សម្តេចធិបតី ហ៊ុន ម៉ាណែត៖ ពិតណាស់យើងមិនអាចដោះស្រាយអស់ នូវអ្វីដែលប្រជាជនចង់បានត្រឹមរយៈពេល ៤ឆ្នាំ

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ពិតណាស់យើងមិនអាចដោះស្រាយអស់ នូវអ្វីដែលប្រជាជនចង់បានត្រឹមរយៈពេល ៤ឆ្នាំនោះទេ ហើយតម្រូវការរបស់ប្រជាជនក៏មិនអាចបញ្ចប់ត្រឹមតែ ៤ឆ្នាំនោះដែរ ។

ក្នុងឱកាសអញ្ជើញជួបសំណេះសំណាលជាមួយកម្មករ និយោជិតប្រមាណ ១៨,១៩០នាក់ ក្នុងខេត្តកណ្តាល នាថ្ងៃទី២ វិច្ឆិកា សម្តេចធិបតី ហ៊ុន ម៉ាណែត បានលើកឡើងថា ការបោះឆ្នោតជ្រើសរើសបក្សប្រជាជនកម្ពុជា ពីសំណាក់បងប្អូនកម្មករ និយោជិន និងបងប្អូងប្រជាពលរដ្ឋ គឺជាការសម្រេចចិត្តត្រឹមត្រូវហើយ ហើយសូមកុំបារម្ភរាជរដ្ឋាភិបាលនឹងប្រឹងប្រែងដើម្បីជាតិ និងប្រជាជន ធ្វើយ៉ាងណាមិនឱ្យប្រជាពលរដ្ឋខកបំណងការទុកចិត្តមកលើគណបក្សប្រជាជនកម្ពុជា។

សម្តេចធិបតី ថ្លែងថា រាជរដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជា គឺមិនបាននៅស្ងៀម ឬមិនចោលនូវកិច្ចសន្យាជាមួយប្រជាពលរដ្ឋនោះទេ ប៉ុន្តែ រាជរដ្ឋាភិបាលខិតខំបន្តអនុវត្តន៍នូវកិច្ចសន្យាទាំងនោះជាជំហានៗ។

សម្តេចធិបតី ហ៊ុន ម៉ាណែត បញ្ជាក់ថា «ពិតណាស់បងប្អូន៤០ថ្ងៃ ៦០ថ្ងៃ ៩០ថ្ងៃ ១០០ថ្ងៃ ១ឆ្នាំ ៤ឆ្នាំ យើងមិនអាចដោះស្រាយអស់នូវអ្វីដែលប្រជាជនចង់បាននោះទេ ហើយតម្រូវការរបស់ប្រជាជនមិនអាចមានត្រឹមតែ៤ឆ្នាំនោះទេ បើប្រជាជនចង់បានអ្វីត្រឹមតែ២០២៨ ឱ្យចប់ក្រោយពីហ្នឹង ទុកឱ្យសំណុំពរទៀត ក៏ទៅមិនរួចដែរ ។ តែអ្វីដែលសំខាន់ គឺយើងត្រូវខិតខំដោះជាជំហាន ដោយជាបណ្តើរ»។

សម្តេចធិបតី ហ៊ុន ម៉ាណែត បន្ថែមថា អ្វីដែលដោះបាន គឺត្រូវខិតខំដោះឱ្យបាន ដោយផ្អែកទៅលើស្ថានភាពជាក់ស្តែង ត្រូវក្តាប់ឱ្យជាប់នូវតម្រូវការរបស់ប្រជាពលរដ្ឋ ៕