អភិបាលខេត្តស្ទឹងត្រែង កោតសរសើរចំពោះមន្ត្រីក្នុងស្រុកថាឡាបរិវ៉ាត់ទាំងអស់ ដែលសហការគ្នាបានយ៉ាងល្អដើម្បីឱ្យស្រុកមានការរីកចម្រើនគ្រប់វិស័យ

ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានថ្លែងកោតសរសើរ ចំពោះមន្ទីរអង្គភាពជុំវិញខេត្តទាំងអស់ អាជ្ញាធរស្រុក ឃុំ ភូមិ ព្រមទាំងបងប្អូនប្រជាពលរដ្ឋ នៅក្នុងភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់ ដែលកន្លងមកបានខិតខំសហការគ្នាដើម្បីការពារនូវសុខសន្តិភាព សណ្តាប់ធ្នាប់សាធារណៈ ក៏ដូចជាបានសហការខិតខំយកចិត្តទុកដាក់ធ្វើការកសាងអភិវឌ្ឍន៍ទៅលើហេដ្ឋារចនាសម្ព័ន្ធគ្រប់វិស័យដែលធ្វើឲ្យភូមិ ឃុំ ស្រុក របស់យើងនេះមានការរីកចម្រើនគ្រប់វិស័យ។

ឯកឧត្ដមអភិបាលខេត្តបានលើកឡើងបែបនេះនាព្រឹកថ្ងៃទី៤ ខែធ្នូ ឆ្នាំ២០២៣ខណៈអញ្ជើញជាអធិបតីបើកបវេសនកាលឆ្នាំសិក្សា២០២៣-២០២៤ និងសម្ពោធដាក់ ឲ្យប្រើប្រាស់អាគារសិក្សាមួយខ្នង ៦បន្ទប់ដែលគាំទ្រ ដោយក្រុមហ៊ុនអាយហ្សិនផាម៉ា និង អង្គការក្លែនអន្តរជាតិកម្ពុជា សម្រាប់ស្រុកថាឡាបរិវ៉ាត់ ។

ឯកឧត្តមអភិបាលខេត្ត បានបន្ថែមថា រាជរដ្ឋាភិបាលអាណត្តិទី៦ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីក្នុងអាណត្តិទី៦ ក៏បានដាក់ចេញនូវយុទ្ធសាស្ត្រចតុកោណ ចាប់ពីដំណាក់កាលទី១ រហូតមកដល់ដំណាក់កាលទី៤ ដែលត្រូវបានបញ្ចប់នៅក្នុងអាណត្តិទី៦ ក្នុងរយៈពេលកន្លងមកនេះ ក្នុងនោះក៏មានវិស័យអប់រំ ជាវិស័យអាទិភាពមួយនៅក្នុងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ដែលត្រូវជំរុញការកសាងនូវធនធានមនុស្សតាមរយៈការលើកកម្ពស់គុណភាពវិស័យអប់រំរបស់យើងនេះ។

ឯកឧត្តមអភិបាលខេត្ត បានបញ្ជាក់បន្ថែមថា បើប្រៀបធៀបទៅនឹងចំណេះដឹងរបស់ធនធានមនុស្សនៅកម្ពុជា ក៏អាចថាមិនចាញ់តាមបណ្តាប្រទេសនៅក្នុងតំបន់ និងសកលលោកដែរ។ ប៉ុន្តែអ្វីដែលជាមោទនភាពរបស់យើង យើងចង់បញ្ជាក់ថា យើងទើបតែនឹងបានកសាងនូវធនធានមនុស្សនេះឡើង ដោយនៅក្នុងរយៈពេលខ្លី។

ឯកឧត្តមអភិបាលខេត្ត ក៏បានចាប់អារម្មណ៍ទៅលើមតិរបស់លោក យី គឹនថាន ជាតំណាងរបស់អង្គការក្លែនអន្តរជាតិ ហើយលោកបានឈរជើងមូលដ្ឋាននៅក្នុងខេត្តស្ទឹងត្រែងមានរយៈពេលជាង៦ឆ្នាំកន្លងមកនេះ ក៏បានចូលរួមចំណែកជាមួយរាជរដ្ឋាភិបាល ជាមួយអាជ្ញាធរខេត្ត ជាមួយមន្ទីរជំនាញ ក៏ដូចជាអាជ្ញាធរមូលដ្ឋាន នៅក្នុងខេត្តស្ទឹងត្រែងនេះ។ មិនត្រឹមតែមានអង្គការក្លែនអន្តរជាតិនោះទេ ក្នុងនោះក៏មានជំនួយពីអង្គការដៃគូនានា ដូចជាអង្គការ អាយហ្សិន ហ្វាម៉ា កូរ៉េ ដែលមានលោក ប៊ី យ៉ុងជុលផាក ដែលជាតំណាងឲ្យក្រុមហ៊ុនម្ចាស់ជំនួយ តាមគាំទ្រ និងអនុវត្ត ដោយសហការគ្នាជាមួយនឹងអង្គការក្លែនអន្តរជាតិ ប្រចាំប្រទេសកូរ៉េ គឺជាការចូលរួមចំណែកដែលធ្វើឲ្យអង្គការក្លែនអន្តរជាតិ អនុវត្តនូវសមិទ្ធផលវិស័យអប់រំនៅខេត្តស្ទឹងត្រែងបានច្រើន មានសាលារៀនរហូតទៅដល់ ១៩ខ្នង ស្មើនឹង ៥០បន្ទប់ និងវិស័យសុខាភិបាល យើងមានមណ្ឌលសុខភាពមួយចំនួនទៀត ដែលអង្គការក្លែនអន្តរជាតិបានធ្វើ រួមទាំងការលើកកម្ពស់ផ្នែកទឹកស្អាត វិស័យសុខាភិបាល សុខមាលភាព របស់កុមារនៅតាមសហគមន៍ផងដែរ ៕