ស្នងការខេត្តបន្ទាយមានជ័យ រៀបចំប្រទីប ដើម្បីចូលរួមអបអរសាទរ ក្នុងពិធីបុណ្យអុំទូក អកអំបុក បណ្តែតប្រទីប និងសំពះព្រះខែ នៅស្ទឹងព្រះពន្លា ក្រុងសិរីសោភ័ណ
ភ្នំពេញ៖ ដើម្បីចូលរួមអបអរសាទរ ក្នុងពិធីបុណ្យអុំទូក អកអំបុក បណ្តែតប្រទីប និងសំពះព្រះខែ ស្នងការដ្ឋាននគរបាលខេត្តបន្ទាយមានជ័យ ក្រោមការដឹកនាំរបស់ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានរៀបចំប្រទីបស្នងការដ្ឋាននគរបាលខេត្តបន្ទាយមានជ័យ ដើម្បីចូលរួមអបអរសាទរ ក្នុងពិធីបុណ្យអុំទូក អកអំបុក បណ្តែតប្រទីប និងសំពះព្រះខែ នៅស្ទឹងព្រះពន្លា ក្រុងសិរីសោភ័ណ។
សូមបញ្ជាក់ថាប្រទីបក្នុងខេត្តបន្ទាយមានជ័យមានរហូតដល់ចំនួន ៣៩ មកពីគ្រប់មន្ទីរ អង្គភាពស្រុកក្រុង បានចូលរួមបណ្តែត នៅតាមដងស្ទឹងសិរីសោភ័ណ ក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ គឺដើម្បីអបអរសាទរ ក្នុងពិធីបុណ្យអុំទូក អកអំបុក បណ្តែតប្រទីប និងសំពះ ព្រះខែ ព្រមទាំងតាំងពិព័រណ៍ផលិតផល ការប្រគំតន្ត្រី និងកម្មវិធីសមោសរ ដទៃទៀត ដែលមាន ២ ដំណាក់កាល ចាប់ផ្តើមពីថ្ងៃទី០៦ ដល់ថ្ងៃទី២៨ ខែវិច្ឆិកា ឆ្នាំ២០២៣។
ពិធីនេះធ្វើឡើងដើម្បីបង្ហាញពីភាពដឹងគុណ និងកតញ្ញូតាធម៌ដល់ព្រះគង្គាដែលបានផ្តល់ឲ្យមនុស្ស និងសត្វមានជីវិត។ រាល់ឆ្នាំប្រជាពលរដ្ឋខ្មែរតែងប្រារព្ធ ព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ដែលជាបុណ្យប្រពៃណីជាតិខ្មែរដ៏ធំមួយ ក្នុងចំណោមពិធីបុណ្យប្រពៃណីជាតិ ដទៃទៀត។
ជាមួយគ្នានោះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត បានដាក់ពង្រាយ កម្លាំងនគរបាលជាច្រើននាក់ ចុះសម្រួលចរាចរណ៍ រៀបចំសណ្តាប់ធ្នាប់ ទាំងនៅលើទឹក និងលើគោកនៃទីតាំងប្រារពពិធី ដើម្បីយាមល្បាត ការពារសន្តិសុខ សុវត្ថិភាព និងថ្នាក់ដឹកនាំ មន្ត្រីរាជការ ភ្ញៀវជាតិ អន្តរជាតិ ប្រជាពលរដ្ឋជិតឆ្ងាយ ដែលអញ្ជើញមកទស្សនាពិធីនេះផងដែរ ៕
