សម្តេចធិបតី ហ៊ុន ម៉ាណែត៖ ខ្ញុំសូមឲ្យបងប្អូនប្រជាពលរដ្ឋ ជួយគាំទ្រផលិតផលកសិកម្ម ផលិតផលក្នុងស្រុករបស់យើង

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងអំពាវនាវឲ្យប្រជាពលរដ្ឋ ជួយគាំទ្រទៅដល់ផលិតផលកសិកម្ម ដែលផលិតក្នុងស្រុក ។

ក្នុងឱកាសអញ្ជើញប្រកាសដាក់ឱ្យអនុវត្តកម្មវិធី​នយោបាយអាទិភាព ពាក់ព័ន្ធវិស័យកសិកម្ម នាថ្ងៃទី២០ វិច្ឆិកានេះ សម្តេចធិបតី ហ៊ុន ម៉ាណែត មានប្រសាសន៍បញ្ជាក់យ៉ាងដូច្នេះថា «ចេកចុះថ្លៃ ប៉ុន្តែចេកកំប៉ុង មិនអាចចុះថ្លៃទេ ពោតអាចឡើងចុះ តែពោតកំប៉ុងមិនងាយចុះទេ ផលិតផលសម្រេចមិនងាយទេ។ ពិតណាស់ កសិកម្ម​ ត្រូវធ្វើ កសិ-ឧស្សាហកម្មយើង ១០០មុខទេ ទិសដៅយកអ្វីដែលជាសក្តានុពល ហើយពង្រីកតែម្តង។ ឧទាហរណ៍ មៀនប៉ៃលិន កំពុងមានទីផ្សារ យើងកំពុងដាក់គោលនយោបាយអនុគ្រោះផ្សេងៗ ពង្រីកតំបន់ (ផលិតមៀន) ប៉ៃលិន។ អតិថិជន ជាស្តេច អតិថិជន ជាអ្នកកំណត់ ក្នុងនិងក្រៅប្រទេស បើផលិតហើយ យើងអត់មានទីផ្សារលក់ យើងពិបាក។ អញ្ចឹងសម្រាប់កម្ពុជាយើង ខ្ញុំសូមឲ្យបងប្អូនប្រជាពលរដ្ឋយើង ជួយគាំទ្រទៅដល់ផលិតផលកសិកម្ម ផលិតផលក្នុងស្រុករបស់យើង»។

សម្ដេចគូសបញ្ជាក់ថា ចំពោះការធ្វើការលម្អិត មន្ត្រីកសិកម្មរទាំងថ្នាក់ជាតិ និងថ្នាក់ក្រោមជាតិអាចជួយបាន ផ្គុំជាមួយវិស័យឯកជន ទាញនូវបច្ចេកវិទ្យាផ្សេងៗ ដាក់ទិសដៅតែម្តង ខិតខំធ្វើយ៉ាងណានាំចេញផលិតផលសម្រេចឲ្យបានច្រើន ដើម្បីធានាការប្រមូលនូវតម្លៃបន្ថែម នៅក្នុងស្រុកឲ្យបានច្រើន ៕