សាខាកាកបាទក្រហមកម្ពុជាខេត្តក្រចេះ រៀបចំប្រារព្ធទិវាពិភពលោកប្រយុទ្ធនឹងជំងឺអេដស៍ ១ធ្នូ ឆ្នាំ២០២៣

ភ្នំពេញ៖ នាព្រឹកថ្ងៃពុធ ទី១៣ ខែធ្នូ ឆ្នាំ២០២៣ ឯកឧត្ដម វ៉ា ថន អភិបាលខេត្តក្រចេះ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត និងលោកជំទាវ ហឹង ណារី វ៉ាថន អនុប្រធានកិត្តិយសសាខាកាកបាទក្រហមកម្ពុជាខេត្ត បានអញ្ជើញជាអធិបតីក្នុងពិធីអបអរសាទរ “ទិវាពិភពលោកប្រយុទ្ធនឹងជំងឺអេដស៍ ១ធ្នូ ឆ្នាំ២០២៣” អមដោយ “ទិវាអន្តជាតិនៃជនពិការ ៣ធ្នូ” និង “ទិវាអន្តរជាតិនៃអ្នកស្ម័គ្រចិត្ត ៥ធ្នូ”។

ពិធីនេះក៏មានការអញ្ជើ្ញញចូលរួមពីសំណាក់ ឯកឧត្តម លោកជំទាវ លោក លោកស្រី សមាជិក សមាជិកា គណៈកម្មាធិការសាខា ថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងប្រដាប់អាវុធ អភិបាលក្រុងស្រុកទាំង៧ ប្រធានអនុសាខាក្រុងស្រុកទាំង៧ អ្នកស្ម័គ្រចិត្ត យុវជនកាកបាទក្រហមកម្ពុជា សិស្សានុសិស្ស បងប្អូនប្រជាពលរដ្ឋ គ្រួសារអ្នកផ្ទុកជំងឺអេដស៍ ៣០នាក់ ជនមានពិការភាព ៣០នាក់ សរុបទាំងអស់ប្រមាណជា ៣៥០នាក់។

ប្រសាសន៍សំណេះសំណាលនៅក្នុងឱកាសនេះ ឯកឧត្ដម វ៉ា ថន បានគូសបញ្ជាក់នូវខ្លឹមសារសំខាន់ៗនៃសារលិខិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា ជូនដល់អង្គពិធីទាំងមូល ដើម្បីជ្រាបនិងសូមអោយទិវាទាំង៣នេះ ស្ថិតនៅក្នុងចិត្ត និងជាការចងចាំរបស់មនុស្សជាតិជារៀងរហូតដើម្បីរួមគ្នាបន្តភាពកក់ក្តៅដល់ជនរងគ្រោះ និងជនងាយរងគ្រោះទាំងឡាយនៅតាមមូលដ្ឋានរបស់យើង។

នៅចុងបញ្ចប់នៃកម្មវិធី ឯកឧត្តម ឯកឧត្ដម វ៉ា ថន ក៏បានផ្តល់សម្ភារ និងថវិកាលើកទឹកចិត្ត ជូនដល់អ្នកស្មគ្រ័ចិត្ត យុវជនកាកបាទក្រហម ប្រជាពលរដ្ឋរងគ្រោះដោយជំងឺអេដស៍ ជនមានពិការភាព ដែលបានចូលរួមក្នុងពិធីរួមមាន៖ អ្នកផ្ទុកមេរោគអេដស៍ និងជនមានពិការភាព ចំនួន៦០នាក់ ក្នុងម្នាក់ៗទទួលបាន ឃីត ០១កញ្ចប់រួមមាន (សារុង១, មុង១, ភួយ១ និងក្រមា១) អាវយឺត៣ និងថវិកា១០ម៉ឺនរៀល។ ដោយឡែកអ្នកស្មគ្រ័ចិត្តកាកបាទក្រហមកម្ពុជា ចំនួន៣០នាក់ ក្នុងម្នាក់ៗទទួលបានថវិកា ៥ម៉ឺនរៀល និងយុវជនកាកបាទក្រហមកម្ពុជា ចំនួន៣០នាក់ ក្នុងម្នាក់ៗទទួលបានថវិកា២ម៉ឺនរៀលផងដែរ ៕