សម្ដេចធិបតី៖ រាជរដ្ឋាភិបាល នៅតែផ្តោតលើមនុស្សជាចម្បង ដើម្បីសម្រេចចក្ខុវិស័យប្រែក្លាយកម្ពុជា ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ដើម្បីសម្រេចបានចក្ខុវិស័យប្រែក្លាយកម្ពុជា ទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងប្រទេសចំណូលខ្ពស់នៅឆ្នា២០៥០ រាជរដ្ឋាភិបាលនៅតែផ្តោតលើមនុស្សជាចម្បង ពោលគឺឈរលើស្មារតីដោយបោះបង់ពលដ្ឋណាម្នាក់។

ក្នុងពិធីប្រកាស​ដាក់​ឱ្យអនុវត្តជាផ្លូវការ នូវគោលនយោបាយជាតិពាក់ព័ន្ធកម្មវិធីជាតិជំនួយសង្គម នាថ្ងៃទី៥ ខែធ្នូ ឆ្នាំ២០២៣ សម្ដេចធិបតីបញ្ជាក់ថា «ដើម្បីសម្រេចបានចក្ខុវិស័យប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសចំណូលខ្ពស់នៅឆ្នា២០៥០ រាជរដ្ឋាភិបាលនៅតែផ្តោតលើមនុស្សជាចម្បង ដែលនឹងបន្តជំរុញកសាងប្រព័ន្ធគាំពារសង្គមឱ្យមានលក្ខណៈប្រមូលផ្ដុំប្រកបសង្គតិភាព ចីរភាព ដើម្បីឈរលើស្មារតីដោយបោះបង់ពលដ្ឋណាម្នាក់ តាមរយៈការផ្ដោតកិច្ចអន្តរាគមន៍របស់រាជរដ្ឋាភិបាលដល់គ្រួសារក្រីក្រនិងងាយរងគ្រោះ»។

សម្ដេចធិបតីបន្តថា ជាក់ស្ដែងនៅក្នុងនីតិកាលទី៧នេះ រាជរដ្ឋាភិបាលបានកំណត់យកការធ្វើស្ថាបនូបនីយកម្មកម្មវិធីជាតិជំនួយសង្គមសម្រាប់គ្រួសារក្រីក្រ ជនងាយរងគ្រោះក្នុងគ្រួសារក្រីក្រ និងគ្រួសារងាយរងហានិភ័យក្នុងគ្រាវិបត្តិសេដ្ឋកិច្ច និងគ្រាមានគ្រោះអាសន្ន ដែលជាកម្មវិធីគោលនយោបាយទី៣ ក្នុងចំណោមកម្មវិធីគោលនយោបាយអាទិភាពទាំង៦របស់រាជរដ្ឋាភិបាល ដើម្បីបន្តអភិវឌ្ឍប្រព័ន្ធជំនួយសង្គមសម្រាប់កសាងសង្គមមួយដែលមានភាពរឹងមាំ ភាពធន់ និងប្រកបដោយបរិយាបន្ន តាមរយៈការលើកកម្ពស់ការអភិវឌ្ឍមូលធនមនុស្ស សុខុមាលភាពរបស់ប្រជាពលរដ្ឋ គ្រួសារងាយរងគ្រោះ និងងាយរងហានិភ័យ ដើម្បីកាត់បន្ថយអត្រាភាពក្រីក្រ និងអភិវឌ្ឍសេដ្ឋកិច្ចប្រកបដោយចីរភាព ៕