ឯកឧត្តម ផៃ ប៊ុនឈឿន៖ មន្រ្តីបន្តខិតខំពង្រឹងការអនុវត្តបន្ថែមចំពោះតួនាទីភារកិច្ចរបស់ខ្លួន ដើម្បីសុក្រឹត្យកម្មបរិស្ថានកិច្ច
ភ្នំពេញ៖ ឯកឧត្តម ផៃ ប៊ុនឈឿន រដ្ឋលេខាធិការប្រចាំការក្រសួងបរិស្ថាន បានថ្លែងលើកទឹកចិត្តដល់ថ្នាក់ដឹកនាំ និងមន្ត្រីរាជការ នៃអគ្គនាយកដ្ឋានរដ្ឋបាលនិងហិរញ្ញវត្ថុ ឲ្យបន្តខិតខំអនុវត្តបន្ថែម ចំពោះតួនាទីភារកិច្ចរបស់ខ្លួន និងដោះស្រាយបញ្ហាប្រឈមនានា ក្នុងការបំពេញបេសកកម្មផ្តល់សេវាគាំទ្រការងារបរិស្ថាន និងធនធានធម្មជាតិ ដោយផ្អែកលើទស្សនៈទានសុក្រឹត្យកម្មបរិស្ថានកិច្ច និងសំដៅធានា ទៅសម្រេចគោលដៅ នៃយុទ្ធសាស្រ្តចក្រាវិស័យបរិស្ថាន» សម្រាប់ឆ្នាំ២០២៣-២០២៨។ ឯកឧត្តម ផៃ ប៊ុនឈឿន បានលើកឡើងបែបនេះ នៅក្នុងពិធីបិទសិក្ខាសាលាបូកសរុប លទ្ធផលការងាររបស់ អគ្គនាយកដ្ឋានរដ្ឋបាលនិងហិរញ្ញវត្ថុ ឆ្នាំ២០២៣ និងលើកទិសដៅការងារបន្ត នៅទីស្តីការក្រសួង នាថ្ងៃទី១២ ខែធ្នូ ឆ្នាំ២០២៣។ ជាមួយគ្នានេះ ឯកឧត្តមរដ្ឋលេខាធិការប្រចាំការ បានជំរុញឲ្យអគ្គនាយកដ្ឋានជំនាញ ការដាក់ឱ្យដំណើរប្រព័ន្ធឌីជីថល លើការងារគ្រប់គ្រងរដ្ឋបាល (E-administration) របស់ក្រសួងបរិស្ថាន ឱ្យប្រព្រឹត្តទៅដោយរលូនតាមការរំពឹងទុក និងបន្តពង្រឹងសមត្ថភាព និងអភិវឌ្ឍធនធានមនុស្ស ប្រកបដោយគុណវុឌ្ឍិ ដើម្បីអនុវត្តផែនការសកម្មនានារបស់ក្រសួងបរិស្ថានឱ្យមានប្រសិទ្ធភាពខ្ពស់។ សូមបញ្ជាក់ថាសិក្ខាសាលាបូកសរុបលទ្ធផលការងាររបស់ អគ្គនាយកដ្ឋានរដ្ឋបាលនិងហិរញ្ញវត្ថុ ឆ្នាំ២០២៣ និងលើកទិសដៅការងារបន្ត » បានប្រព្រឹត្តទៅដោយរលូន ដោយមានការចូលរួមពិភាក្សា និងមានមតិយោបល់ល្អៗពីឯកឧត្តម លោក លោកស្រីតំណាងអគ្គនាយកដ្ឋាន នាយកដ្ឋាន និងមន្ទីរបរិស្ថាន រាជធានី-ខេត្ត ក្នុងបរិយាកាសរីករាយ ប្រកបដោយកិច្ចសហប្រតិបត្តិការល្អ និងស្មារតីទទួលខុសត្រូវ។ សិក្ខាសាលានេះ តាមរយៈការចូលរួមពិភាក្សា ផ្លាស់ប្តូរមតិយោបល់យ៉ាងផុលផុស ទៅលើប្រធានបទ៖ (១).ការគ្រប់គ្រងកិច្ចការរដ្ឋបាល, (២).ការគ្រប់គ្រងធនធានមនុស្ស, (៣).ការរៀបចំផែនការថវិកា, (៤).ការគ្រប់គ្រងហិរញ្ញវត្ថុ, (៥).ការគ្រប់គ្រងទ្រព្យសម្បត្តិរដ្ឋនិងកិច្ចលទ្ធកម្មសាធារណៈ និង(៦).ការអនុវត្តកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ។ ទាំងនេះ គឺជាធាតុចូលដ៏មានសារៈសំខាន់សម្រាប់ដាក់ចេញនូវទិសដៅការងារគាំទ្រការអនុវត្តយុទ្ធសាស្រ្តចក្រាវិស័យបរិស្ថាន» សម្រាប់ឆ្នាំ២០២៣-២០២៨ ក្នុងមុំទី២ “កសាងរដ្ឋបាលឌីជីថល” ៕
