទុក្ខជាមួយក្រុមគ្រួសារនៃសព ដែលត្រូវបាត់បង់កូនៗជាទីស្រឡាញ់។
ជាមួយគ្នានេះក្រុមគ្រួសារសព បានគោរពថ្លែងអំណរគុណចំពោះ ឯកឧត្តម សុខ លូ ប្រធានគណៈកម្មាធិការសាខា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានគិតគូរពីសុខទុក្ខរបស់ក្រុមគ្រួសារគាត់ ក៏ដូចជាប្រជាពលរដ្ឋទាំងអស់ដែលជួបការលំបាកដោយមិនទុកនរណាម្នាក់ចោលដោយពុំបានដឹងនោះទេ។
ស្ថិតក្នុងមរណទុក្ខនេះសាខាកាកបាទក្រហមកម្ពុជាខេត្តបាត់ដំបង សូមឧទ្ទិសបួងសួងដល់ដួងវិញ្ញាណក្ខន្ធសព សិស្សានុសិស្សទាំង៤ សូម ទៅកាន់សុគតិភព កុំបីឃ្លៀងឃ្លាតឡើយ។
សម្ភារៈចូលរួមរំលែកទុក្ខជាមួយក្រុមគ្រួសារសពទាំង០៤នាក់ ក្នុងក្នុងមួយសពៗ រួមមាន៖ អង្ករ ១០០គីឡូក្រាម, មី ០២កេស, ត្រីខ ០២យួរ, ទឹកត្រី ០២យួរ, ទឹកស៊ីអ៊ីវ ០២យួរ និងថវិកា ១លានរៀលផងដែរ ៕
