សម្តេចធិបតី៖ រាជរដ្ឋាភិបាលត្រៀមថវិកា ១០០លានដុល្លារសម្រាប់ធានាតម្លៃអគ្គិសនីមិនឱ្យឡើងថ្លៃនៅកម្ពុជា
ភ្នំពេញ៖ ក្នុងពិធី “បិទស្ទឹងសាងសង់ទំនប់វារីអគ្គិសនីតាតៃលើ អានុភាព ១៥០មេហ្គាវ៉ាត់” ស្ថិតនៅក្នុងស្រុកថ្មបាំង ខេត្តកោះកុង នាព្រឹកថ្ងៃទី៣០ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា រាជរដ្ឋាភិបាលកម្ពុជាបានត្រៀមថវិកា ១០០លានដុល្លារសម្រាប់ធានាតម្លៃអគ្គិសនីមិនឱ្យឡើងថ្លៃ។
សម្តេចធិបតី ហ៊ុន ម៉ាណែត បានលើកឡើងថា រដ្ឋត្រៀមខាតថវិកា ១០០លានដុល្លារនេះ ពោលដើម្បីធ្វើយ៉ាងណាឱ្យប្រជាពលរដ្ឋអាចប្រើប្រាស់ភ្លើងក្នុងតម្លៃថោក ខណៈជារៀងរាល់ឆ្នាំតាមបណ្តាប្រទេសគឺសុទ្ធតែដំឡើងថ្លៃអគ្គិសនី ប៉ុន្តែកម្ពុជាសុខចិត្តរក្សាតម្លៃដដែល។
សម្តេចធិបតី អះអាងថា គោលបំណងរបស់រាជរដ្ឋាភិបាលគឺដើម្បីជួយសម្រួលជីវភាពពលរដ្ឋកុំឱ្យមានការលំបាក និងជួយរក្សាលំនឹងការអភិវឌ្ឍ និងស្ថេរភាពសេដ្ឋកិច្ចកម្ពុជាតាមវិស័យផ្សេងៗ។
សម្តេចធិបតីថ្លែងដូច្នេះថា៖«រដ្ឋអត់ចំណេញទេ ក្នុងប៉ុន្មានឆ្នាំនេះរដ្ឋខាត ឆ្នាំនេះយើងគ្រោងខាត ១០០លានដុល្លារសម្រាប់ឧបត្ថម្ភធុន គឺសម្រាប់ទប់ថ្លៃភ្លើងសម្រាប់ឱ្យប្រជាពលរដ្ឋប្រើប្រាស់ក្នុងតម្លៃទាប»។
សម្តេចធិបតី នាយករដ្ឋមន្ត្រី បានគូសបញ្ជាក់ថា រាជរដ្ឋាភិបាលបានសម្រេចបញ្ចុះតម្លៃអគ្គិសនីសម្រាប់វិស័យកសិកម្មរយៈពេល៣ខែកន្លងមក ហើយគ្រោងនឹងបញ្ចុះតម្លៃអគ្គិសនីដល់វិស័យទេសចរណ៍បន្ថែមទៀត។
សម្តេចធិបតី នាយករដ្ឋមន្ត្រី ក៏បានជំរុញឱ្យក្រសួងរ៉ែ និងថាមពលត្រូវតបណ្តោញអគ្គិសនីឱ្យដល់គ្រប់តំបន់ភូមិឃុំស្រុកឱ្យរួចរាល់មុនឆ្នាំ២០៣០។
សម្តេចធិបតី នាយករដ្ឋមន្ត្រី បានរំលឹកថា កាលពីឆ្នាំ១៩៩៨ កម្ពុជាអាចផ្គត់ផ្គង់អគ្គិសនីដល់ពលរដ្ឋតែ ១៥០មេហ្គាវ៉ាត់ប៉ុណ្ណោះ ខណៈបច្ចុប្បន្នកម្ពុជាមានសមត្ថភាពអាចផ្គត់ផ្គង់អគ្គិសនីនៅទូទាំងប្រទេសបានជាង ៤ ០០០មេហ្គាវ៉ាត់ ៕
